Mizoram : Kô 2020 chhôhta chanô hlâta chapaw ama thi hluh via

 

Zâkô 2020 chhôh khata Mizoram chhôh liata hawsaih a pihpa hryta chapaw hluh via ei ta, he hawhta a châ nona heta a thipa hryta chapaw ama hluh via hra.

Economics & Statistics Department-ta atliata a papuapa, ‘Annual report of Registration of Births & Deaths Mizoram, 2020’ liata a palâsana dâhta kô 2020 chhôh khata Mizoram liata hawsaih a pihpa 23,320 y ei ta, he hryta 11,934 cha chapaw châ ei ta, chanô 11,386 ama y hra. Zâkô chhôhta hawsaih a pihpa hryta 17,048 he thohna-O liata a pihpa châ ei ta, a hropazy he O nata su ryhpaohpa hropa liata a pihpazy ama châ. Zâkô ta Mizoram birth rate he 17.28% he a châ.

Ama ngiana liata â lâna dâhta zâkô chhôh pyly khata Mizoram liata athihpa 6,703 y ei ta, he hryta 4,266 he chapaw châ ei ta, chanô a thipa 2,437 ama y hra. Chanô hlâta chapaw athipa ama hluh viana zie he 1,829 châ ta. Athihpa zydua tawhta reipatipa ta chanô hlâta chapaw a thipa ama hluh viana he 63.64% a tloh. Zâkô chhôh pyly khata hawsaih thipa (kô 1 ry lâ) chyhsa 384 y ei ta, hawsaih thipa hryta 204 he chapaw châ ei ta, chanô 180 ama châ. Zâkô chhôhta Mizoram liata death rate cha 4.97% a châ.

Hawsaihpa thina (Infant Mortality Rate)-liata kô pachhuahpa hlâta zâkô kha a sâh via ta. IMR he kô 2016-liata 12.66%, 2017-liata 17.35%, 2018-liata 14.48%, 2019-liata 13.31% châpa ta, kô 2020 liata 16.47% a châ. IMR he India râh pôhpalôhpa tawhta reipatipa (national average) hlâta Mizoram he â hnai via. Zâkô chhôh khata hawsaih a thi chiehpa ta a pihpa (still birth) 156 ama y hra.

Economics & Statistics Department reipatina dâhta October 1, 2020-liata Mizoram zawpi maluh zie awpa cha 13,49,349 a châ.

Kô 2019 hlâta kô 2020 liata birth rate â hnai via.

Zâkô chhôh khata Aizawl district-liata hawsaih a pihpa hluh chai ei ta, hawsaih pihpa 8,795 y ei ta, Hnahthial district-liata chyh chai ei ta, 313 ama y.

Zâkô chhôh khata Hnahthial district-liata athipa chyh chai ei ta, athipa 138 y ei ta, Aizawl district cha cha athipa hluh chaina châpa ta, athipa 3,124 ama y.