Kyhpachâna ta Pihpasina a pahnie – West Saizawh khih liata ahneina rônahpa

He khizaw, lahpi-vahpa cha rei lei, khopa châta chhao ‘Hneirôhpâ leipa zy la’ tahpa khizaw daihti eima hmâna râh liana heta, hmo eima pangiasa pha leipa nata, eima pachâ pha leipa, chyhsa palôhrupa pahnietuhpa nata, a phana lâta chyhsa palôh paheisatuhpa hmo a tlôpa he avaw y ha heih tyh hra. He hawhpazy vâna heta hro thlalôh a chhih ta, khizaw he pahrâna tlâh a za châ ha heih tyh.

Atahmâta eima rei awpa he, khizaw su hropa lâta a tlôpa tlyma, hmia pahno leipa râh liata a tlôpa tlyma châ vei! Mizoram liata a tlôpa tlai a châ..Kyhpachâna hmeiseihpa chata pathluapa-eihna rai vaw hnei vei! Kyhpachâna vâta Pihpasina tiahpa ta a yna thâtih, phôhpa, phichhypa a châ leipa he vaw reih hra tua.

Târi 16 April, 2018-pa liana khita, BCM Achhyna-O, West Saizawh khih liata ahneina rônahpa nata anano patluapa eima hmô aw!

Emmanuel V.Lalhruaizela (Hruaia) nata Zobiakremi (Tebawihi)-zy chata hrochhôh châta ‘Bie ei châ taih’ tahpa ta, hrochhôh nôvahta amâ tao ha bâ aw! Khazia ma ahneina tlai cha tlô ngâthlâh haw, henah ahneina cha nama palâsa kho pachaih?nama tah mâ..ama thâtih palôh hria kawpa, pihpasina tawhta Kyhpachâna avaw pihpa he vaw reih la, na palôh a cha pahnie leipa ta a châ khiahta la, Palôhrupa Dawhty ngai ma y..(Hehe)

Hruaia nata Tebawihi-zy he kô 2014 kôchhâna lâ tawhna khata â pahno pathao ei ta. He nona heta ama likah liata a viasana dei leipa cha hmohropa khâpa hmahta y vei. Châhrasala, viasa hawhta amâ pakyh tyhna chata ama likah liata pakhâ thei rimâ lei awpa ta kyhpachâna avaw luahpa ta, kô 2019 âvaw pahieh papuapa cha, ‘Kyhpachâna cha sapa lâta ama pachâsa ha bâ aw’.

Hruaia he sapa liata akhaihly leipa, sypa pasana vâta a kuphei nata a pôhpa hropa papie thei khao leipa, khodâh hawh chhaota a pielyu thei leipa châ ta. Hruaia heta ano hawhpa unawhpa, Kungtea ama tahpa hneipa ta, ama unawh heta sypa pasana a hnei raihriepa ama châ.

Tebawihi sawzy nahta ama Bazaar

He hawhta a châ nona heta, Hruaia lahpinô awpa, Tebawihi deikua heta kô 2003-pa khata vahpa vaw hnei ha ta, Khawzawl khih liata Darngawn vaih liata a y tyhpa a châ. Kô 2014 khata a vahpa nahta achhaihpa ta, a saw pathôhzy nahta Aizawl liata ama pahrâ.

Hruaia-nah unawh he akhaihly leipa, sypa hmahta châ hra ei sala, bie nata hla a pahâh kawpa, thai kawpa ama châpa vâta chyhsa chhaota ama pasâhsa kawpa ama châ. Hruaia heta kô 2017 khata châbu sâkha, “Hringnun Hling Bawm” tahpa cha vaw papua ta, zawpi ta ama khoh kawpa vâta kô 2018 khata papua chanei heihpa a châ.

Hruaia nata Tebawihi he viasata hawhta a pakyh tyhpa ama châpa vâta Tebawihi heta Hruaia ta rairuna â tyhpa, a ie nata pazô taihta â pasopanô thei leipa a châna cha hmô khai thlâh ha hra ta; he vâna heta a ngiachhie ngaita kaw tyh. Cha ngiachhiena cha, kyhpachâna lâta avaw laiseih hapa a châ.

Hruaia chata, a pihpasina vâta a reisi kawpa ta, hetana heta a rei – “Sadu chhao thlie ngâh vei vana..chyhsa hro liata peimawh chaipa nata pasôtlâh a châ chaipa, hrochhôh châta ei kaolâh awpa chanô ei tyhpa he â phuh vana, Khazohpa byhnâ a châ hmeiseih. Cha liata chhao, Krizyhpa thyutliapa ei châna hawhta, ‘Achhyna-O Pahypa Tlaita’ Awnanopa hmiakô liata ahneina bietaina ei rei awpa he keima châ ta la rônah tu ha ta, mohropa zy deita ama tao awpa hawhta ei pachâ tyhpa, keima tlaita ei tao hra bâ awpa he ramâ zy chhao a lyu ngaita tlaina. Ei hro liata hmo a vaw tlô hapa zy liata he hlâta alychhih viapa nata rônah viapa he atyh beih leipa na ta, a tyh beih khao heih ngyu vana” a ta.

A lahpinô awpa Tebawihi chata, “Ei pathipalôh heta sypa hmô ta hmô leipa ta, cha hawhta moh hra vei. Tlâh leipa mohôh a ngiahpa a mohôhpa hawhta ei pachâ. A duasu he ngiachhie na ta, ano heta kyhpachâ awpa â phuh hmeiseih. Sasyh ta âtivy a chhuahpa, achhuahna hmeiseihpa a hneipa, chyhsa chhyupa châ ta. Ano liana heta ngâna pahnieh ngâh na ta, kyhpachâ awpa he â phuh ngaita. Keima ta kyhpachâ kawpa ta mohôh leipa aw sala, ahy ta e mohôh hlei aw?” tahpa ta Hruaia cha kyh a pachâ hmeiseih zie a rei.

He hleikhôna heta, a sawnahzy chhao ta Hruaia cha ama paw hawhta ama hmôna zie nata, â palaikhei kawpa ta chyhsa hropa kiah liata chhao ama rei tyhna zie a rei hra.

Henah pano a hnei awpa heta Mizoram charao ta, alykheituhpa ama hluh kaw hra. Kheitarai châ sala, târi 16 April 2019 liana khita, West Saizawh liata ‘Kyhpachâna hmeiseihpa, sapa lâta pachâsana’ eima hmô ha bâ aw. Eimâ lykhei hmeiseih.