World Cup 2018 Russia Qualifiers : Germany, England-zy ama tlô nota Poland 4-0 ta tlô vei ei

Mats Hummels ta daihti chhâna lâchhâh liata Goal a khôpa hmâpa ta Germany ta Czech Republic pahniepa ta, Russia liata hâkô World Cup akhaih thei awpa ta ama duahmo liahsa papha heih ei ta; he pahniena vâna heta Northern Ireland chhao World Cup akhaih thei awpa ta ama duasu a pha via ha heih hra.

Germany heta Group C liata pahniena to khai chypa ta âmo pazituhpa Northern Ireland hlâta Point 5 ta â sâh via chy ei ta. World Cup akhaih thei awpa ta khaih 3 amâ khaih via chy awpa ângiah thlâh ha chy.

Daihti ama pathao tawhta minute 4-na liata Germany hmia asahna he Timo Werner ta Mesut Ozil tawhta Ball a hmôpa tawhta za khô ta, anodeikua he hmia amâ sahna he Czech Republic châta Vladimir Darida ta minute 78-na liata lâhlâpi tawhta a za khôpa hmâpa ta a zâ pasu ta. Minute 10 khô ta, Germany tlôna Goal he Hummels ta a luhta a za su pangia hapa a châ.

Germany ta Czech Republic ama pahniepa vâna heta San Marino, 3-0 ta pahnietuhpa Northern Ireland châta cha Czech Republic ama hmiachhy tita amâ pahniethai khiah Group c liata 2-na liata ama y pazao lymâ thei aw tahna a châ. European World Cup Qualifier group 9 a ypa liata, Group to liata 2-na liata a ypa, record hnei phapazy ta Play-offs amâ khaih thei aw.

Defending champions Germany heta Russia ngai thei awpa ta Norway ama pahnie awpa deita â ngiah ha bâ.

Norway heta Azerbaijan 2-0 ta vaw pahnie ei ta, anodeikua he râh mianopazy châna heta cha Russia ngai awpa ta hnabeiseihna y khao leipa ta, Northern Ireland cha Point 9 rairie ta amâ chadai hai.

Group F liata Slovakia ta England hmia asahna chadie via awpa ta Slovenia 1-0 ta pahnie ei ta; Group F liata 3-na Scotland hlâta Point 4 ta amâ sâh via lymâ chy. Slovakia heta ama hmiachhy heih awpa England ama pahnie khiahta cha Group F liata a chô chai liata ama y thei aw.

He hawhta a châ nona heta Group hmia asahtuhpa England chata Malta 4-0 ta vaw pahniepa ta, he akhaihna liana heta Harry Kane ta Goal 2 khô ta, khaih 3 liata Goal 4 a khô ha tahna châ. England 4-0 ta ama tlô nona heta Scotland ta chhao 3-0 ta Lithuania ama vaw pahnie hra.

Group E hmia asahtuhpa Poland cha 4-0 ta Denmark ta pahnie ei ta, he akhaihna liana heta Christian Eriksen ta Goal kha khôpa ta, mohropa khô awpa a taopa hra.