Article : CHANÔ PASTOR - Rev Dr Laiu Fachhai

North East India Christian Council Women Assembly Ei 13-na (Maliki, Shillong, 26-28 April 2019) Abeipanoh mydi kari pakhyna liata Rev Dr RL Hnuni (Chanô) ta Abeipa Tlâkhai maniah rai ta, kei (Chapaw Pastor) cha a raituhpa pakha liata ei hlao hra. Ei vaw ly ngaita. Khazohpa Bie maniah a chhopazy ei thôh khei ngaita.

Chanô nata chapaw he Khazohpa ta ano a lyu kakuapa ta maniah a taopa sai châ pi ta, chapaw hlâta chanô a hnai via veih ei. Chavâta chapaw ta Pastor eima châ thei khiata cha chanô chhao ama châ thei hra awpa a châ. Chahnaona (ordination) he hmo phapa a châ khiata cha, cha hmo phapa cha, chanô ama châ vâ hrahro ta chanôzy ta ama to hra awpa kho leipa ta, pakhâ thlâh hapa cha chanôzy châta a pasa ngâsâ thlâh ha.

Khizaw hropa lâ nata Awnanopa py hluhpi liata cha, Khazohpa hmia liata chanô nata chapaw eimâ khozie pahno ei ta, a pyh ei ta, chavâta Pastor kaw châ awpa ta, chanô châna tlyma, chapaw châna tlyma (gender) mo leipa ei ta, Khazohpa awna a daopa, Pastor a châ tlâh awpa a châ ma tahpa moh via ei ta, chanô chhao, chapaw chhao, a tlâh a châpa cha Pastor ama châ thei khai.

Chanô nawh, chanô ama châ vâ hrahro ta Pastor pachâsa leipa cha, biblically, theologically nata from human right perspective chhaota a do vei. Taotuh Khazohpa palôh a tlâh thei na ta chhao a ngia vei.

Mara râh liana he chanô nata chapaw â kho â ngâhpa ta hmaokha ta Pastor eima châ khoh zaolao n’awpa daihti a vaw tlô thei n’awpa ta thlah ei chhâ tyh.