Siaha DC ta Lorrain English School tly

Siaha, 17 May : Zâhnia târi 16 May 2019 zâlâ dawh 1:00Pm khata Siaha DC, Puhpa Bhupesh Chaudhary, IAS chata Siaha liata achuna-O alâluahpa hrytapa, Lorrain English School, College Vaih, Siaha tlypa ta, Class VII & VIII achuhaipa hawti apôhpakhypazy hmiakô liata Power Point Presentation hmâpa ta, nohthlah a ngia kawpazy pamosapâpa ta pasyuna bie pha kawpa reina a hnei.

Achuhaipa hawtizy nahta hiahrihna nata achhyna daihti zy hmâpa châ ta, thapha kawpa ta apakyhna daihti ama hmâkhoh. Achuhaipa hawtipazy nahta daihti ama hmâ khai tawhna heta, LES Principal, Pihnô H.Zoramthangi, Office Chamber liata Pachutuhpazy nata apakyhna daihti ama hmâ heih.

Puhpa Bhupesh chata Pachutuhpazy cha ama rai cha sawhkhâ rai chakhyhpa hawhta pachâ leipa ta, ama chyhsalâhpazy lâta chakaona rai hawhta khâchâ pachâ awpa ta bie a ta ei. Ama pachu haipa hawtipazy hmialâ daihti châta lâhaw chhawhtuhpa châ ei ta, nohchareihta a pathiehpahlâ ngâthlâh ha awpa nata English Medium School a châna hawhta English hmâh hnolo awpa nata, ama Subject nochâchyu cha â pahniah kawpa ta thai awpa ta bie a ta hra ei.

Lorrain English School he kô 1999 liana khata ECM Awnanopa ta padua ta, kô 2008 liana khata MADC ry liata â ngiapa ta, atahmâ duasu liata KG-I tawhta CLASS VIII taihta achuna y ta; Pachutuhpa 27 nata achuhaipa 627 ama y hai.

Puhpa Bhupesh Chaudhary, IAS Siaha DC he Puhpa H.Zonunmawia, DEO, Siaha, Puhpa N.Vabeiratlua, DIPRO nata Puhpa L.Duhkima, DDPC, SSA Mission, Siaha zy ta ama chakaochahlâ.