Article : Delhi Sawhkhâ ta Delhi liata Achuna (Education system) a taopathina dâh

Kô 2015 Delhi Atlyhna liata *Aam Aadmi Party  (AAP)* khata â chieh kawpa ta pahniena ama topa kha châ ta. Kô 2015 Atlyh hlâta AAP ta bie amâ taihpa hryta peimawh kawpa miakha cha, Dehli khihpi (UT) ôna chhôh liata sawhkhâ Siku siekheizie taopathi, panano awpa ta rai ama hria aw, tahpa bietaina kha a châ. He ama bietaina he atahmâ ta sawhkhâ sikuzy duasu saipa ta cha a hlaotloh kaw tah thei awpa a châ ha bâ. ‘Achuna eima pachâ peimawh tua chai aw’, tahpa ta sawhkhâna a siekheipa AAP Hmahlana nata achhuahna chata Delhi khihpi achuna siekheizie liata thathyuna thiehpa sapapuapa ta, Delhi sawhkhâ sikuzy cha â lâ theipa tlaita amâ kaw sua lymâ haw.

He AAP sawhkhâ, CM Arvind Kejriwal nata Deputy CM Manish Sisodia, Education Minister châna patutuhpazy ta ama chhihthapa heta, achuna hmahpasiesana châta sôh hluh chaipa soh ei ta, Pachutuhpazy ta achuhaipazy ama pachuna kyh liata hmahsie viana a y theina awpa ta _Teacher Training Course_ thiehpazy Padua ei ta, Siku O nata chhaichhi taopathina nata, hmahsie viana châta sôh hluhpi ama soh hra. He hawhta hmah ama vaw lapa cha, hmô theipa ta Delhi liata sawhkhâ sikuzy amâ kaw nano lymâ haw. 

Pamosana sâkha châta, Delhi sawhkhâ Siku sâkha, *Rajkiya Pratibha Vikas Vidyalaya (RPVV)*, Dwarka liatahpa cha kô 2019 liana khata India râh liata sawhkhâ Siku pha chaipa liata a kaw luah  ta, Delhi sawhkhâ Siku hropa 2 cha Top 10 liata amâ hlao hra.

Delhi sawhkhâ heta kheita ma hmah a la ha tly? He a ry liata palâsapazy he Delhi AAP Sawhkhâ ta achuna taopathi awpa hmah a lana tlâhpipazy cha a châ :

EDUCATION CHÂTA SÔH HLUH VIAPA

AAP sawhkhâ heta achuna nata sawhkhâ Siku O zy taopathi, sapathi, tobi pathi awpa cha ama tao awpa hmiatua chaipa liata soh ei ta. Kô 2015 tawhna khata, the AAP sawhkhâ heta achuna kyh nahta ahniahnipa Hmahlana liata sôh a hluh thei chaina hawhta a soh ta. Kô 2015-16 liana khata Rs 6,208 crores cha 'school & higher education sector' châta a vaw soh. Kô 2016-17 Annual Budget liata, achuna châta sôh ama sopa cha pahluh via heihpa ta, Rs 8,642 crore ama soh heih. Kô 2017-18, liana khata Kejriwal sawhkhâ heta achuna châta Rs 9,888 crores hmâh ta, kô 2018-19 liana khata Rs 11,201 crores (revised) a kaw châ ha heih. Kô 2019-20, liata chhochhi cha Rs 15,133 crores (budgeted) a kaw châ ha.

He _education sector_ liata sôh sopa ama papôhpazy he siku-O chy kaw bâpa sapathina nata, Siku o ta â ngiahpa hmo taona nata Hmahlana châtazy, Pachutuhpazy achuna siekheizie (teacher-training system) taopathina nata, achuhaipazy châta achuna kyh liata hmahsiekheina hmotao (students learning programmes)-na châtazy hmâpa châ ta. He liata eima pahno awpa cha, kô 2015 liata AAP ama vaw sawhkhâ nona khata, Delhi liata sawhkhâ sikuzy duasu cha chhie ngaita ta, khihsa riethei viapa hluh viapazy chhao chata Delhi sawhkhâ Siku hlâta, Mopakha Siku (Private) Siku liata sôh ama hnei leina chôta ama sawnah kha ama pakiasa lymâ ha bâpa kha a châ. He kyh liana tlai heta sawhkhâ Siku taopathi awpa ta bie ataihpa, AAP he Zawpi ta ama khona chhâpa miakha cha a châ hrapa a châ. 

Delhi sawhkhâ sikuzy taopathina kyh liana heta, athaipa, *Atishi Marlena, Rhodes scholar* , Manish Sisodia, deputy chief minister of Delhi ry liata a hriapa cha a peimawh ngaita. Sawhkhâ chata achuna taopathina kyh liata bietluna phapa maih liata bietluna tao para lymâ ei ta. Pamosana châta, Education Sector châta sôh hluh viapa sopa hleikhôta, Directorate of Education chata atahmâhlâ chaipa chhaichhi nata achuna HMO yna, Siku O 21 a thiehpa ta ama sa. 

Sawhkhâ sikuzy cha amâ ngiahpa, atahmâhlâ chaipa achuna chhaichhi (modern facilities), SMART classroom nata, achuna/achuhaipazy ta achuna ama pahâh via theina awpa ta _e-modules_ zy ama pie lymâ.  

Siku liata achuhaipa hawtipa chanô nata chapawzy châta ti do awpa y khai ta, chanô nata chapaw châta Ie O y ta, dôhlatha lana (electricity connection) y ta, Siku 88.82% Computer Facility ama hnei khai hra.

AAP Sawhkhâ Hmahlana peimawh kawpa sâkha heih cha, _Teacher Training_ kyh liata a châ. Kô 2017 liana khata Delhi sawhkhâ heta Delhi khihpi chhôh zydua liata Pachutuhpazy châta apatiahna, apatohtiana pha kawpa, su hro lâta ama tao leipa vaw siekhei ta. State Council for Education Research & Training (SCERT) chata Sawhkhâ Siku liata Pachutuhpa 36,000 - ama hryta 26,000 zy he Trained Graduate Teachers (TGTs) nata 10,000 zy he Post Graduate Teachers (PGTs) zy châta achuhaipazy ama pachuna kyh liata a pha viapa nata, hmahsie viapa ta pachudâh thai awpa ta apatohpatiana/apatiahna siekhei ta. He hmo he atahmâhlâ chaipa ta achuna O Paduapa, tobipa a châ hapa vâta nata, achuna siekhei n'awpazie chhao cha cha hawhpa hmahsiena nahta â hmiepa ta siekhei a châ theina awpa ta tahpa cha, palôh liata a vao thlâh hana chôta apatiahna siekhei ei ta; he Pachutuhpazy apatohpatiana he sahlao/phu (Group)-ta siekheipa ta, he hawhta amâ chupa heta, Siku liata ama pachu hmeiseih tita he liata amâ pachuna dâh he ama hmâh phahnai thei aw tahpa cha amâ chhuahpa vâta a châ.

Delhi sawkhâ sikuzy liata Achuna phapa (Quality education) a theina awpa ta nata, Pachutuhpazy ta châ ama pachuna liata novâhna a pathuh viapa ama hnei theina awpa ta, AAP sawhkhâ heta *Teacher’s Training Programme* a siekhei heih. He Training ta â chhuah chaipa cha Pachutuhpazy cha ama Subject chyu liata atahmâhlâ hmo nahta â hmienazie ta pachudâh ama thai thei n'awpa ta châ ta. Kô 2018 liana khata, Pachutuhpa 200-zy ta *Educator* pha chaipa - National Institute of Education (NIE) ry liata Training pahneisa ei ta. He Pachutuhpa 200 zy he Training ama patlô tawhta, ‘mentor teachers.’ tahpa châ ei ta. Henahzy he Siku 5/6 zy cha chiepadâh leipa ta tly awpa ta sopa châ ei ta, Siku ama kei tlypazy liata achuna siekheina kyh liata achupasiana, mopasiana achakhiehcharieh kawpa ta kei hnei ei ta, Siku ama tlypazy liata Pachutuhpazy cha a su liata pachuna dâh ama pachu pachhuah heih hra.

Achuna duasu taopathi awpa ta ama hmahlana miakha peimawh kaw heihpa cha, achuhaipazy duasu dopa, ama chhichâna dopa pahno awpa ta hmah ama lapa cha a châ. Achupasiana liata achuhaipa hryta châ rei parusa kawpa ama hluh tahpa nata, Siku O liata châ ama pachupa pahnothai thei leipa, pachu rairu kawpa ama y chilih tahpa pahnopa a châpa vâta, he kyh liata Hmahlana ‘Chunauti’ cha kô 2016  liana khata siekhei ta, Siku a bâhpazy pachá peimawhna chôta nata, Siku hawti a thai thei lei viapazy pachâ peimawhna chôta he Hmahlana ama siekhei. Amâ chhuahpa cha Upper Primary Class liata achuhaipazy cha châ rei, ro nata hisâna thabypa (read, write and do basic mathematics) pathaisa awpa he a châ.

AAP Hmahlana he hluh kaw ta, a zydua ta palâsa tiah awpa châ vei. He zie rakha he Mara reihta, a siahlia lei kawpa ta eima palâsa theipa cha a châ.

KEJRIWALJI chhihthapa, Delhi AAP sawhkhâ he nota vaw châ tlai vei.

- Robert B.Syuhlô, Admin