Article : Mara reih Grammar rona thâtih - By A.Zakia, Padmashree Awardee
Mara reih Grammar ei rona thâtih rei awpah ta cha Mara Châhnawh (Alphabet) bâhta pananona nata Mara reih siezie reih tua awpah a byuhpa ta â lâ. Chavâta, Mara reih châhnawh tawhta a thao sih la, eima râh missionary Rev. Reginald Arthur Lorrain ta Mara reih châhnawh miah a taopa kha Pamih 16, 1908 liata papua ta. Châhnawh a taopa hawhrawh :
A AW Y B CH D E H I
K L M N NG O Ô P R
S T U V Z A O Y U
Châhnawh chhâna lâta Ao nata Yu he vowel hawhrawh (Letters) sâno âpakaohpa parozie sâkha a hneipa he (dipthong) a châ tahpa ta miah a chho. He châhnawh a taopa hmâpa heta eima missionary khata, Biehrai nata Hlabu miah taopa ta, châbu hropazy chhao miah a taopa hra.
Kô 1948 liata India sawhkhâ ta eima Mara râh liata Mission siku zy cha vaw la ei ta. Eima Mara bei hluh viapa khotlyna ta eima Mara reih cha thyusai pi ta, Tlaikao reih ta châ eimâ vaw chu haw. Eima Mara reih châ cha Mara Awnanopazy ta Sunday School liata achupa ta ama siekhei lymâ.
Kô 1972 liana khata Mizo District Council cha Union Territory vaw châ ei ta. Keimo Mara PL Regional Council ta a ypa pi kha, District Council vaw châ hra pi ta. Kô 1975 liata cha Elementary School a vao theina biehneina miah vaw pie ei ta. He daihti nota District Council liata eima hyutuhpa nata eima nôpaw a châpazy cha :- Zakhu Hlychho (L), S. Hiatô, S. Vadyu, A.B. Rôma, âmo sahlao he ama châ. Primary School Mara District Council ry liata a vaw y awpah cha eima râh nôpawpazy heta aly ngâsâ ei ta. Kô 1976 tawhta Mara reih ta châ achu awpah ta patohpatiana hnei ei ta.
Kô 1976 liata py (Class) I tawhta a ry lâ Mara reih ta achu ei ta. Kô 1977 liata Class II-na Mara reih ta achu heih ei ta, Kô 1978 liata Class III, Mara reih ta achu ei ta. Kô 1979 liata Siku to liata Class to, Primary School liata cha Mara reih ta amâ chu khai hapa a châ.
Mara reih ta Text Books a palie awpah ta raopa Pachutuhpazy cha – S. Mokia (L), K. Kheito (L), A. Zakia, S. Hrachu (L), K. Chilo (L) âmo sahlao ama châ.
District Council liata eima nôpaw hmiatuapazy khata Literature Committee padua ei ta. Châthaipa nata Officer a châpazy nata Pachutuhpazy manôh (member) ta rao ei ta. Keima chhao ei hlao hra. Kô 1980 liata Literature Committee atyuh pakhy pi ta. Mara châhnawh liata Vowel pakaohpa *‘ie’* pahlaopa châ sala, *‘o’* tahpa *‘au’* tah awpah pahruana y ta, *o* nata *ô* he a reizie thla sih la tahpa pahruana y hra ta. *O* nata *Ô* reizie thla awpah ta paryhsapa ama hluh viapa vâta *O* nata *Ô* reizie ripa cha apyhpa a châ. Châhnawh liata *‘ie’* pahlao awpah ta pahruana chhao apyhpa a châ. Eima Missionary khata *‘i’* tahpa he *‘ie’* ta parosa hra awpah ta miah pachu ta, chavâta a do leipa ta pahno pi ta. Châhnawh liata *‘ie’* he eima pahlao haw.
Châhnawh liata *‘F’* bai awpah ta pahruana y ta. *‘F’* he Awnanopa lâta nôpawpazy ta ama bai chiehpa a châpa vâta reih byuh leipa ta pachâpa a châ.
Mara reih he aony chhâh thôh ta parosapa châ ta. Vowel parosazie â hnai chaipa liata *‘h’* bai lymâpa châ sala tahpa ta pathlupa a châ.
Mara reih liata *‘A’* he reizie chi no hnei pi ta, pakah âpa ta eima reipa a chô khupa châ sala, pakah chhôh liata reizie pakh â leipa he *‘a’* tahpa ta ropa châ sala tahpa a châ.
He Châhnawh taopa nata châ reizie nata rozie thiehpa he Awnanopa lâta nôpawzy ta reipasipasuana ama hneipa vâta joint committee hnei awpah ta Awnanopa lâta Literature Committee member-zy awpa châ hra ei ta. Palôhraohpa ta Châ rozie thiehpa nata reizie thiehpa cha apyh khaipa châ ta. *I.C.M Assembly* liata pangia tua awpah ta paryhsapa a châ.
He châ rozie thiehpa nata reizie thiehpa taopa hawhta châ ro’pa ta, *A. Zakia nata Rev. Hratlu Nôhro* ta *Mara Grammar* châbu tao ei sala tahpa ta pathlupa a châ hra.
Joint Committee bie pathlupa hawhta châ rozie nata reizie thiehpa taopa cha *kô 1982 Tisi khih liata I.C.M Assembly* hneina liata I.C.M Headquarter lâ tawhta vaw pangia ei ta. Châ rozie thiehpa nata reizie thiehpa cha apyhpa a châzie *minute no. 7* liata ropa a châ.
Mara reih châhnawh *Joint Literature Committee* ta a taozie cha he hawhta a Yuâ :
A AW Y B CH D
E F H I K L
M N NG O Ô P
R S T U V Z
Vowel pakaohpa parosazie sâkha ta taopazy (dopthongs) cha hmaohkha ta sopa a châ. Hezy he ama châ.
*Ai, ao, yu, ei, ie, ia, ua*. Châhnawh liata a pahlao leipa ta, anoeih ta ropa ama châ.
*Joint Literature Committee* bie pathlupa hawhta Mara reih Grammar roh awpah ta, Rev. Hratlu Nôhro nata keimo o, Siaha liata a hmô pi ta, Rev. Hratlu chata â mâ thai leizie na chho ta. Ei theina dâh hawhta Mara reih Grammar cha kô 1982 tawhta roh pathao na ta. Rairuna ei tyh tua chaipa cha *I.C.M awnanopa* lâ tawhta Biehrai châbu zy, Hlabu zy bie liata *‘O’* nata *‘Ô’* he a chatliepa ta roh pathi theipa châ vei. *O* nata *Ô* ri lei awpah ta pahruana vaw y ta, *Joint Literature Committee* ta a pyh ta. Châ ei ro chiehpa zydua cha ei roh pathi khai heih.
Rairuna ei tyh heihpa sânona cha chyhsa moh liata *‘h’* bai chakhyh lei awpah, âmo ta ama moh ama rozie hawhta ropa awpah tahpa châ ta. *“Marâh”* tahpa he *Sixth Schedule* liata *“Mara”* tahpa ropa châ ha ta *“Mara”* liata *‘h’* bai leipa ta bâh vaw roh mah y tahpa a châ heih.
Mongyuh (English) reih liata *“and”* tahpa he *“nahta”* tahpa ta roh leipa ta, *“nata”* ama tah tyhpa he angiapâ sih la, English ta *“with”* ama tahpa he *“nahta”* Tlaikao reih ta, *“nen”* *“nahta”* châ sala tahpa a châ heih. Khih moh chhao Sawhkhâ ta â pyh chiehpa cha *‘Siahhâh’* châ leipa sala, *‘Siaha’* tlâ châ sala tahpa pahruana vaw y heih ta. Châbu ro chiehpa ei hluhpi ro pathipa a châ.
Kô 1982 liata Mara reih Grammar ro pathaopa kha kô 1990 liata patlôpa châ ta. Zawpi ta rei theipa a châ leipa vâta Mara reih Grammar ei taopa, reih ta moh pasia awpah ta *Joint Literature Committee ta NT. Vakaw, Education Officer, MADC, Siaha, S. Ngiahu (L), Lecturer, Siaha College, Rev. NC. Vabeilua, Executive Secretary, ECM, Siaha* zy raopa ama châ. Âmo ta, *“A pha ngâsâ”* tah ei ta. *“Chhuh tlâh a châ”* tahpa ta reih ei ta, Mara Autonomous District Council liata nôpawpazy amâ thla tyhpa vâta nata phusâzy ryhpaohna a y thai leipa vâta chhuh leipa ta, Mara reih Grammar cha ei paso ngâthlâh ha chy.
Puhpa S. Khipô, CEM nata Puhpa S. Vadyu, EM, MADC cha District Council liata nôpawpa vaw châ heih ei ta. Mara reih Grammar chhuh leipa ta a y thlâh hapa cha pahno ei ta. *“ECM Printing Press liata vaw pachhuhsa la, District Council ta a chhuhna mâ eimâ tôh aw”* tah ei ta. Kô 1994 liata Mara reih Grammar, 1st Edition cha papuapa a châ. Mara sawzy ta eima châ rozie alyu khai thei n’awpa ta, District Council lâ tawhta S. Khipô CEM nata S. Vadyu EM ta châbu biehmiapa roh ei ta. Revd. N.C. Vabeilua, Executive Secretary, ECM, Siaha ta Châbu biehmiapa a roh hra. Keima Grammar arohtuhpa chhao biehmiapa liata â do leipa nata pachâna do viapa a pahnopazy eina chho awpah ei ta, ahawna taopa ta ei roh hra.
Kô 16 a khô tawhta Mara Literature Seminar hneina liata Châhnawh rozie panano awpah a khohpa y ei ta, a hluhna lâ nuby (Numerals) reizie a panano khohpa y ei ta. Ama panano khohna dâh, seminar heihpa liata ropa ta pangia chyu awpah ta bie a pie pi ta. Seminar eima hnei heih daihti liata ama khozie ama vaw pangia chyupa cha pachâ pahmaohna hnei pi ta. *“A. Zakia ta Mara reih Grammar a taopa, 1st Edition 1994 liata a puapa kha a pha chai. Ama vaw pahruana a thiehpa he pha via vei,”* ama tah haw.
Kô 2012 liata Mara Grammar cha ro pathina (Revised) tao na ta. Ama chhuh chheipazy pado na ta. Bie â ki leipa ta ei pahnopazy baichhi na ta. Vowel parosazie â hnai chaipa liata , *‘h’* bai pado leipazy pado na ta. Mara Grammar Châbu 2nd Edition (ei nona) cha kô 2012 liata ei vaw papua heih. *Kô 1994 liata Mara reih Grammar, 1st Edition Copy Right kha keima arohtuhpa ta hnei na ta. Kô 2012 liata a puapa Mara Grammar 2nd Edition he cha a papuatuhpa Mara Autonomous District Council , Siaha ta Copy Right ama hnei haw.* Achhâpa cha thanai-zônaina na pie ei ta. Copy right eina hiah ei.
Chavâta copy right ei pie ha ei. He Grammar 2nd Edition liata biehmiapa arohtuhpazy cha – 1) N. Zakhai, CEM, MADC, Siaha 2) Awnanopa lâta Rev. V.L. Ngaia Hlychho, Executive Secretary, 3) CCIM lâ tawhta Rev. A. Beirakaw, General Secretary, Saikao zy ama châ. Keima chhao ei roh hra.
Kô 2016 liata Lialai khih, Myanmar lâ tawhta châ paphaopa hmô na ta, *“Myanmar sawhkhâ ta Mara reih châ achu awpah ta miah Pasai ta. Keima chhao pachutuhpa ta na rao ei ta. Mara reih châhnawh pachu n’awpa ta a reizie thai leipa na ta, châ reizie liata aony pahnai n’awpa nata pasâh n’awpa ta tao thai leipa na ta. Châ ropa ta na chho thei la, ei châ ly kaw aw”* tahpa a châ. He châ paphaopa heta ei palôh na hria kaw ta. Mara Grammar 2nd Edition 2012 liata a puapa paphao na ta. Mara Grammar 1st Edition 1994 nata 2nd Edition 2012 a puapa liana khata Châhnawh achuna dâh y leipa ta, Mara reih aony pahnaipa nata pasâh dâh a thei beih leipa châta cha vowel â hnai chaipa liata ‘h’ bai awpah a châ tah thlâh hapa heta Mara reih aony parosazie a reih pasia khai thei leipa ta pahno na ta. Thata Mara Grammar ei ro chiehpazy sai pakhua heih na ta. Mara châhnawh (Alphabet) reizie (achu n’awpa zie) nata Mara reih aony pahnaipa nata pasâhpa ta reizie roh awpah he a byuhpa ta ei pahno haw. Mara reih aony pahnaipa nata pasâhpa reizie solfa modulator ta palâsa awpah ta ei palôh liata a vaw lâ ta. Mara Grammar roh chanei awpah ta ei palôh liata a vaw pua haw.
Kô 2017 liata ‘Mara Grammar Book 2-na’ tahpa roh heih na ta. Aony pahnaipa nata pasâhpa cha *d.r.m,* pamosana ta hmâh na ta. Mohchho khahlâta a chhâna liata ‘h’ bai beih leipazy chhao a châna a vaw lâ pasia ta. Mohchho a chhâna liata ‘h’ bai awpah hluhpi a vaw pua chhi via haw. Chavâta Mara Grammar Book 2-na cha ei patlô khai nahta khizaw ta ama pahno thei n’awpa ta, ISBN : 978-81-287-0038-5 SCIETIFIC BOOK CENTRE, Guwahati Assam liata ei pachhuhsa. He Grammar Book 2-na he cha a rohtuhpa copy right a châ. Mara Grammar, kha a vaw chu pasia chyu u la, Mara reih â dopa ta roh thei chyu awpah ta achhuah chyu suh vy. He ‘Mara Grammar Book 2 –na’ ei thôhna (3rd Edition) a châ. Châbu papuapa copies a chyhta zapangawh (500) deita a châpa vâta M.A.D.C ta chalei khai ha ei ta. Chyhsa zawpi ta nama chalei awpah y khao vei. Eima hronazy ta â kaw pha chy khiahta la châbu a hluh via pachhuhsa awpah a byuh kawpa ta ei pahno. Eima Khazohpa rei sai châ mawh sy.
EI CHÂ LY KAW EI.
No comments