Kyhpachâna vâta viavina : Hlihchhy nata Hly-âh

(Mara satlia nata laihsa a vâ-iana liata rei a hlao chaipa nata chyhsa hlupi ta khâ ama rei ngâthlâh ha tyhpa cha, ‘Hlihchhy nata Hly-âh’ thâtih he châ lei thei tlai aw vei. Ama kyhpachâna, phôhpa hawh deita ta eima rei hapa he William Shakespeare, ‘Romeo nata Juliet’ hawh tlupo ta rônahpa nata palôh hriapa châ ta. Amâ lyu leina deikua cha, Hlihchhy nata Hly-âh-zy cha kyhpachâna vâta he khizaw liana heta viavi hmeiseih ei ta; Romeo nata Juliet-zy deikua patuapaluana khizaw tawhta paduapa nata phichhyhpa a châna he a châ. Châhrasala, kyhpachâna hmeiseihpa hmotao thei zie nata kyhpachâna he rônah ta, â chhuahna nata a mohchho he kho a chhih hrasala, a hiatlia ta, a nôchhie kaw tyh hra tahpa deikua ‘Romeo nata Juliet nata Hlihchhy nata Hly-âhzy thâtih tawhna heta eima pahno thei tlai aw. Mara satlia nata laihsa likah liata Kyhpachâna thâtih palôh hriapa cha duah vaw reih hra tuah rai)

A kô nata a noh la pahno thei awpa châ tlai khao aw vei..

Zyhno khih  cha chanô thyudyupa nata chapaw thyudyupa, ama hawti viano tawhta khâ apakao ta, khâ apakyh tyhpa Hly-âh nata Hlihchhy-zy châta cha ama lei peirâh, ahy thâ a ngiah hlei leipa ta noh nata daihti ama pakhôna su; nôpona nata pachârôhna noh nata daihti amâ hlyna su tah ei sihla reichhei tuh thlyu aw mah pi. Hmo to tao khopa ta, pachâna miakha phaohpa ta nohlychhiki raisâhsana daihti liata chhao rai, tlylyna daihti liata chhao rai, ‘ Vachhu nôvah’ hawhta khâ apazi tyhpa châ ei ta; châhrasala, nohlychhiki a kao khopa ta, apazi tyh hra ei sala, ama likah liata palôh-pathaina nata a viasana phapa dei leipa ta cha su to hlei vei.

Cha hawhta Noh nata daihti vaw pakhô ei ta; ama kô nata khihzy vaw hluh lai ta, Hlihchhy nata Hly-âh chhao cha thyudyuna noh khôsaipa ta satlia nata laihsa tah thei awpa ta kô nata khih, hmi nata sâ liata liahsa amâ sua ha hra. Cha daihti liana tlai chata na ama pano likah liata hmo a nyupa,kyhpachâna hry liata tlyuh chaipa ama vaw tah tyhpa, ‘A viasa-phana tawhta Kyhpachâna’ cha âmo pano cha rei lei, ama heihzy châta chhaota hmôchhei thai rihmâ lei awpa ta papawsapa ta a  vaw y hapa cha a châ. Kha hlâ tawhta palôhpathai kawpa ta, satlia nata laihsa likah liata a zaona, ‘Kyhpachâna mokhaoh nata pachâna tawhta vaw puapa a viasana ta a vaw kao kho hra vei sala’; atahmâ cha, ‘Kyhpachâna cha, ama likah liata ‘Vâ-iana’ mohphaohpa ta â vaw zie haw. Kha hlâta thyudyupa pano, a viasa kaw tyhpa kha châ khao leipa ta, atahmâ cha satlia nata laihsa, kyh a pachâ kawpa ama vaw châ haw. Kyh amâ pachâna cha ama viasana cha rei lei; ama khihsawzy taih chhaota ama pahnokheipa nata ama mothai kaw tyhpa chhao a châ tlai hra. Châhrasala, chyhsapazy he eima khona nata saduthliena hawhta hmo he tlô khai vei tahpa deikua cha he satlia nata laihsa thâtih tawhna heta eima hmô thei thlyu tlai aw.

Hlihchhy cha machhie satlia lia chhao hmahta nô nata paw a hnei khao leipa ; Hâra-thorapa deita châ ta, nohkha noh liata a bai-lyu awpa dâhdei chhao hmahta a hnei leipa, a hârana dâh pasa ngaitapa a châ. Cha nota, Hly-âh deikua cha Phoso zuah, machhie satlia lia hmahta, khâpa hmahta a hneileipa châta cha a lâsie parypa vaw saipa hmahta kâchhie a chhihpa a châpa, mahnô nata mahpaw noh tawhta chhôhkha zachhihpa nata a pietheipa châ ei ta; Hlihchhy châta cha ‘Chyulei vâti dei a hrialâhpa’ hawh deita a za châ thlyu aw. Châhrasala, nohchareita ta a vâ pasa via ei ta; zâchareita amâ tlaichhaina cha pôh rili ta; duahmo nata chhichâna ananona nata alyuleina, apahliena chata ama likah liata kyhpachâna mei hawhta a ia ngâpa cha padiah thei khao vei!! Noza hmiachhiena chhao apapeisa leipa ta, satlia hârapa Hlihchhy chata, a kyhpachâpa, Phoso zuah, Hly-âh cha kei hiah haw hra tlai ta. Châhrasala, a kyhpachâ chaipa thlôchho nata vyhphaohnô ta amâ vaw chhy paliena dâh deikua cha, heihzy hawhta nô nata paw kalachhôh liata apahrâpa nata a hneipa, satlia a khotlâhpa châ ha mawh sala cha khâpa rei leipa ta tlahnao awpa chi tlaina ama châ; châhrasala, hârapa liata hmahta machhiepa, Hlihchhy châta cha, Phoso chyhsazy ta pahnei-parâsaona chôta, a mohnaona hla chhaota amâ vaw chhy paliena cha pahnolei apachâ ha awpa a byuh tlai aw.

Cha hawhta Hlihchhy ta ama sawchanô a vaw hiah thlâh ha hrapa chata Hly-âh nô nata paw no apa-âhsa kaw hapa cha ma a châ ha ma? “Hlihchhy ta eima sawchanô maniah a vaw hiah thlâh ha hrapa he a kâru mâ maniah mâ aw?” tahpa ta khâsaw rai vaw rei leipa ei ta. A kyhpachâ ngaitapa nô nata paw ta ama vaw paliena dâh chata a palôh pasasa ngaita ta, zâ chhao a mô theileipa ta, chhôh nata zâ cha a châta a lyu thlâh hapa a châ ha bâ. A nô nata paw ama hro thlâh ha nopazy za saipalie ta, Hly-âh nata ama hawti vianota palôhpathai kawpa ta amâ kao kho notapa zy nata ama kaw satlia-laihsa tawhta ama likah liata kyhpachâna a kaw paw pa; ahy pahnokheileipa ta ama nyu hnoloh nopazy nata aphi thei khaoleipa khihsaw pahnopa a vaw châna dâhzy; Hly-âh nata bâhlia a cha-aopa ta ama charei kho notapazy cha a vaw lâ ta, vâdua pachaipa hawhta a zâ pachâ ta; châhrasala, ‘Chapawsaw mâhta ei châ hra tâ’ tahpa ta hetana heta Hly-âh nô nata paw cha hlata palie haw hra ta:

“ Hlihchhy cha hâra tah kha ula,

  Saopi chhi ta ngiahrai dai thai ha aw,

  Hlihchhy cha hâra tah kha ula,

  Sakyuthyu ta, la pa-ao kyh thai ha aw”

tahpa ta a lôhiahna bie cha kaw bô papua haw hra ta. Hlihchhy thâtih ama vaw theina chata, a viasa lôhkhyzy nata khihsawzy chhao chata ama palôh vaw pasakhei leithei vei!..

       “Hlichhy nata Hly-âh vâsâh bao cha la,

              Lyubie a thaipa mah tôh a bô vei ei”

tahpa ta.

       Hlihchhy chata khihsawzy hlasapa cha a kei chhy palie heih hrapa ta,

       “Cha-ia, Cha-u, Utyh zyuhsy,

         Khihsy thâ lia chhâta dei na’

         Lôhcharie saihpazy tôh bô ei”

tahpa ta a kei chhy palie haw hra heih ta.

       Hly-âh nô nata paw ta ahnei awpa ama paryhsa vei tawh tly cha, lâpi hropa tluapa ta, Hly-âh nata amâ kao kho thei n’awpa lâpi naosia chaipa ta a pahnopa cha a chhih haw ta. Hly-âh cha râhmâh lâ a râkheipa ta; Kahrie tlâh liata lôkhaoh liata amâ chhei haw. Cha liana chata ama likah liata kyhpachâna cha papawsa via heihpa ta y ta, daihti vâropi ama y hapa a châ. Lyurâhpa bia chaopa ta, cha cha pati châta amâ ngiapâ tyh. Thotheipa nata râhsa ama hmôthei tlakaihpazy cha pati châta a ngiapâ tyh hra ei ta; cha hawhna chata kyhpachâna vâta rietheina nata rairuna ama chatôh khoh lymâpa a vaw châ. Châhrasala, ama rietheina nata rairuna cha ama likah liata kyhpachâna chata pamysa ta, nohlychhiki thapa nata pahneisilihna chôta Kahrie Tlâh lôkhaoh liana chata ama likah liata kyhpachâna cha ama vaw papawsa haw. Zâ vaw chhi ta, lôkhaoh liata ziahmo paryhpa ta, lahua châta a lô sâno amâ hua tyh.

       Cha lôkhaoh liana chata Kyhpachâna hmeiseihpa, khizaw hneirônahzy nata hâranazy ta apachhaih theileipa, nô nata paw pakhâpadienazy khôkhâtheipa kyhpachâna cha papawsapa ta; kyhpachâna hmotaotheizie ama vaw phuahluah hapa a vaw châ. He râhmâhpa liata ama y chhôhta Hlihchhy nata Hly-âh hro liata hmo a ngiatlâh kawpa a châpa miakha cha, nô nata paw paryhsa leina chôta a râpa ama châpa vâta nata nô nata paw paryhsana ta ykhopa ama châ leipa vâta lôkhaoh liana heta a ziakhopa ta, zâto daihti hmâ hra ei sala, chanô-chapaw châna hmâh beih vei ei ama ta! Cha tlupo ta kyhpachâna pathaipa cha a y thei tlai aw vâ mah i? Kahrie tlâh nata a chheipâh râhmâhpa cha ama O nata lyu pachâsapa ta, pazu-pavaw nata râhsazy cha ama khihsaw pachâsa ei ta; râh liata paw to pakaipazy cha ama kyhpachâna pahnokheituhpa châta ama hmâ tyhpa a vaw châ.

       Daihti nata noh vaw khô lymâ ta, cha hawhta râhmâhpa liata y ngâthlâh thai awpa a vaw châ leina kaoh a ypa a châ thlyu aw, chalei pachhaota, Hly-âh nô nata paw ta atahmâ la ama paryhsa ha bâ aw tahpa ama pachâpa vâta chhao a châ thlyu aw, khihlâ cha kuah ha heihpa ta, hnabeiseihna ama noh kaw kaw sie lai n’awpa cha sai lai hra ei ta. Châhrasala, Hly-âh nô nata paw chata paryhsa pyly leipa ei ta; cha thota, kyh apachâpazy a chhaihna liata apasa chaipa nata ‘Hronoh mâchhiesana’ ama vaw tah tyhpa chata Hlihchhy cha a vaw tlô thlu haw. Hly-âh cha Sangyu lâ tawhta chyhsa hneirôh kawpa ta a za hiah haw.

       Hly-âh châta cha, Hlihchhy nata khatluta kyh apachâpa hmah châ hra ei sala, nô nata paw reingiahleina pa-I panana khizaw a châ hapa vâta Hly-âh cha a kyhpachâpa cha dyhchâ khôphei kiahsaipa ta, lytlâh bypi a khô h’awpa a vaw ngiah ha ta. Hly-âh châta cha a tao thei chhôhpa a y chhôhpa cha, Hlihchhy hnohta lyubie parupa hlâpa dei cha a châ ha bâ. Hlihchhy hnona chata hetana heta bie paphao haw ta. “ Ei kiana lâ na vaw zi la, ‘Khâpa na kho?’ tahpa ta ama cha vaw hiahrih tita, ‘Hly-âh Hnory na ei kho’ vaw tah ha mah y’ tahpa ta.

       Chatanachata, Hly-âh kiana Sangyu liana chata Hlihchhy chhao cha kaw sie tlai hra ta, a hmo khopa cha ama vaw hiahrih haw hra tlai, Hly-âh ta a chho hapa hawhna khata, “ Hly-âh hnoryna ei kho” tahpa ta a chhy haw ta. Sangyumo chhao chata, “Hnory tlaita a kho thlâh hapa cha” tahpa ta pie haw hra ei ta. Nôkiana kyhchhizy liahsa ama chhi khai tawhta nata apathlienazy liahsa ama hnei khai tawhta Hlihchhy nata khihsaw, nôkia a kaw hlao hrapazy cha ama khih lâ kuapa ta, sie haw heih ei ta. Khih lâ a liepa ta ama vaw sie laina liata chavah sâkha ama chakah ngâ nona chata Hly-âh hnory cha tita la ta, phao syulyu haw ta. Hlihchhy chata a viasa a sielâpazy cha aw saopa ta, hlata hnory a huapa awpa ta a haw ta;

“Khihsaw sai u ti na tohpa ula,

          Hly-âh hnory tita phao ha na”

tahpa ta. A sielâhpa khihsawzy chata, “ Hly-âh Hnory tlai cha pasina a chhih” tahpa ta ama uasa leipa cha Hlihchhy chata hla pyly ta awsao heihpa ta;

“Hly-âh hnory tlai cha tah kha ula,

   Khuru pohchi syhpangawh khupa na”

tah heih ta. Hlihchhy palôhpasa zie ama hmôna ta ngiachhie ha heih ei ta.Ti cha topa ta, Hnory cha a huapa ha heih ta. Hlihchhy chhao cha aly ngaitapa ta O a tlô ha hrapa a châ.

       Noh nata daihtizy vaw sie lymâ ta. Hly-âh Sangyu lâ dyh a châna tawhta daihti vâropi a vaw khô ha bâ hei hra. Nohkha cha Hly-âh nô nata paw chata ama lyu liata Zyhmaoh tho lai ngaitapa nata a sâh ngâsâpa chiah thlâhpa awpa tluapa ta khihsawzy cha a haw lai ei ta. Châhrasala, chyhsa ama chhopa maihzy chata, “Hlihchhy leipa ta la ahy hmahta thlâh thei aw vei ei” ama tah chhy hapa vâta Hlihchhy cha kei chho ei ta; Hlihchhy chata, “ Keimozy hawhpa thothlupa tlaita nama kho khiahta eicha vaw thlup’aw ei” tahpa a vaw chhy ta. Hly-âh nô nata paw cha aly ngâsâ thlâh ha ei ta; Awhsa nata Sahma pahâh ngaitapa cha Hlihchhy nie awpa châta a chhuahdypa ta lyu lâ cha sie haw ei ta.

       Lyu ama kei tlô patawnah chata Hlihchhy chata Zyhmaoh kô cha kiah parapa ta, a chiah cha thlâh lymâ ta, buakha chhôh ta a chiah zydua cha thlâh khai ha ta. Thoki liana chata akaw luahpa ta, hla ta Hly-âh a vâna zie cha kaw sa papua haw heih ta:

“Hlihchhy pawtho lia luah aw sala,

  Hly-âh yna Sangyu râh a zâ lâ vei”

tahpa ta. Thochiahzy a thlâh khai hapa vâta za chô’pa a chhuah ta, châhrasala, thokô thaby liata Hly-âh nô ta ano châta Awhsa nata sahma â chhuady haipa cha a za hmô nahta, a kâzô a chhie hapa vâta thokô liata zôhri a zâ ngiehpa cha a hli lai ta thokô hro lâ kiah lymâpa ta, a ru lâta chô ta Khih lâ sie syulyu haw ta.

       Thokô thabyh liana chata Hly-âh nô chata Hlihchhy nie awpa tahpa ta Awhsa nata sahma cha a vaw chhuahdyh hai ta, anodeikua charâta a za chô thai khao leipa vâta Hly-âh nô chata,

“Hlihchhy cha za chô thai khao hra vâ,

Bôhpi ry lia beihpai ei pai ngâ e”

tahpa ta a zoh ngâna taihta hâ ei ta; a za chô thai khaoleipa hnaihta a khih lâ sie haw hra ei ta.

Daihti vaw sie lymâ ta, Hihchhy cha sôhpaliepa ta Matu lâ sie ta. Hly-âh hnory, tlaw sypangawh a khupa cha zuah ta;cha a zuana phusâ hmâpa chata pachhizy, Seihzy nata dawhkhozy chaleipa, ama khih lâ za sie lai ta. Seihzy cha za hao laipa ta lâpi liata a za sie lai nona chata, Hly-âh nô nata paw, lâpi liata a duah thlâh hapa za hmô ta; Hly-âh a kei hia nota ama tahna dâh kha â thei thlâh hapa vâta,

“Hly-âh nô nata paw lâ liah a duah kha ula,

Hlihchhy ruthlypa ma cha dai la ei a hnei ula”

tahpa ta za s alai ta, Hly-âh nô nata paw cha ama kâchhie ta a hnei haw ei ta.

Ei kha cha Hly-âh cha a nô nata paw khih lâ za tlyh ta. A viasazy chhao nata a nô nata paw lyu lâ sie ei ta, lyu liata thokô lai ngaitapa cha a viasazy ta , “ He thokô lai ngaitapa he Hlihchhy tan a nô nata paw baopa ta, a chiahzy a thlâh khai ha” tahpa ta chho ei ta. Hly-âh cha  apalôh a vaw lie chaimâh ta, Hla ta,

“Hlihchhy pawtho kiahna mo bao ula,

A pathlie vualua hmyh lia vâ kô”

 tahpa kaw sa papua haw ta. Hly-âh ta Hlihchhy kyh apachâna cha pasa via rili ngâ kaw ta. Châhrasala, chyhsa lahpinô a châ hapa vâta Hlihchhy deikua ta hnabeiseih thai rihmâ awpa châ khao vei tahpa a pahno hapa vâta a hniahnih ngâ tu khao leipa ta. Zâkha cha, Hly-âh chata, “ Atazâ la, a zia khoh tuah ei si” tahpa ta Hlihchhy cha a kiah liata pa ziahsa ta. Châhrasala, Hlihchhy cha ama satlia-laihsa no hawhta tah khao vei. Hly-âh cha a palôh pasa ngaita ta. Hlihchhy ta kyhpachâ khao vei khiah maw? Tahpa ta yna ziana chhao pahno khao vei! A mylâ ta Sangyu lâ sie syulyu haw ta. A palôh pasana chata sapa chiehleina tlôkheipa ta; vaw pasa chaimâh ta, Hly-âh cha vaw thi haw ta. Hlihchhy cha “Hly-âh na a pahâ ha e” tahpa ama vaw chho patawnah ta ari kiah awpa ta a thao lymâ haw ta.

Hlihchhy ta Sangyu khih a tlô hlâta cha Hly-âh ri chata pachârôhna hmi phaohpa ta, â ngianazy chhao phie phieh chy khai ha ta. Châhrasala, Hlihchhy ta Hly-âh ri ama paziahna O-chhôh a zâ ngia ta, Hly-âh ri chô liata raithlih chhaota chaphôh a kei tuhna noh liata deikua la, a hmiaphaozie a vaw nano ta, a hmao dô khai hapazy cha vaw saihpa ta, a ôkhaih padâh khai hapazy chhao cha vaw panyu khai ha heih ta. A kyhpachâ chaipa paw hmiakô liana chata a pawngiana zydua chhaota â kaw luah hei e ama ta. Châhrasala, Hlihchhy châta cha, cha hawhta Hly-âh ri hmiaphaozie a kaw nano nano ngâpa chata yzie hnei khao leipa ta, kaw thyu heih hra sala a no-eih châ khao vei tahpa apahno thlâh hapa vâ cha ma a châ ma, hetana heta hla ta Hly-âh cha pathlie haw ta:

“Na meihkia lo ha bâ la

A vâzy a cha pachhai tlamaw aw,

Sie bâ lavâh chi”

tahpa ta raithlih chhaota Hly-âh cha, a pawngiana kaw paw pakhua haipa cha pa pawsa khao leipa ta, bôhzyu-lytlâh khô ha awpa ta a pathlie hapa a châ. Cha hla a sa khai patawnah chata Hly-âh hmi cha a vaw thla khai ha heih ta, a thipa hmi dopa a avw phao ha heih e ama ta. Chatana chata, Mara satlia nata laihsa kyhpachâna rônahpa thâtih cha a vaw chhâ hapa a châ.