Premier League : Liverpool chhaopa ta Manchester City ta nyungiapa ama chalo haw!

Manchester City ta Premier League nyungiapa pabohsapa ta, âmo a chadaipa ta ama thlah khâ pazohtuhpa Liverpool deikua kô 1991 tawhta ama vaw hâ tyhpa, League nyungiapa chalo thei khao heih vei vei.

Pep Guardiola nata a nawhta zy heta zâhnia zâ ta akhaihna ama pathao hlâ tawhta, 'draw' tlyma 'tlô leipa tlyma' duasu liata amâ duah awpa pathaih vei, tahpa nata, kô 10 a khô hapa liata Manchester United ta EPL Cup nyungiapa â zaopa ta ama la tawhta, ahy hmahta la thei khao mâh vei ei, âmo cha pahniena ama to khiahta cha United tao theipa ama tao thei hra aw, tahpa ama pahno. Liverpool ta Anfield liata Wolves ama pahnie nata pahnie leipa hlâta, City heta tlô cheingei ta, chihuna y leipa ta nyungiapa chalo awpa cha amâ chhuah chaipa a châ cheingei aw.

MAN CITY THLAHZOHNA

Akhaihna pathaopa chá ta, 1st Half minute 27-na liata Glenn Murray-ta Seagulls châta corner tawhta ball avypa cha a luh ta a za su pangia haw, Sussex liata Man City fans zy châta thlahzohna nata chihuna thlihpi pathli ta; Anfield liata kô 29 khôlâ ta a eikha nawpa ta Liverpool ta nyungiapa a chalo bâ hraw khiah maw tahpa hnabeiseihna â kaw sâh hai hra.

He Brighton ta hmia ama sahna goal ama za pangiapa, Manchester City ta amâ zâ chhypaliena dâh deikua chatlie ta, ngiachhiena rai a hlao vei!

Brighton ta goal ama za khô tawhta second 80 chhôhta Sergio Aguero a zâ pasupã ha ta, 2nd half hlâta liata Aymeric Laporte ta City hmia a sahna a za khôpâ ha heih.

Brighton châta apielyuna y khao leipa ta, Sussex khihpi liata Man City amâ tlieh hmeiseihpa cha, Anfield lâ taihta ziazi ama parohsa khai ha! Riyad Mahrez nata Ilkay Gundogan ta za khô chhi via heihpa ta, 4-1 ta pahniena ama to hapa a chã.

Premier League nyungiapa chalo ha ei ta; târi 18 May liata Watford nahta FA Cup final amâ khaih heih aw.

LIVERPOOL AMA TLÔ TARAW..

Anfield liata Liverpool ta Wolves cha 2-0 ta vaw pahnie hra ei sala, Manchester City ta 4-1 ta Brighton ama pahniepa vâta atakô cha Premier League nyungiapa chalo khao heih mâh vei ei.

Season pathao tua no tawhta achhâna noh taihta hmia asahtuhpa ei hluhpi kaw chã lymâ ei ta, atahmâ Season cha ama Champion cheingei bâ thlyu aw, tahpa ta eima sai nota, Season chhâ ta, Point 1 amâ vâdua ha heih!

Châhrasala, Europe râhhlypi liata nyungiapa pasô a hlao chaipa - UEFA Champions League Final amâ ngiapa vâta deikua thaphana bieru ama hnei pyly hra tlai aw.