LITERATURE KHOCHHIHPA

- Robert B Syuhlo, Siaha

“Literature cha khâpa maw? châ tapôh roh ta papuapa he mâ? Hlaphôh (Poem) tapôh chapai ta papuapa he mâ?”

Châ bao vâ! Literature cha bie nata hla â ngia thei chaina hawhta phi papua ta, roh papua ta, chyhsapa chhôhso liamari chaipa tawhta bie â ngia chaipa thaohpapua ta, â ngia kawpa ta paryhpari ta, bie nata hla hmotaotheina hmâpa ta huso thlupa he a châ cheingei aw.

“Âthaona liata BIE y ta, Bie cha sapa lâta âvaw lie” tahpa hawhna khata, “Bie â ngia khiahta chhôhso a chahriana dâh chhao thlôh ta; a kaw sa papuapa chhao kho â chhih hra”

Bie eima paryhparina dâh â ngia lei khiahta cha chyhsapa, avaw reihtuhpa palôh a hriana chhao â chieh muarua thei leipa ta; avaw reihtuhpa hro chhao panano muarua thei vei.

Pawpi nairu liata chhao Literature pawngiana hmâpa ta tobichhipa pawpi cha a ngia via ta, a roh pahâh via ta, mo chhao a la via hra.

Laihsa chhithaipa nairu liata chhao bie nata hla dopa nata phapa ta tobipa laihsa cha, “Ei kha moh ta mo la ta; ei no mo ta chhôhso patu ta; mo chanei via heihpa ta a chhithaina SEI liata miah a patâhsa thei thlâh tyh cha maw!”

Kyhpachâna lyuhbie á hlâna kyh liata chhao, Literature pawngiana hmâpa ta pachhao papuapa nata chapaipa cha avaw daotuhpa chhôhso ta dytha a ru tah ta; buakha chhôhta thazôh rai hnei leipa hawhta a chhôhso cha Literature khochhihna nata kho-iah hmâpa ta tobipa bie nata hla â ngia kawpa ta a pahnie thlâh ha tyh.

“KYHPACHÂNA” tahpa biesâ he, tobi leipa ta nata reihpakawh leipa ta cha hmotao thei leipa ta, Literature pawngiana ta tobi chhipa a châ leipa chhochhi khiahta la “Biesâ thláhthlipa” deita na a châ ha tyh y!

Chhaihna lyuhbie nairu liana hmahta, Literature thlahpa ta a patu hapa lyuhbie ta cha “Chhôhso chakhei ta; rohpadyna pasihsa ta, sihnóh kua chiehpa chhao awpakhua ru vei” mâh my! Chhaihna lyuhbie thlóh chaipazy he Literature pawngiana ta chapaipa châ ei ta; chhôhso a kei daihna dâh chhao pasa via tyh ta; a paru ta raithlih palosapa chhao a hnei hluh via tyh hra.

Bie heili-heilyu kawpa he keima cháta la “Literature” tloh leipa ta; kyhpachâna kyh chhao, bie heili-heilyu kawpa ta rohpapuapa cha, ‘Khochhihna’ hnei leipa ‘Chhivaw’ hawh deita ei pachâ.

Literature pha chaipazy liata cha – “Pawngiana nata khochhihna ta tobipa chhivaw chhithai hnazô sâhmia â lâ tyh ta; cha hawhpa bie phapa eima za reih pasu châhta la naw, a bie paryhpa tozy chata khochhihna nata pawngiana ta a tobipa chhivaw ta maniah a kaw pakieh thlu ha tyhpa ta ei za hmô tyh”

Hro tha a chhâ kaw nota chhao, “Literature dopa ta chapaipa nata tobipa bie ei rei pasu châhta cha, hmotaotheina zydua ei hnei hapa ta a pahno tyh na ta; tlâhpi nata tilaipi chô zydua chhao ei biehnei ry liata ei soh ha heihpa ta ei pahno tyh”

Thlihua deita he hmahta “Literature ta cha thlihpi hlâta tlô viapa nata chhôhso panano theipa lâta a pachâsa ha tyh”

Châhrasala, Literature pawngiana hmâh thai leipazy kuzô ei tyh pasy châhta la, “Literature khochhihna nata pawngiana ama tlybaipa ta pahno tyh na ta; Literature thlôhna chhao khana lâta ama papua ha tyhpa ta ei pahno cha maw!”

Chhaolei heta phana di kha chhâ a papuapa ta a châ khiahta la, “Literature hmâpa ta chhaolei nata a chhôh liata a ypazy khochhihna thaohpapua thaipazy kuzô he a châ cheingei aw” ei tah tyh cha maw!

Drink to me only with thine eyes
And I will pledge with mine;
Or leave a kiss but in the cup
And I'll not look for wine

- B.Jonson 
( To Celia )

Heih nawhzy reikah thai tyh dâh rimâ he la aw!

Moleina tily a chatlao haipa (hawhta pachâpa) sâhti taihta padythasa thei awpa hnazô pha bao rimâ awpa cha la! A hnazô a tyh ha hra mawh sihla cha Hrona taihta eima hnôhchhy thlâh ha thlyu na nâ nata kei zy bao heta la...

He hawhpa hnazô a phaohpazy hmiakô liata la, liahsa pakhuh paneihpa ta R.Herrick (To Anthea) hawhta,

Bid me despair and I'll despa....
Or bid me die, I will dare
E'en Death, to die for thee

Tahpa reikahzy taihta pathlie awpa eimâ ngâcho thlyu aw! Thina taihta Chyhu sa thlupa ta, eima pahao thlâh ha thei..Cha tlu hnazô hmotaotheipa nata chhôhso pahiehpahâ thei awpa sâhmia a phaohpa rimâ cha 
 la aw!

A châ tlai na, lochona noh daihti liana heta cha khâpa hmahta eima chhôhso â keipa nata â ngiehtuhpa y leipa ei ta; eima chhôhso chhao thlihua hawhta â huapa ta, ziza lalôhna su maih pho a chhuahpa ta eimâ chhaodaoh tyh. He hawhpa daihti liana heta cha  Hla a ngia chaipazy ta miah pahnie pachaih tyh ta ; Chhithai muarua leipazy chhao khâpa váta tlyma ama chhithai pachaih ha tyh. Chyhsato heta a khotlâh lichih, khizaw hneituhpa hawhta eimâ pachâ lichih y tyh ta, cha hawhpa daihti liana chata hmopha chaipazy eimâ tyh tyh, tahpa he rei angiah hlei leipa ta pawpipa, chakoh thaby liata atyuhpazy bielôhawh reipa tawhta a sia thlâh ha!

Ama rei tyhpa English bie nata hla riahpaw, William Shakespeare chhao khata, a lochona daihti liata chhâzaw chhâna taihta hrozô lâthlôh achhih awpa hawhta â pachâ nona khata cha, chhaolei liata a pahrâpa hryta chanô pakha sâhmia hnazô kha mâh my,

Shall I compare thee to a summer's day?
Thou art more lovely and more temperate

Tahpa chanô zydua hryta hnazô sâhmia pha patluapa ta a kaw thaohpapua ha hra bao..

Khi a chô liata hlaphóhtuthaipa (Poet) - zy ta khizaw liata chanô pakha, nâma nata keima hawhta ADÂ nata IVYH pathla a châ thlâh ha hrapazy tlai kha, Khazohpa kumâ pha patluapa nata a ngia patluapa lâta papuapa ta, “Literature” hmotaotheina hmâpa ta  “Thi thai khao lei awpa ta hrona pie chanei ei ta; meihkia lo thai khao lei awpa ta chhâzaw hrona hu ama so thlu hapa avaw châ”....

Khizaw a y chhôhta cha, khi hawhpa chanôzy khi hroh ngâthlâh ha aw ei ta; “Literature hmotaotheina ta hrona a pie hapa vâ ei ta”... “Ei kha thi raopa a châ tarawpa ta; Literature váta ei no ama hroh chanei heih tyh aw”

Chavâna tlai chata, keima bao tlai na chhao heta, nôpih chhithaina cha, “Literature ta chhâzaw hrona a pie ha mawh na” tahpa ta,

Nâ la naw
Samiena torai ta cha by ta
Na sâhmia atyh hapazy ta
Khochhihna sapa tlai ta a kaw duahpa cha
Pahmôsapa ta ei y ha he zaw
Tahpa ta chhôhso lyna chô
Tlâhto suto ama zawh tyh

Ei vaw tah ha hra bao