UEFA CHAMPIONS LEAGUE QF : Roma ta Barcelona ama pahlaw!
AS Roma ta UEFA Champions League thâtih liata a pahniena rônah chaipa hrytapa patlôsapa ta, Barcelona cha quarter final second leg liata 3-0 ta Stadio Olimpico (4-4 aggregate) liata vaw pahniepa ta, 1st Leg liata 4-1 ta tlô hra v'ei sala, 'Away goal' hmâpa ta Semi final amâ ngia haw.
Barcelona heta first leg kha 4-1 ta Camp Nou liata pahniena topa ta, heta mopa ta cha Roma châta hnabeiseih â chhih lei kaw! Zãhnia zâ ta Rome khihpi liata akhaihpa liata deikua Roma heta hmo rônahpa miah ama pahmósa tah leithei awpa châ vei.
Edin Dzeko ta 1st leg liata minute 80-na liata goal a khôpa phahnaizie âvaw lâ ta — club mianopazy likah pananotuhpa tah leithei'pa châ vei.
2nd leg liata chhao Dzeko pyly ta Roma goal hmiatua chaipa khô heih ta. Minute 6-na liata Daniele De Rossi ball pathluahpa cha Barca kaochhôh lia pangiapa ta, 1-0 ta hmia amâ sah pâ ha. Anodeikua, Roma heta 1-0 ta 1st half chhâna taihta hmia a sah hra ei sala, Barcelona heta semifinals amâ ngia thei thlâh ha chy, tahpa cha 1st le3g result váta â lâpasia kaw thlâh ha chy.
Châhrasala, Barcelona 'defense' zy a môkuapa pho pasupa ta Dzeko pyly avaw luah heihpa ta, ball pathluahpa, Barca kao chaby liata â chadaipa cha, Gerard Pique ta vaw papaopa ta, penalty a chã haw. De Rossi vaw chakâ papuapa ta, goal lâta vaw pachâsapa ta, 2-0 a châ ha heih.
Roma goal thôhna he Barca defender zy taochhei hialiapa vâta a châ tah leithei'pa châ vei. Minute 82-na liata corner tawhta Kostas Manolas ta a za râ pangiapa ta a luh ta a za su pangiapa cha Barca defender zy a pielyu hmâ vei ei.
1st leg liata 4-1 kha, 2nd leg liata 4-4 châpa ta, Roma he 'away goal' hmâpa ta Semi finals amã ngia haw!
