NOBEL PEACE PRIZE 2018 : Khizaw liata palyupalihna â sâh chaipa daotuhpa Dawhty nata Yazidi chanô

Congolese dawhty, ama rãh liata chanô-chapaw châna â do lei kawpa ta hmâkheipa chhâh â châhtuhpa nata Yazidi chanô, Islamic State riahrupa py zy ta patupa ta, 'Sex slave' ta ama patâhpazy cha atakô ta Nobel Peace Prize dao awpa ta Norwegian Nobel Committee chata atanoh khata ama phuah.

Dr Mukwege, kó 63, nata Murad, kô 25, zy cha "Adyuhna nata chariah chhaichhi atlychakapa ta chanô-chapaw châna â do lei kawpa ta nata tharô hmâpa ta hmâkheina adyuhna kyh liata tha ama thyu hluh tu hapa vâta he palyupalihna he hlâpa ama châ."

Mukwage he chanô dawhty (gynaecologist) châpa ta, Democratic Republic of Congo liata moleipazy ta tharô hmâpa ta chanô-chapaw châna amâ hmâkheipa chanô sãhhluhpi zy hmahzôh mohôhtuhpa châ ra. Murad he Kurdish chyhsa, Iraq liata chyhsapa adona tovyuh a châhoheituhpa a châ hra. Ano he ISIS zy ta Yazidi chanô 3,000 ama patupa hryta pakha châ ta. Yazidi zy he Iraq liata cha Kurdish religious minority ama châ.

Atakô heta Nobel committee liata he palyupalihna dao awpa ta mopakha moh 216 nata py 115 moh dao ta; 9 million Swedish kronor ($1.01 million) palyupalihna dao awpa heta Dawhty Mukwage nata Murad zy he amâ tlyh hapa a châ.

Zâkô 2017 liata he palyupalihna daotuhpa cha International Campaign to Abolish Nuclear Weapons (ICAN) ama châ.