Article : HLA BIE KYH - By Laicho Nôtlia

Khazohpa ta chyhsa to he hmo khâpa chhâ tlyma pikheipa taotheina (talent) a pie chyu. A pamosana ta, ao phapa, hla sa thaipa, hla tao thaipa, novâhna kao nanopa etc. a hluh kaw. He zydua he Khazohpa byhnâ sai a châ. Atahmâ eima rei khohpa cha, hla bie chôchâh he a châ. Hla taotuhpa tlyma bie a rohtuhpa tlyma ta pachâna nata achhuahna kaw hneipa ta hla tao ei ta, bie chhao ama roh. Cha amâ chhuahna kaw siekheipa ta ama hla taopa tlyma, bie ta châpaw (article) ama ropa tlyma cha ahyhmah ta pananopa thei ma pi.

Vaw pananopa ha ei sih la, kha hla nata bie kha âmo taopa nata ropa châ thai khao leipa aw ta, a pananopatuhpa taopa nata ropa tlao a châ ha aw. He vâta, aviapachaipa ta hla taotuhpa nata palietuhpazy ama tao chiehpa eima pananopa he cha a do vei. Eima pananopa khiahta cha, ataotuhpa or apalietuhpa hmiatuapa moh kha thy ha ta, apananotuhpa hnôhchaipa moh kha pachohsa h’awpa a châ.

Kyh to lia rô ta eimâ mopâpa, tlaikaonahzy ta, he hawhpa kyh liata ama châ ropa he, eima vaw reih heih tua aw. Kristian Hlabu No. 89-na ‘Mal min sawm turin’ tahpa Patea taopa, châh 1-na tlâh 2-na liata, ‘Khuaan’ tahpa he a origin châ leipa ta, ‘Khuaah’ tahpa châ ta, print heih tita padopa châ sala ama tah. KHB No. 95 –na, ‘Hlimna ni ropui chu a eng’ tahpa Kamlala taopa, châh 4-na, tlâh 4-na liata, ‘lo vang’ tahpa he ‘love’ tah awpah a châ, ama tah heih. KHB No 36 –na ‘Aw khawngaihtu Pathianin’ tahpa Chawngkhupa taopa, châh 1-na, tlâh 2-na liata, ‘Kan thinlung chhung …’ tahpa he, ‘Ka thinlung chhung’ tah awpah a châ, ama tah heih hra. A chhâpa cha he hla he ataotuhpa heta ano mopakha (Singular form) châ hawh sai ta a taopa a châ vâta, he Printing mistake ‘Kan’ he ‘ka’ ta thla h’awpa ama tah heih. He dei châ leipa ta, a chaneina liata, ‘Mihring mihrinna’ tahpa chhao he, ro chheipa châ ta, ‘Mifing finna hian’ tahpa ta taopathi awpah a châ, ama tah.

KHB No. 194-na, ‘Jerusalem Zion Khawpui chu thlir teh u’ tahpa Suakliana taopa chhao he, châh 1-na, tlâh 1-na liata, ‘Jerusalem Zion khawpui’ he a lei liatapa châ ta, châh 2-na, tlâh 1-na, ‘Jerusalem khawpui thar’ he vâ liatapa châ ta. He vâta he châh 2-na liata, ‘Aw mi an tam’ tahpa, châh 1-napa liata, ‘Aw mi an tam’ tahpa hawhta ropa he printing mistake châ ta, ‘Aw mi an dang’ tahpa a châ, ama tah heih. Lei liata chyhsa kha vâ liata cha panano hapa a châpa vâta ‘…mi an tam’ tahpa châ vei ama tah heih. MKB No. 5-na, ‘Leilung pian hmain thu chu a awm’ tahpa Rev. E. Rowlands taopa châh 3-na, tlâh 1-na liata, ‘Pathian Zawlneiin thu a hrilh chawk’ tahpa he ‘…thu an hrilh chawk’ tahpa he a origin a châ e, ama tah heih.

Reih awpah hluh kaw hra ta, a chhâna ta Sangzuali hla taopa, ‘Ka duh ber Lalpa’ tahpa a chaneina tlâh chhânapa, ‘Chatuan thlenga ka belh tur che,’ tahpa kha ‘Chatuan thlenga ka belh tur chu,’ tahpa ta vaw panano ei ta. He he â vahpa chhaota, ‘Chu’ tah leipa ta ‘Che’ tahpa ta bâh soh pathipa châ sala tahpa ta a khopa a reih hra.

Keimo Hlabu liata deikua cha, chyhsa ta ama paliepa dei châ leipa ta, ama taopa dâhdei chhao, kho khota eima pananopa thlâh ha bao! Cha hawhpa hry liata sâkha he eima kaw moh tua aw. Eima Missionary, L.M. Tlôsai Lorrain Foxal taopa, Hla No. 453 (11th Edition) –

*Châh 1-na :*

Khi dei ta Awsi a diapa hawna cha, (ori)

Khih deih ta awhsi a leipa hawhna cha,

Cha haw khizaw hriapasa taw si kho pi (ori)

Cha hawh Khizaw hriapasa siesai aw pi,

Eima taona ky va theipata y (ori)

Eima chakaona vâ dei miah thei ei.

Eima taona ky (ori)

Eima chakaona

Eima taona ky va theipata y (ori)

Eima chakaona vâ dei miah thei ei.

Cha haw…….si kho pi (ori)

Cha hawh…. sie sai aw pi.

Eima taona ky va theipa ta y (ori)

Eima chakaona vâ dei miah thei ei.

*Châh 2-na:*

Mia ama vâ ma, mo hro mia thla hra la, (ori)

Miah ama my ma, mo hro miah thla hr’ei sa,

Lyu eima tu chipa ama hria no;(ori)

Chi eima tu chiehpa ama hria no;

Y chi tupenaw hriapasa taw si byu,(ori)

Chi tuh tu p’enawh hriapasa tawh sie byuh,

Eima taona ky va theipa ta y.(ori)

Eima chakaona vâ dei miah thei ei.

*Châh 3-na:*

Khizaw liata chi eima tupa dei,(ori)

Khizaw lia chi eima tupa dei cha.

Sahriana theizy eima tao no chhao.(ori)

Sâhhria thei nah eima hrianazy chhao.

*Châh 4-na:*

Hy mia pachhahtu lôsôzy pakhyno,(ori)

Miah pachhatuh lôsôhzy a pakhy ti,

Thapha lakho thlarawpa hmô tawta;(ori)

Thaphana lakho eimâ kho tita;

Cha ti ano deichhypenaw ngachhizy;(ori)

Cha ti ano zituh ngâchhihpazy cha;

Ama zydua ta theipata y khei.(ori)

Ama chakaona vâ athei aw ei.

He hla tlâh 20-pa liata, tlâh 3 chyu chyuh he a ualua (ori) tata soh pi ta, tlâh 17 cha eima pananopa khai ha. He he eima Pihnô Vailinô taopa châ khao leipa ta, a pananotuhpenawh taopa a châ ha.

Hla No. 491 – na, ‘Khazohpa chhy’pata,’ tahpa he, eima panano chyh chaipa châ ta. Anodeikua cha châh 7-na eima pahlao khao heih vei.

*Châh 7-na :*

Khazohpa lâ khy t’u,

Thlah cha palôh aw ei;

Vârâh liata yna phapa,

Chhâzaw na hnei thei aw, tahpa châh he eima thy ha.

Eima Hlabu No. 310-na, ‘Beipa na ao nai ta,’ tahpa he, Kristian Hlabu (Mizo) liata châh 4 y ta. Keimo 7th Edition liata châh 5 y ta, 11th Edition liata châh 6 a y heih.

Eima Hlabu nata Biehrai zy he eima Beipa Zisu â vy hlâ via cha, eima hmâh lymâ awpah châ ta. Edition to biehmia liata a chhuh (Printed) kô nata patohpatiatuhpazy moh, châna (designation) ro pâ lymâpa a châ. He liata â do kyh leipa zy a y khiahta cha, thyutlia vaw y lymâ awpahzy ta vaw hmô aw ei ta, miah ama maochhie tlamaw aw. Chavâta pachâna hmeiseih hmâhpa ta, tlâhrai hawh tlâ hria leipa ta, Edition thiehpa liata cha seisiana awpah khôkhâh khai sih la tahpa kho â chhih ngâsâ.