Pawsaw ngiachhie a chhihpa : Thina a râsai ei ta; Châhrasala khôkhâh pyly vei ei

Râh buana nata nohchareihta thina dawh pyu ama theina râh, SYRIA râh â râsaipa ta, abohna nata thlahlôh kawpa ta khih ama sa hra theina awpa pachâpa ta, khizaw liata râh aboh chaipa hawhta ama pahnopa, NEW ZEALAND vaw ngai ei ta, châhrasala thina ku chakuapa chata ama pawsaw ta âvaw chadai lymâ hapa ma a châ ma? Khizaw liata râh a boh chaipa liata chhao a boh pyly vei ei!

Hamza nata a paw ri byh ama sy nopa

Atliata liata New Zealand liata Muslim achhyna-O, MOSQUE tlahnaona liana khata chyhsa 50 tlai kasaopa ama châ, tahpa cha eima pahno khai. Kha liana khata pawsaw ngiachhie a chhi kawpa, SYRIA râh tawhta abohna vaw tluapa ta NEW Zealand ngaituhpazy chhao cha thina ta pathlie hra vei.

Râh buapa, adyuhna nata nohchareih thina ta ryu a reina râh, SYRIA râh liata hro chi â chhihnazie zy, nohchareih thina ta ryu a reina dâh zy cha khizaw ta a pahno khai. He chhiesana râh SYRIA puasaipa ta, abohna tluatuhpa paw nata saw, Khalid Mustafa, kô 44, nata a sawchapaw, Hamza Mustafa, kô 15-pazy cha abohna su, tahpa ta ama vaw ngaipa, New Zealand liata thlahlôh kawpa ta thlah ama chhâ nota, moleipa pakha ta Meithei ta ama chhyna-O cha vaw tlahnaopa ta, chyhsa 50 a thipa hryta amâ hlao.

A uhta nata a paw ri pathlietuhpa Zaed

Syria liata a hmialâ daihti a zoh kawpa vâta a paw ta New Zealand avaw ngaikheipa, Hamza he a kiana siku Principal chata, “Thyudyupa ngiachhiena a pazai kawpa, achuhaipa tiamapa nata Vety Dawhty châ awpa a chhuah kawpa a châ” tahpa ta lôhhiah kawpa ta a thâtih a rei.

He ama chhyna-O liana heta a paw heta Hamza dei a chhi leipa ta, a nawhta chapaw, kô 13-ta uhtheipa Zaed chhao a chhi ta, Zaed deikua he a bâh nata a phei liata theisâlô heta khaipa ta, a hrona lei hraoh vei. A paw nata a uhta ri ama pabu nota, Zaed heta ama ri pathlie hrapa ta, a duah awpa â chhuahpa cha, a hmah vâta a duah thei ngâsâ leipa ta, â tyuh pakhua ha tyh.

Henah pawsaw sahlao zy he zâkô ta liana khata Syria râh buana a râsaipa ta New Zealand vaw ngai ei ta. New Zealand thâtih ama vaw theina dâh cha, ``Khizaw liata râh a boh chaipa châ ta, râh phapa nata ngiaryh a chhih chaipa a châ hra... he liana heta cha hro thlahlôh chhih kawpa nama hmâh thei aw''tahpa a châ taraw..

``Châhrasala, vaw châ vei.''

- Indiatimes