CHAMPIONS LEAGUE QF 1st Leg : Ronaldo ta Goal rônahpa khôpa ta 3-0 ta Real Madrid ama tlô

Cristiano Ronaldo ta ziza liata a pathluahpa ta, â die lâ tawhta goal khôpa ta, Champions League liata goal rônah chaipa hrytapa khôpa ta, Real Madrid ta Juventus cha Champions League quarter-final first leg liata 3-0 ta ama pahnie.

Ronaldo he football player hryta â zaopa ta Champions League akhaihna liata goal 10 a khô thei tua chaipa a châ pâ hra tahna a chã.

Video moh khohpazy chata :

Italian club rônahpa Juventus heta daihti ryhpaohpa hnei taraw hr'eisala hmâh phahnai thei vei ei; Real lâ tawhta yar 25 ta â hlapa tawhta Toni Kroos ta Buffon papiesa hmâ leipa ta a za chapiepa, goal tôh a pakhâhpa a khai hapa kha la a i kaw hra aw.

Toni Kroos ta a khô leipa i â chhi kaw nota, he khai tawhta Champions League thátih liata khâ rei a hlao ha bâ awpa, goal rônahpa â ngiapa heta Ronaldo rônahna baichhapa ta, Player hropa zydua a pho khai ha heih.

Dani Carvajal ta ball â sâh lâ tawhta avaw pathluahpa cha Cristiano Ronaldo heta ziza liata a kaw pathluahpa ta, â die láta Gianluigi Buffon patu hmâ rimâ lei awpa ta pazei pangia ta. Buffon he â piepâ hmâ vei tah thei'pa a châ.

He goal he la Juventus tlyliah liata Juventus fans-zy chhaota a rônah ama tah hapa na châ aw, Ronaldo goal khôpa he a duahpa ta ama ku ama vaw chabaipa.

Turin club châta nôpona a baichha via awpa ta, ama player phapa Paulo Dybala cha Yellow card ei 2 a hmô tawhta papuapa châ ta. He tawhna heta cha Juventus heta Real châta chybâlâkhâ châ muarua khao vei ei.

Ronaldo heta goal hropa khôchhi heihpa ta, Marcelo ta avaw khó baichhipa chhaota 3-0 ta ama khichhaina tlyliah liata pahniena ama kei to.