Bao angiahpazy baotuhpa chyhsa hneirôh kawpa sawchapaw panozy ta Sri Lanka pachârôna ama tlôkhei

Sri Lanka liata nô pakha, Fathima Fazla châta Colombo liata vaih miakha liata ama opapazy cha chhôhkha hneirôh kawpa, chyhsa ta ama pasâhsa kawpa tahpa hleikhô pahnopa hnei vei. Khatluta ma henah chhôhkha heta ama râh liata pei ama hria aw, tahpa chhochhi cha a pachâna liata y beih aw vei.

He chhôhkha hneirôh kawpa, Mahawela Gardens liata O lai kawpa liata a pahrâpazy he ama unawhta Easter Sunday nohta Achhyna-O nata Hotel nano nanopa Bomb hmâpa ta tlahnaona liata a maophaoh chaituhpa hryta a hlao ei ta, chyhsa 359 thina liana khata hmia a chhihtuh chaipa ama châ.

Henah unawh hryta pakha viapa, Inshaf Ibrahim, kô 33-ta uhtheipa, Copper factory hneituhpa he, Shangri-La hotel liata thithlupa ta a pôhpa liata Bomb-papatuhpa kha châ ta. He chôchâh liata Police zy ta ama O ngaipa ta, ama O kei mopasia awpa amâ chhuahpa cha  a unawhpa - Ilham Ibrahim ta Bomb vaw papa heih hrapa ta, ano nata a lahpinô nata a sawnah pathôh-zy ama thi khai.

Ama Opa liata khih a sapa, Pihnô Fazla chata chhôhkha pha kawpa nata mohropazy châta â pasaih kawpa hawhta avaw pahno tyhna zie a rei.

Henah unawhzy paw, Mohamed Ibrahim, cha patupa châ ha hra ta. He Ibrahim he chyhsa hneirôh kawpa, sôhdaohpa hneirôhpa châ ta, sawchapaw pacharu nata sawchanô pathôh hnei ta. Ano a pahnopasiatuhpazy ta cha ama pasâhsa kawpa a châ.

Ama yna vaih liata rietheipazy hnohta nie awpa nata phusâ a pie tyhpa vâta pahno hlao kaw ta. “A sawnahzy ta lianyh rarô-ypa ama cheih thlâh hapa he zo a ru hmeiseih” tahpa ta ama opapa Pihnô Fazla chata a no-âhzie a rei. Ibrahim-zy chhôhkha hmotaopa vâta Sri Lanka liata Muslim chyhsazy ama mona dâh â nano ha bâ awpa chata a pachâ a parôsa kaw hra aw.