US ryureina Opi ta Donald Trump a 'IMPEACH' haw!

US House of Representatives chata US President Donald Trump cha hâta hmiatuapa liata Washington DC liata ryureina Opi pabuana/tlahnaona ky liata 'A biehneina hmâ chheipa' hawhta ama bai (Impeach) haw. He Donald Trump 'Impeach'-pa a châ theina awpa ta Vote la nona heta Republicans mo nata sa 10 zy ta Democrats a châhkheipa ta vote 232-197 ta Trump cha biehneina hmâchheipa ta biebuapa/baipa a châ haw.

Trump he US thâtih liata Congress ta ei no tlai ama 'impeach'-pa a y chhôhpa a châ ha hra.

Heta a châ hapa vâna heta Trump he Senate hmiakô liata a chôchâh pachiapa châ aw ta; thailei pachâsa a châ tlai khiahta cha a hro chhôhta US President châ thei khao beih aw vei. Châhrasala, thailei a vaw châ hapa ta a châpa chhaota a Term chhâ tawhta hâta ei kha chhôh, Senate amâ tyuhpahmaoh hlâ via cha White House a tlôh thei chy aw.

President Trump he târi 20 Nawh ta a term chhâ aw ta, White House a puasaipâ ha hra awpa châ ta. Zâkô Phiapi US Atlyhna liata a tlôhpa Democrat Joe Biden ta â thla aw.

Democratic-biehneina ry liata a ypa US ryureina Opi liata Pakhynoh khata Trump Impeach awpa kyh he daihti vâropi tlai pachiapa châ ta. He ama pachia chhôh zydua heta National Guard pheisaihzy ta Capitol he a chhôh nata khôtho lâta ama vaih khai ha hra.

FBI chata hâta heihpa liata Joe Biden, US President châta lapangiapa a châ tita Washington DC nata US State 50 khihpi zy liata buana a tlô thei awpa hawhta biesakâ ama vaw ha hra.