‘The Eagles’ Band ta ‘Hotel California’ chôchâh liata biebuapa ama pangiapa liata aryhna ama tao

Photo credit Getty Image

Rock Band rônahpa, Eagles chata ama hla, ‘Hotel California’ tahpa nahta ahniahnipa ta Mexican Hotel miakha, ‘Hotel California’ tahpa ta bipa Court liata amâ khona biebuapa cha pachiapa a châ tawhta pachhâsapa a châ.

Eagles nata Hotel hneituhpazy heta aryhna bie rohpa ta, he Hotel moh he US liata hmâh aw vei ei, tahpa bie amâ taih tawhta biebuapa he pachhâsapa a châ.

Hotel California (Reuter)

Eagles heta he Hotel hneituhpazy heta ama khichhaipazy cha Eagles hla rônahpa, ‘Hotel California’ nahta ama Hotel cha â zaokhipa hawhta ama chho tyh, tahpa Hotel hneituhpazy he bai ei ta. Amah la cha Hotel liata pasasapa ta, Hotel California T-shirt nata ama hla moh arona hmo nano nanopazy cha sôhpaliena châta ama hmâh tyh ama tah hra.

Eagle hla, Hotel California album kha US liata Copy 16 million zuapa châ ta; kô 1977 liata papuapa châ ta, Grammy Award ama lakhei hra. He hla heta kheihawhpa su hmahta dy hlei vei, tahpa ama reih hra.