THE 3 IDIOTS

- Robert B.Syuhlo, Siaha

Taotuhpa heta, a taopa khizaw liata apahrâpazy he kyhpachâ ta, khâsia ta, ama phana awpa ta ngiana nata hmo yzie hneipa hmâpa ta biesakâ miah vawh tyh, tahpa he chyhsa hluhpi châta eima chhôhkhaihna zie châ hra vei sala, ado ta, hmôchhei thai’pa châ vei. Khizaw ziza chahâ ta, buhchâh chô liata pheiliah hai ta, khizaw ta asapapuapa hmo hmâpa ta atobi ta laiseihpazy pi he eima palôh phaozie, eima hrozie nata eima khihsazie âvaw lyu lei kaw tyh.

Atahmâhlâ khizaw ta cha, abyuhna nata ângiahna lia maihta chyhsa phei thabyh liata abôh thei thlâh hapa zy, sasyh athôhna a châ awpa a châ khiahta cha thlahchhie khaomâ chhao rao leipa ta dua nata hno taihta a hy khoh thlâh hapa zy nata, piehpieh aohraoh kawpa ta khohlei akhohpazy, sôh nata thih, hriapasana tawhta ama hmôpa châ hlei leipa pahaopalyu thei kawpa zy he chyhsa sopa, Awnanopa nata khihtlâh liata nôpaw duasu atotlâh châpa ta eima pahnopa ama châ tyh. He hawhpa panuana tawhta chyhsapa he eima thlie ha tyhpa vâta ma a châ ha ma? Chyhsa ngâchhihpa, adona nata riahphana dopa ahneipa zy cha ahrupa nata palôh hneileipa hawhta eima papua ha tyh.

He ary liata chyhsa 3 thâtih eima rei awpazy chhao he, ‘Khizaw pachâ ta cha, ahrupa 3 ‘The 3 Idiots’ tah thei awpa tlai ama châ. Châhrasala, henah sahlao he, taotuhpa ta khizaw ta lâdopa a tly heih thei n’awpa ta chhaolei apatlysapa zy tah leithei awpa vaw châ vei ei.

Mahatma Gandhi

Primary Siku âchu nota, Biehneituhpazy ta ama siku vaw tly ei ta. Cha liana chata ‘Kettle’ tahpa biesâ sâkha parosa ei ta, roh thai leipa ta. Ama Pachutuhpa ta a viasazy amopâ awpa ta chho ta; châhrasala, chyhsa a mopâpa ta roh awpa hlâta cha a thaileina dâhta hawhta ypa cha tlao â tlyh haw. He chyhsa, târi noh 2, Phiata, kô 1869 liata Porbandar, Rajkot, Gujarat liata vaw pihpa he ahy hropa châ leipa ta “India Phopi Paw” Mahatma Gandhi tlai kha na a châ. A paw cha Rajkot liata molaipa, ‘Prime Minister’ châ ta.Mahnô-mahpaw no tawhta chyhsa hneirôhpa nata apietheipa ama châ. Khâpa hropa pachâ hleileipa nata lôhrina hnei hleileipa ta a hawti via no daihti cha pakhôhsa ta. Kô 1888 liata kha no rachhôhta India râh avaotuhpa, British-zy râh England pangaipa ta Dâh achupa ta daihti hmâh ta. India zawpizy rairuna nata sipasana rai rai pahnokhei mâh hra vei. Dâh achuna vaw patlô ta, England liata daihti vâropi a y tawhta South Africa lâ sie awpa ta apatopatiah haw heih ta. South Africa lâ a siepa heta a hro a thla khai hapa a vaw châ.

South Africa liata morâhpazy ta a chiheihpa, Indian chyhsazy ama mohnao zie nata ama mopanai ziezy, chyhsa hawhta chhao moh leipa ta, “Coolie” tahpa awpa ta, ‘I’ nata Sahrohzy hlâta chhao ama mo panai viana zie a hmôpazy chata ano liata ‘Râh kyhpachâna’ a thi hapa cha pathyupa ta, a chi heihzy khotalaina châta a hro zydua a vaw hlâ khai hapa a châ. India chyhsazy ta amâ dona nata tovyuh ama hnei thei n’awpa ta a thaina nata sona cha athôna hnabeiseih leipa ta a vaw hmâh khai hapa a châ. South Africa liata India zawpizy duahmoi dopa chata a râh, India râh duahmo pa hmôsapa ta, râh châta kei chakâ awpa ta palôh pachhuahpanoh haw ta.

India râh lâ a vaw kua tawhta, British sôhdaopazy ta India lyuhneituhpazy thata ama dôhveina zie nata âdo lei kawpa ta sôh nata thih ama lapazy cha hmô lymâ ta. Champaran lyutaotuhpazy, British chyhsazy ta âdo lei kawpa ta sôh nata thih ama lapa a hmô nata chhochhi cha y moloh thei khao vei. Ano liata thapasana nata râh kyhpchâna hmeiseihpa cha kaw lai via lymâ ta, British tawhta India pachha-papuapa cha a biepipa a vaw châ hapa a châ.

Châhrasala, Kô 1947 liata India ta Khotalaina a hmôna daihti liata deikua India Phopi Paw, Mahatma Gandhi ta khâpa duahmo phapa hmahta a hnabeiseih leipa ta; a tha nata zâh, a daihti nata noh, a râh chata a pakhôsapa liata khâpa lymâ hmahta a hnabeiseih vei. Kô 1948, târi noh 28, Nawh liata moleipa ku liata a vaw thi hapa a châ. Kho sala cha, Rajkot Prime Minister sawchapawpa cha, a khota y thei aw ta, a hrochhôhta phasana nata hropahâpa ta daihti a pakhôsa thei tlai aw. Châhrasala, a râh châta  taotheipa a hnei hra tahpa cha ano sasyh angiahna hlâta hmiapasahsapa ta, hro taihta pahleipa ta a vaw y hapa a châ.

 Aung San Suu kyi

Târi noh 19, Chhiepa, kô 1945 liata Yangon liata vaw pih ta. Nohkhi chhao a pahno hmeiseih hlâta nata kô 2 ngâlâh a châ nota, kô 1947 liata khizaw liata apasâhsa chaipa nata a lôhbana chaipa, a thlôchhopaw cha Politics kyh liata a hmôthai leina vâta kasaopa vaw châ ta. Vâsâhna nata thlazohna chhaota ahawti via no daihti cha a nô mohôhna ry liata a vaw pakhôsa haw hra. Kô 1969 liata University of Oxford tawhta ‘Bachelor Degree’ patlôpa ta, kô 1972 liata mongyu satlia Michael Aris nata a hneipa ta, sawchapaw pano ama hnei. Ahy thâ angiah hlei leipa ta nata khihsa rietheina nata sipasana zy pahno hlei leipa ta nohlychhikhi thaphapa nata chhôhkipa ta daihti pakhôsa tyh hra ei ta. Kô 1970 tawhta kô 1980 chhôh cha England, USA nata India liata ama chhôhkhata thapha ngaitapa ta daihti ama hmâh. Châhrasala, kô 1988 a vaw pahie papua ta. A nô, ano asatuhpa Khin Kyi cha thina taihta tlôkhei theipa pasana a hneipa vâta a liahritlona râh, Burma lâ a kua heih awpa a vaw byuh haw.  He kô 1988 heta a hro cha a vaw thla khai hapa a châ.

Kô 1962 liata Burma râh liata ryureituhpa cha U Ne Win, ano mopakha pachâna ta ryureipa, ‘Dictator’ ama tahpa cha châ ta. Ano adyutuhpa nata zawpi ryureina a chaluahtuhpazy cha chado-chadaona y leipa ta a pheisaihzy hmâhpa ta pahlei-pahlô lymâtuhpa a châpa vâta Burma zawpi ta a ryureina ry liata rietheina ama tao ngaita kawpa a châ. Kô 1988 liata a Beina dyuchhai a thyusai tawhta nata Pheisaih ryureina (Military Junta) ku liata ryureina a siesai tawhta chhao â lâ leipa tawhta ryureipa ta, zawpi rietheina nata rairuna a patlôsa ngâthlâh ha chy. Burma zawpi, Ne Win nata a sahlaona ryureina ry liata rietheina reitiahlei ataopazy duahmo cha chhiechhâna hmeiseihpa châ ta; khotalaina nata adona rai raita su to chacheita vei. Ahy hmahta aryureina cha ei ngâh leipa ei ta. Ahy hmahta a chakhiah ngâhpa y hra vei ei. Châhrasala, kô 1988 a vaw pahie papua ta. Burma leilô saw dopa nata adona nata riahphana angâchhâpa ta zawpizy ama rietheina tawhtapa pachhapapuatuh awpa chanô riahphapa, Aung San Suu Kyi â vaw lâ haw. Hnabeidypa ta abôh ngâpa Burma zawpizy ta hnabeiseihna hnei pathi ei ta; khotalaina mei-ô rai a khaih khaoleina râh Burma liata khotalaina mei-ô cha pa khaihpa ta a y haw heih.

A liahritlona râh liata adona nata khotalaina tlybaihpa ta a y haipa cha a heihsaipa ta, khotalaina râh liata thaphapa nata chhôhkipa ta laizaolaopa ta, sipasana nata rietheinazy ta amâ hniahni theilei n’awpa râh liata a kho khiahta cha a y thei taraw tlai ny; Châhrasala, a chi nata heihzy, a nô nata paw, a rihlâpa nata narôzy, a sawchapawpa nata sawchanôzy rietheina nata rairuna chata pahnie ta; maniah râh liata phasana torai chhaota khihsapa hlâta cha a râh hneichhôhpa liata adona nata khotalaina ta ryu a rei heih thei n’awpa ta ‘Hrâsie’ awpa cha tlao a tlyh via haw ta. Burma sawhkhâ adoleina nata zawpi chô liata ryureina chahrâhpa a ypa pahlei awpa ta riahpha kawpa âdyupa vâta a chô liata hmo a vaw tlôpa zydua cha apapeisa leipa ta, riahpha ngaitapa ta, Burma zawpizy châta chhithatuhpa dopa a châ hnolohpa a châ. Zawpi ryureina, adona nata khotalaina âduakheipa vâta kô 1989 tawhta kô 2009 taihta khôtho pua thei lei awpa ta O-chhôh liata hraipa/patâhpa (House Arrest)-pa a châpâpa a châ. Kô 1999, târi noh 27, Pamih liata a vahpa Michael Aris a thi nona chhao khata Burma râh puasai theileipa ta ama patâh hapa vâta a ri dâhdei chhao kiah thei vei. 

  

Manik Sarkar

Târi noh 29, Nawh, Kô 1949 liata Radhakishorepur, Tripura liata chyhsiabietuhpa sawchapawpa châ awpa ta vaw pihpa Manik Sarkar, Tripur zawpi ta ama tlaichhaipa nata Chief Minister châta âzaopa ta ei pangawh dua ama patlopa he khâpa vâta Tripura zawpizy ta he tlupota tlaichhaipa ma châ ei ta? Atlyhna châhki ta a Party nata ano he ama sawhkhâ ngâthlâh ha tly?  Sôh nata thih, uhmo-nawhsa apazaipa vâta nata bierei a thai patlua vâta mâ? Châ bao vâ, ano liata adona, ngâchhihna nata ti nata râh thapasana hmeiseihpa a ypa cha na ama hmôchhei thei vei. Ano sasyh hlâta a râh zawpi a pachâ peimawh viana vâtazy, âpanawhna nata reisina vâtazy nata zawpi ta ama chakao awpa châ leipa ta ano ta zawpi chakao awpa a châna ziezy apahnosia tu hapa vâta tlao a châ.

       Manik Sarkar he India râh liata Chief Minister dyhchhiechaipa ‘Rikawt’ ataotuhpa a châ tahpa “ The Times of India” thâtihbu ta apalâsapa tawhna heta Politics dopa liata la hneirôhna y vei tahpa apalâsa tlai aw. Atlyhna liata âpie chyta a phusâ hneipa zie Election Commission-ta apalâsapa liata cha Manik Sarkar heta Phusâ Rs 10,800 ngâlâh a hnei cha maw! Chief Minister a châna hawhta a hlaopa liata Rs 5000 ngâlâh a lapa ta, a hropa cha Party Fund liata phie phie pangia khai ha tyh ta. O nata lyu hneileipa ta, Motor hnei hra leipa ta, Bank liata phusâ reikhi a so hra vei. Mobile Phone dâhdei chhao hnei leipa ta, CM Motor âvaopa liata ‘Khaihsaihpa’ tawh hra vei. A lapinô, Panchali Bhatacharjee, kô 2010 liata sawhkhâ rai tawhta apahâh hapa khata Rs 22, 015 ngâlâh a hnei hra. Manik Sarkar ta a reina zie liata cha, “Ei lahpinô Pension hlao ta â chyh thei pi ta. Nohkha châhnamei ei pazy n’awpa nata niebaw chalei n’awpa a y khiah â dai thlâh ha bao na” tahpa ta. Kô 2009 liata a nô ta âpahâsai nota O, Rs 200,00 mâ rachhôhpa ryuhpato sa ta, cha chhao cha a sietanô hnota a pie syulyu haw. Kô 2008 liata atlyna châta a moh a pangia no chhochhita cha sôh nata thih tlaw kha hmahta hnei vei!! A lahpinô chhao he sawhkhâ liata rai laipa a hriapa a châ tarawpa ta, “REKSAW” tah tlâ Ofis a kia tyh.

Chief Minister châta ei pangawh dua atlypatlopa a châ ha tarawpa ta atahmâ taihta a chysia ano tlaita pasu ta, ano tlaita  ângiahpa nata byuhpazy apado thlâh ha chy. Atakô atlyna liata ‘A tlo hana’ tahpa ama phuah patawnah khata raihria awpa ta â thao lymâ haw heih. ‘Kha he tloh ha heih tlôh pi ta, kyhchhina chhaota aly tuah ei si’ tahpazy cha ‘kahâ?’. Politician hropazy cha atlyna liata ama vaw tlo tawhta ama hneirôna a baihchhâ tyh ta, sôh nata thih liata byhnâ a thata ama to tyhpa châ ta, Manik Sarkar deikua, atlyna liata ei thôh a tlo tawhta chhao a dychhie via ngâ kaw. Viapakao thlâhthlipa, ‘Kurta’ nata Chaopasy thlâhthlipa ataopa ta  atlyna a ku liata Rs 1,080 ngâlâh a chabapa ta Kampein na lâ a pua thlâh ha. Kô 2003 liana deikua khata cha bâ ta vaw hneirô viapa ta Rs 3000 a kaw hnei hra. Kô 2008 liana khata Bank liata a phusâ hneipa zydua cha Rs 16,120.30 châ ta, cha cha kô 5 chhôhta Rs 5,320 ta a chy via ha tahna a châ. Manik Sarkar heta Agartala liata SBI liata Account sâkha ngâlâh hneipa ta, cha liana chata Rs 9,720.38 a hnei.

       Khi a chô liata chyhsa pathôh (3)-zy khi, atahmâ hlâ reikah ta cha, “The 3 Idiots”, ‘A Hrupa 3-zy’ eima tah thei tlai aw. Ama bua lei n’awpa liata bua ei ta, amâ chahrao lei n’awpa liata a chahraopa ta, hneirôhna, phasana, hrophana nata khizawta a pie theipa hmozy daihnypa ta amâ râsai lymâ. Anodeikua, âmo amâ paky vyupa ta mo hropazy hneirôh ei ta, âmo ta phasana ama pahleipa chata mo hropazy châta phasana vaw tlô khei ta; khotalaina ama pahleipa vâta mo hropazy ta Khotalaina ama vaw hnei ha hra.