SUMO APIEPASIPA THATIH SIA VIAPA : ABC Home kiah lia Lôpu-Siaha Sumo Apiepasi

SIAHA, 15 Di, Chutynoh(MNN) - Zâhnia dawh 7:30 PM rachhôh lianakha ta Lôpu khih tawhta Siaha pangaipa ta a kaw siepa Lôpu-Siaha Sumo Service cha ABC Home kiahpâh, PWD Road Short-cut liata apiepasi ta, chyhsa pa 4 zy ta hrona ama pahlei.

Ama accident-na su he Thlahchhâna su tawhta Short-cut lâthlôh akaw siepa, ABC Home kaw tlô chy liata achakhâ chaina su liata achâpa ta pahnopa châ ta, Sumo liata chyhsa pahrawh hleithôh(13) ama kia vâta Sumo ta pahnie leipa ei ta, âkhao khei ha ei a châpa pahnopa a châ.

Driver he azaw pathlah hmâ ha ta, âboh kawpa ta hmôpa a châpa hawh ta biedaopa a châ.

Mo hropa zydua deikua Sumo cha ta akhao khei khai eita, thokha chatho pathlahpa ta y ei ta, thokha deikua cha Sumo âtâh-na chahaoh su liata hmôpa ama châ.

Amâ tah-na chahaoh he, Thlahchhâna su tawhta Titlao Chavâh pangaina NH-54 lâpi achhihpa ta chahaoh eima tlôtua chaipa laikachha liata châ ta, chyhsa siethai lei awpa tlupo ta achakhâpa nata sierairupa a châ

Ama motor kiapa ha Puhpa H. Lalhluta Sumo a châpa ta pahnopa châ ta, Christmas daihti zy âhnia hapa vâta Siaha lâ kaw Bazar awpa ta a kawsiepa ama châpa ta pahnopa châ ta, amâ cha-ie kaw tarawpa ta, lâsiezy a sâh kaw vâta he Motor liata amâ hnaohpa hawh ta bie eima dao.

He ama kiapa Sumo he Vahia Tlâhpi liata a phei rao tua ta, ama tao chhôh ta, passenger nô thokha nata hawhti nahzy ta he su liata lâchao amâ chahrypa cha ama niepa hawh ta, ahmôpazy ta ama reih.

Motor haohtuhpa he Handyman achâtyhpa châ ta, atliata tawhta ahaohpathaopa a châpa hawh ta pahnopa a châ hra.

He Short-cut he cha a chakhâ kawpa vâta âthaoh-na tawh tlaita Gear laipa – sâkhana(1st Gear) thla chhielie ta arâ awpa abyuhpa châ ta, 2nd Gear ta arâ tlamawpa ta a châ khia, a pahniena su achyhta y hrasala, chakhâ kawpa liata cha a speed lâlao cheingei awpa; 1st Gear thla abyuhpa a châ. 

Junior Driver zy ta cha, he hawh ta a Gear thla awpa ama pahno chho leipa ta a châ khia rairuna atyh leithei lei awpa a châ hra.

He lâthlôh he motor laipa arâ pasaipa châ leipa ta, Light Vehicle ngâlâh arâ pasaipa a châ.

Sumo nata Passenger aphaohpa Motor rairai cha Light Vehicle châ thei leipa ei ta, he Lâpi liata amâ râ ngâthlâhpa he hmodo leipa a châ thei awpa a châ hra.

He hleikhô ta lâko lia maih ta motor atleina awpa y lei ta, alâpi rai rai he hluh via syulyu cha motor atleina awpa a y hro hro leipa a châ hra.

He Short-cut lâpi chakhâ pâtu hapa vâta Accident he rei awpa hluh kaw bâta, atliata lia chhao ta Mahinda Pick-up sâkha a accident heih hrapa a châ.

Biehneituhpazy ta he lâthlôh he ama mo pazi awpa peimawh hmeiseih ta, âtheipa ta a châ khia khaw lâlao awpa he Mara zawpi thokhazy khona dâh a châ bâpa ta âlâ.

Atahmâ dawh 10:30 PM taih ta, apiepasipazy hry liata hrona apahleipa eima pahno theipazy cha:-

1. Pihnô HT. Siapaw, kô 58

2. Pihnô HV. Naki, kô 48

3. Laihsa VT. Beihneingia, kô 30

4. Hawtipa H. Lalawmpuia, kô 15

Thâtih thieh viapa update heihpa a châ aw.

Biehnawh - MNN