Puhpa N. Zakhai, CEM ta Chief Minister’s Rural Housing Scheme pahyna hnei

(SIAHA, 3 October, 2018, Wednesday) : Atanoh my dawh 11:30 Am liata Puhpa N. Zakhai, Chief Executive Member(CEM), MADC ta Siaha District châta “Chief Minister’s Rural Housing Scheme” cha DRDA Conference Hall, Siaha liata pahyna a hnei.

Puhpa Zakhai chata reih ta, eima District he eima vâhnei kaw ta, Population lâta cha Mizoram District hry liata achyh viapa lâchhâh eima châ no ta Mizoram sawhkhâ tawhta Scheme nata Development sôh a y theipa awpa zydua liata hmia pasahpa District hry liata ahlao tyh pi ta, atahmâtahpa lia chhao District thokha hlâta hmia pasahpa eima châ heih tahpa a reih.

Puhpa Zakhai biereipa thokhazy:-

1. Mizoram State liata Congress sawhkhâ ta NLUP Flagship Programme hlaotloh kawpa ta a vaw siekhei khai tawhta chyhsa rietheipazy ta eimâ thôhkhei kaw tahpa cha zawpi pahnopa châta, he he apazao lymâna châta achhuahnohna nata raotlohpa tao pazi heihpa ta New Economic Development Policy(NEDP) a pachhuapanoh thei heihpa he aly achhih ta, arônah ngaita kaw.

2. Chatanachata NEDP ry liana he ta chyhsa rietheipa, pahrâna O hneileipazy châta Chief Minister’s Rural Housing Scheme(CMRHS) pha kawpa tao heihpa châ ta, sôh nata thih liata baona ngâlâh châleipa ta pahrâna O pha kawpa ama hnei theina awpa ta pachhuahpanohna tao pa châ ta, pahrâna O hneileipazy ta he Scheme hmâpa he ta pahrâna O pha kawpa ama vaw hnei thei awpa a châ.

3. Scheme y chiehpa thokha IAY(atahmâ Pradhan Awaaz Yojana) nata Rural Housing Scheme zy he ta khodâh hawh ta chyhsa dyhchhie hmeiseihpazy hnoh ta tlô papha thei tyh leipa ta, Chief Minister’s Rural Housing Scheme diekua he cha chyhsa sipasana nata baongiahpâ, pahrâna O a hnei hlithâ leipazy hnoh ta atlô papha awpa a châ.

4. He Scheme ta â chhuah chaipa cha O nata lyu pahrâna phapa hneipa ta nata nietluana ipa hneipa ta khihsana phapa hnei chyu awpa he a châ.  Tho nata ramawh zy hmâpa ta Ngiadih O sapazy he cha apha kaw taraw no ta thlihpipa nata vâsua rupazy tawhta aboh leipa nata taopathi byuh ngâthlâhpa he nietluana ipa hnei leipazy châta cha arairu kaw ta, chazy cha Congress sawhkhâ he ta pahnokhei ta, nietluana(NLUP) hleikhô ta O lyu sana awpa(CMRHS) he avaw pachhuahpanoh heihpa a châ.

5. Eima pahno chyupa hawh ta Congress sawhkhâ Leader zy ta India râh liata dyhchhiepazy he pachâ peimawh kaw ei ta, atanoh taihta Congress sawhkhâ chata India râh liata chyhsa riethei viapa nata dyhchhie viapazy he a pachâpeimawh lymâpa a châ. Anodeikua India râh Centre sawhkhâ liata ryureina chabatuhpa BJP zy ta Congress sawhkhâ taochiehpa Scheme zy ta a moh bâhta ama panano laihpa a châ.

6. He Chief Minister’s Rural Housing Scheme he eima District châta hmophapa a châna hawh ta hlaotloh kawpa ta sikheipa a châtheina awpa ta khokheina sâh chaipa ei cha hlâ ei.

BIE BAICHHIPA:

Chief Minister’s Rural Housing Scheme(CMRHS) hlaotloh kawpa ta siekheipa a châ theina awpa ta Block Rural Housing Committee(BRHC) paduapa châ aw ta, BDO he Chairman/Member Secretary a châ aw. Khih/Vaih to liata VCP zy cha Member châ khai aw ei ta, he hleikhâ ta NGO zy tawhta member pakha chyu ama y hra awpa a châ. Concern Line Deparatment nata Concern Engineer(i/c Housing) zy chhao Committee member liata pahlao awpa a châ hra.

He Scheme ry liana he ta Gram Sabha ta Beneficiary awpazy atlyh awpa ta, Block Level Rural Housing Committee ta mopadona hnei aw ta, he khai tawhta District Level Selection Committee ta âpykhei awpa a châ hra. He vâna he ta khi to liata VC zy cha ama peimawh kaw aw tahna achâ.

(Written by BeiRôkhu Beitâ, I & TO, MADC)