Covid-19 mona châta RAgt he ngâtlâh a châ; sawhkhâ ta a hmâh lymâ chy aw

Aizawl: Mizoram sawhkhâ ta Covid-19 positive hmôpapuana châta a hmâpa Rapid Antigen Test (RAgT) cha ngâtlâhpa ta pachâpa ta, hmâh pazao lymâ awpa amâ chhuah.

Mizoram thâtihbu miakha ta IDSP State Nodal Officer Dr. Pachuau Lalmalsawma tawhta bie ama daona dâh liata Rapid Antigen Test (RAgT) liata positive hmôpa cha â do tahpa reihpa ta, "Rapid Antigen Test (RAgT) heta positive he zakha liata zakha daihmâ a hmôpa pado ta, negative liata cha hmôchhei/hla tlamawpa deikua a y thei. He he achhâpa cha pasana hri â vaw taopapuana daihti (incubation period) liata hmô leipa (negative) y thei ta, he hawhpa he cha kheihawhpa khaw (machine) liata chhao rai a y thei," a tah. Chyhsa thokha ta kahraosaohpa nata chasipa nata pasana hropazy cha RAgT heta positive hawhta a hmô tahpa ta ama reina kyh liata, ama test-na cha ngâtlâh a châ tahpa reihpa ta, "Khahlâta eima hmâ tyhpa Antibody liana khata cha pasana hmô pakaoh thei ta, châhrasala Antigen deikua he cha a eihpa (specific) a châpa vâta ngâtlâh a châ," a tah hra. RAgT cha atliata TNT nata TBCC liata a ypazy ama test-na liata chhao ngâtlâh a châpa ta a pahnonazie reihpa ta, "Thutak Nunpuitu Team (TNT) nata Tawngtai Bethel Camping Centre (TBCC) liata eima test-na liata chhaichhi miakhapa hleikhôta hriatuhpazy chhao miakha châ ei ta, hezy liana heta false positive a y leipa ta eima pahno," a tah hra.

Dr. Pachuau Sawma chata Covid-19 cha RP-PCR liata test khai awpa ta cha a buabâ pâ thei aw tahpa ta, "RT-PCR liata cha Microbiologist zy ta ama test awpa a ngiah ta, he hawh awpa ta cha su a hla viapa Siaha nata a hropazy châta buabâ ta. Châhrasala RAgT liata cha Laboratory Technician zy ta test thei khai ei ta, byhnâ tlao a châ via," a tah hra.

Atahmâhlâ ta hri a kiahpa ama chyh via thei leina chhâpa cha hri a chahra nota a châpa vâta a châpa ta a pahnonazie reihpa ta, Dr. Pachuau Lalmalsawma chata, "Atahmâ ta hri charei haipa he zâkô lâtahpa Wuhan strain kha châ leipa ta, delta strain châ ta. He hlâta hri a paka nao viapa delta plus strain chhao a y ha bâ thlyu na eima tah. Asohsi kawpa ta khihsa ei sihla, chyhsatota hmiapahlyna he a pahlypa ta, hri tawhna heta eimâ boh aw," a tah hra.

- Zalen