Osama bin Laden sawchapaw Hamza bin Laden a thi - Report

Al Qaeda riahrupa py, USA pheisaihzy ta ama thie hapa, Osama bin Laden sawchapaw, Hamza bin Laden, cha a thi ha, tahpa USA thâtihthiehpa phuahtuhpa, NBC News chata Pakhynoh khata ama phuah.

NBC chata he Report he US sawhkhâ chyhsa pathôhzy tawhta bie ama daopa tahpa reihpa ta, âmo heta United States chata ‘Intelligent’-zy tawhta bie ama daona dâh liata Osama bin Laden sawchapaw nata a paw duasu a kaw thla thei awpa hawhta pachâ haipa Hamza bin Laden cha, a thi ha, ama tahpa ama rei. Hamza bin Laden he USA sawhkhâ chata atakô Hmypi thlâpâ liana khata a luh mâ châta $1 million ama vaw pataih hapa kha a châ.

He hawhta thâtihthiehpa a y nona heta, USA heta Hamza he a thi tlai, tahpa ama pasiana deikua y mâh leipa ta. He US sawhkhâ chyhsa pathôhpazy heta Hamza bin Laden thina su nata, he a thina liana heta USA ta a hlaohlina a hnei ma, tahpa chhao reih vei ei, tahpa NBC chata a palâsa hra.

Hamza he kô 2018 khata zawpi mohmô liata Al Qaeda website siepahliepa ta avaw luah ta, he liana heta Saudi Arabia cha chyhu sathlupa ta, Arab râh liata a ypazy cha adyuhna papua awpa ta a pasyu ei. He he Hamza hmi ama hmô hnôh chaina a châ hra.

Kô 2011 liata Abbotabad, Pakistan liata US Navy SEALS zy ta Osama bin Laden ama thie nona khata, a sawchapaw Hamza he a râpapua hmâ ha ta, a unawhpa Khalid deikua a paw raohpa ta ama thi ha hra.

Hamza, kô 29 ta uhtheipa he, Osama bin Laden ta a lahpinô pathôh hryta pakha - Khairiah Sabar, Saudi Arabia chôta a sapa châ ta. Ano he kô 2007 liata Pakistan Prime Minister parohpa, Benazir Bhutto thina kyh liata a hniahnipa hawhta pachâpa a châ hleikhôta, kô 2016 liana khata USA cha a paw thina chôchâh liata phuh a la aw, tahpa ta biesakâ a vaw vaw ha heihpa kha a châ.