Puhpa Elaisa Vâhnie ta Myanmar sawhkhâ tawhta palyupalihna dao

Burmese America Community Institution Inc paduatuhpa nata Executive Director Puhpa Elaisa Vahnie cha achuna kyh liata a hmahlana a rônah kawpa vâta Myanmar sawhkhâ ry liata Union Education Ministry chata palyupalihna châta ‘Gold Medal’ a hlâ. He palyupalihna he Union Education Minister, Dr.U Myo Thein Gyi ta a hlâ.

Puhpa Elaisa Vâhnie hmahlana zawzi ta, Myanmar liata châ achupa, athai patluapazy châta Scholarship la thei awpa ta America sawhkhâ nahta hriaparaohpa ta, he Scholarship hmâpa heta Myanmar achuhaipa hluhpi ta achuna â sâh viapa amâ pazao theipa a châ.

Puhpa Elaisa Vahnie hmahlana nata tiamana vâta Myanmar Sawhkhâ nata USA Sawhkhâ hriaparaohpa ta, châ athai patlua viapazy Myanmar râh pôhpalôhpa liata a ypa, Scholarship hmâpa ta USA liata achuna a sâh viapa kiah thei awpa ta hmahlana hlaotlohna ama to lymâpa vâta Puhpa Elaisa Vâhnie he Myanmar Sawhkhâ ta alykheina nata palyupalihna lymâ ama hlâ hapa a châ.

Khazohpa chhihthana nata byhnâ vâta Marasaw tawhta he hawhpa chyhsa apalaikhei achhih kawpa, Puhpa Elaisa Vâhnie eima hneipa vâta Khazohpa lâta alynabie reih tiama via lymâ suh vy.

Biehnawh - Pawhrau Hlichhy, USA