Article : MARA REIH LEI AW VEI - By Rev Dr Laiu Fachhai
1. Mara râh liata Mizo reih â vaw ngia tua chaina su cha Tipa Bei vaih (Tipa ‘B’) tah sih la eima rei chhei tu na ta a ngia vei. Ama beipa kha Laipa châ taraw ta, châhrasala Lai reih chei leipa ta Mizo reih a cheihpa Laipa a châpa vâta, a khihsaw maluh hluh via syulyupa Marapazy ta Mizo reih ama cheikhei haw. He chôna heta Bei vaih khihsawzy Mara reih a thei leipa y veih ei. Ama reih a châpa vâta ama thai khai.
2. Tipa Viah vaih he Mara râh lâ Mizo reih â vaw ngiana khih nona a châ ngyu aw. British sawhkhâ ta sawhkhâh khih ta a hmâpa châ ta, cha cha Assam sawhkhâ nata Mizoram sawhkhâ zy chhaota chhy pazao ei ta, sawhkhâ raihriapa hmiatuapazy kha Mizo reih a cheihpa viarô sai ama châpa vâta, Tipa ‘V’ liata a pahrâpazy ta Mizo reih he ama chei lymâ hra. He chôna heta Tipa ‘V’ he Mara khihpi a châna â lâ ngâ thlâh ha. A khihsawzy Mara reih a thei leipa y veih ei. Ama reih a châpa vâta ama thai khai.
3. Amôbyu ‘Ch’ (Amôbyu Chapi Vaih) he Mara râh lâ Mizo reih â vaw ngiana khih thôhna a châ thei ngyu aw. Sawhkhâ lâpi (mile = me) a chhawhpa (a pathaipa) zy ta he khih liana he vaw pahrâ ei ta, âmo he Lai râh lâ tawhtapa hluh via ei ta, châhrasala Mizo reih a cheihpa Laipa châ hra thlyu aw ei ta, Marapa Amôbyu ‘Ch’ lâ a paihpazy chhao ta Mizo reih he cheih lymâ hra ei ta, chavâta Mizo reih cha Amôbyu ‘Ch’ liata hmâ chaipa reih lâta a pua haw. He chôna heta Amôbyu ‘Ch’ khihsawzy Mara reih a thei leipa y veih ei. Ama reih a châpa vâta ama thai khai.
4. Siaha he Pawi-Lakher Regional Council Khihpi vaw châ ta, Lai râh tawhta Member of Regional Council (MRC) hluhpi nata PL Region Office liata hriatuhpa hluhpizy kha Lai reih a thai leipa, Mizo reih a hmâhpa châ ei ta, Lai reih a thaipa ama ypa chhao ta Marapa hluhpi ta Lai reih ama thai leipa vâta Mizo reih ta bie a chho awpa byuh ha ta, eima unawhpa Lainah hra ta Mara reih thai leipa ei ta, chavâta Mizo reih cha PL Region Official reih lâta a pua haw. Cha dei châ vei. PL Region liata a y hrapa Chakma nawh hra ta Lai reih tlyma, Mara reih tlyma ama thai leipa vâta PL Region reih ta Mizo reih hmâ awpa â ngiah haw.He heta Mara râh liata Mizo reih cheina a tha patlô ta, thata a palaiseihsa. He chôna heta Marapa Mizo reih a cheihpa lâta a pua hapa hluh hraoh veih ei.
5. Eima unawh Lainah châta ama PL Region khihpi liata ama pahrâ n’awpa châta New Siaha su he rao viapa hawhta ama reipa, he rohtuhpa heta ei thei, â do aw tlyma? New Siaha liata a pahrâpa Lainah hra ta Lai reih chei leipa ei ta, Mizo reih ama chei via hapa vâta Siaha Khihpi liata New Siaha Vaih cha Mizo reih cheina vaih lâta a pua haw. Chavâta New Siaha he Mizo reih ta Mara râh liata a chuahmo a paryhna khih miapalihna a châ tah mawh pi sih la, rei chhei tu thlyu aw ma pi. He chôna heta New Siaha khihsawzy Mara reih ama thei khai rô thlâh ha, Mara râh liata a ypa ama châpa vâta.
6. Siaha Khihpi cha Mizoram District Khihpi (Chhimtuipui District Khihpi) vaw châ ta, Mizo reih cha District Official reih vaw châ ta, Chhimtuipui District sawhkhâ department nanopazy liata hriatuhpa Marapa, Laipa, Chakmapa, Mizopa nata chi hropa zydua raihriana nata bie a chhona reih châta Mizo reih cha hmâpa châ ta, he heta Mara râh cha Mizo reih ta tlai ta, Mara râh liata Mizo reih cheina a thatlô via lymâ ta a laiseih lymâ. He chôna heta Marapa Mara reih thai khao leipa ta Mizo reih a cheihpa lâta a pua hapa y tu veih ei. Mara reih â boh lymâ.
7. MADC ta Primary nata Middle schoolzy a la hlâ kha cha, Mara râh liata Primary nata Middle Schoolzy liata Mizo reih hmâpa châ ta, he heta Marapasawzy cha Mizo reih thlai ta maniah kaw pathaisa ta, Mara râh liata Mizo reih a ngia a paryhsa via lymâ. He chôna heta Mara reih lei hraoh vei. A laiseih lymâ hra.
8. Atanoh chhao media (electronic nata print media) vâta Mara râh liata Mizo reih a ngia â ryh via lymâ. Mizoram State liata y pi ta, State Official reih cha Mizo reih a châpa vâta lei thei leipa ta Mizo reih cheih pi ta, roh pi ta, sawhkhâ function nata Awnanopa functionzy liata Mizo reih eima hmâ pâ lymâ. He chôna heta Marapa Mara reih thai khao leipa ta Mizo reih a cheihpa lâta a pua hapa hluh hraoh veih ei.
9. Chi hropa Mara râh liata a ypazy ta Mara reih he thai a chhuah ei ta, ama cheih lymâ hra. Marapa chi hropa lapinô/vahpa ta a hneipazy ta ama lapinô/vahpa nata sawzy Mara reih ama pathaisa lymâ. Chhôhkha hluhpi cha Mara reih nata Mizo reih a hmâh pakaohpa bi-lingual châ ei ta, he he chhôhkha lia dei châ leipa ta, Mara râh duahmo a châ pathao laihpa ta â lâ. Chi hropa Mara râh liata a ypazy ta Mara reih thai ei ta, Marapazy ta Mizo reih thai pi ta, chatanachata keimo nata eima reih chyu hmâh pi ta eimâ thei thai kaw bâ.
10. Reih hropazy cha a lei hapa, a lei ngâ kawpa nata a lei thei awpa duahmo liata a duah hra ei sala, Mara reih cha lei hraoh aw vei. A chô liata palâsa hapa hawhta, khi tlupo ta Mizo reih ta a vipa chhaota, thyu thei khao leina taihta vi hraoh vei. Mizo reih hry liata Mara reih a kaw duah lymâ ta, a kaw pachyu ta, atahmâ cha liahsa â kaw i ha bâ. Mara reih official reih ta a hmâhpa MADC sawhkhâ thatlôpa eima hneipa heta Mara reih he a tha a patlô via lymâ aw.
BIEKHAWNA
A chhâna liata cha, châthaipazy nata thyutliazy ta ama reih ama chei leipa nata ama zakheipa reih cha a lei n’awpa a nao via pachai na ama tah. Marapa châthaipazy nata thyutliazy ta Mara reih he pasô ei ta, zakhei tiarâh leipa ei ta, ama hmâ khoh ngaitapa vâta Mara reih hmialâ daihti awpa a khaih pha kaw. Mara reih he Lei tiarâh leipa aw ta, a laiseih lymâ aw.
(Nochhi Mara [Myanmar Mara] lâta Mara reih a lei lei awpa kyh nata khizaw kaoki liata Marapa a ypazy ta Mara reih ama chei lymazie zy he tawhta eima pazao heih aw.)
