US President atlyh patlohpa Joe Biden lapangia tita US State 50 liata buana a pua ma?

US râh chhôh liata State 50 nata District of Columbia (DC) –zy cha târi 20, Nawh 2021 liata US President atlyh patlohpa Joe Biden alypangiana (Inauguration) ama hnei tita buana a tlô thei awpa tawhta liahsa amâ pachyhparyh pathao lymâ haw. 

National Guard pheisaih sahlaozy cha hâta hmiatuapa liata Trump achâhtuhpazy ta buana ama papuana su Washington DC, liata liahsa yhmo paryh ha ei ta; kha hawhpa buana a tlô chanei khao leina awpa ta liahsa amâ mâ ha bâ. 

FBI chata President atlyhpa patlohpa Joe Biden lapangiana daihti liata US râh chhôh state 50 zy liata tharô hmâna a tlô thei aw, tahpa ta biesakâ ama vaw vaw hapa kha a châ. 

He hawhta a châ nona heta, Joe Biden chhihthana ry liata US sawhkhâ thiehpa vaw y awpa chata Trump hmahlana (Policy) nano nanopazy panano awpa ta achhuahnohna ama siekhei hai hra.

Joe Biden ta White House â ngia tawhta Trump hmahlana nano nanopa a panano awpazy chhao liahsa ama pachhuahpanoh hapa hawhta US Media zy chata ama palâsa hra. Biden ta Trump hmahlana a y haipa a panano awpa ta pangiasapa thokhazy cha :

 -          Khizaw nohkhih ytuzie anano lymâpa adyuhna châta ‘Carbon papuapa’ pachyhsa via awpa ta aryhna ‘Paris climate agreement’ liata US â hlao heih aw.

-          Muslim râh thokha khitlyna kyh liata Trump ta pakhâna a vaw tao hapazy cha mopathipa a châ aw.

-          Sawhkhâ su peimawhpa nata, US râh chhôh khitlyna zy liata hmiapahlyna (Mask) a ky cheingei awpa ta biepiepa a papua aw.

-          He hleikhôta, râh hropa tawhta US lâta apaihna dâh chhao â huatlâ viapa ta a tao na ta pangiasapa a châ. 

Pakhynohta Biden lapangiana vaw y awpa liata Washington DC su hluh viapazy cha ‘khawhlôhpa (Lock down)-pa châ ha ta, National Guard pheisaihzy chhao ama y khai ha hra.

Târi 6, Nawh 2021 liata buana tlôna nata zawpi a pielyu viana lâlai (Street)-zy cha alô diahpai nata thua diahpai ta dôh hapa châ ta.

National Mall, US President lapangiana daihti liata zawpi hluhpi ta ama tly tyhpa chhao US Secret Service-zy ahawna hawhta khawpa a châ ha hra.

Joe Biden sawhkhâ liata a ypa py (team)-zy chata America chyhsazy cha President lapangiana daihti liata khitly leipa ta, Potlana (Covid-19) tawhta apabohsa awpa ta ahaw ha ei ta;  biehneituhpazy chhao ta President lapangiana cha O tawhta tlâ moh awpa ta ahawna ama tao hra.

- BBC