LOCHONA DAIHTI

~ K. Beiratobi.

“Thyutliana daihti phapa he, rahmâ hawh dei a vaw châ,

Daihti rei hmâh aw ma pi, pawpi paw hawh thlai ama lo aw”.

Chô Khazohpa ta alei chô liata hmohrohneipa zydua ataopa he saih ei sih la, ama lochona daihti he amâ ngia chaina nata thatlôna daihti a vaw châ. Cha hawhna hra chata, a ku tlaita A paduapa chyhsazy pi, eima thyutliana daihti he sapa nata palôhrupa thatlôna nata eimâ ngia chaina a vaw châ. Tahmâhlâ khizaw thaina nata sona asâh lymâpa liata hmahsiena lâthlôh achhih ta, thei phapa pathei hra awpa ta cha, mylâ daihti avaw y awpa châta eima chhôhkha, khihtlâh nata râh châta LOCHONA DAIHTI phapa he eima hlâ tua awpa a byuh.

Khazohpa ta thyutliapazy pi he eima thyutliana daihtizy aly kawpa ta hmâh awpa he miah pasai chyu ta, anodeikua cha eima sapa nata thlahpa hrona sôh kawpa a parao thei awpazy ta daihti ahmâ awpa deikua miah pasaih thlyu’ vei na. Achhuahna rupa hnei ta, thyutliapazy ta A rai rônah kawpa hria thei awpa ta apachhuahpa chyhsa nata maohphaona aphaoh tlâh awpa ta apachhuahpa chyhsa ngâchhihpa nata tiamapa chyhsa châ awpa he miah a khoh thlyu’ na.

Thyutliazy pi ta palôhru saduthliena asâh kawpa hnei awpa eima châna zie he pahno thai ei sih la aw!! Eima lâpizy apha kawpa ta pachâpa ta, achhuahna asâh kawpa nata a pathaih kawpa ta eima rai athao ei sih la; Khazohpa ngiachhiena nata hmotaotheina zawzi ta ngâchhihna lâpi achhih hualuapa ta, lâpi do leipa eimâ chhi pathlei khia cha, chhiena nata mo-ohna ta bie tlôh aw ta, Hlaotlohna zy, abohna zy nata bie hmeiseihpa zy tawhta thlai eima pavia para aw.

Khazohpa hmotaotheina he eima chhie nata pha pahnona tha patlôtuhpa zy, palôhrupa thatlôna nata hmahsiena châta eima peimawh hialiapa a châ. Saduthliena nata patuapaluana phapa he hlaotlohna hleidy ahluah thlâhpa, tiamana zy, ngâchhihna nata adona zy etc ta amâ chhih tyhpa a châ. Khâpa he ma hmialâ daihti liata châ awpata eima vaw patuapalua tyhpa châ vâ tly? Pastor, Politician, Doctor etc. Châhrasala, peimawh chaipa deikua la saduthliena papitlohsapa he a châ. Sadu eima thliepa hlaotlohna awpa ta eima lâpi pabuatuhpazy deikua eima hrozie ta tlyma, chhôhkha rairuna tlyma, eima Society tlyma, cha deikua eima pahnopasia awpa a byuh hmeiseih.

Daihti he chyhsa to ta eima patu thai lei awpa, mylâ khih vaw dei awpa liata phôhpa (history) phapa nata chhiepa eima hmâ dâh reizie ta miah vaw tlôkheituhpa a châ. Cha cha kheita ma eima hmâh aw/ pie aw? Huasuana daihti a hmâh ta, T.V mo zy, viasazy nata achuna daihti liata pati niepahmaohnazy nata hmo hropa buakha châta phasana etc, tyhpazy arâsai awpazy â ngiah. A pazipa liata cha, achu/ hria daihti liata eima Society siezie hluh via eima pathlie ngâh awpa â ngiah. Chyhsa reipachhiena nata ahnawnazy tao ngâh awpa ta “Sei châna hmia pasah ta, bei châ hnôh pa-y awpa” he eima pachâna mokhaohzy padeih ta, eima pachânazy â hlapi sai ta eima pachâna nahkhaozy pavâsapa ta, râh taipa lâ pangai hualua awpa eima châna avao ngâthlâh awpa he eima biepipa vaw châ sala. Eima hmia liata kheihti nata sâhpiti alona râh tlô awpa he hmo naopa châ vei. Châhrasala, achhuahpa hriapapuapa tluta a rônahpa deikua he alei râh lia a y nahta pangiasa a chhih vei. Cha chana palyupalihna zy, mophana zy nata reithaina zy hlâta a lie hluhpi ta ahluh/rônah/ zachhih viapa cha a châ. Cha dei cha na keimo nata eima chi heih chhâ avaw y awpa thyutliazy châta eima yna leilô mâ (rent) eima pie awpa do kawpa a châ...

He khizaw pachârôhna nata buana saita abiena liata thaina, sonazy a chadaipa ta eima chheipâh liata chyhsa hluhpizy hry liata charei palao hra awpa ta cha eima lochona daihti sôhpa he hmâh thai ta, tiama papua ta khohleikhoh tlôh leipa ta, eima thyutliana daihti phapa nata khotalaina sôh kawpa ahyrai ta eima hneipa hmâpa ta, hlaotlohna lâpi papotuhpazy pathai ei sih la, eima lochona daihti pha kawpa he mylâ châta thâtih angia kawpa atao ei sih la; chhôhkha, khihtlâh nata râh châta byhnâ châ hra awpa ta eima pawngiana daihti he hmâh ei sih la, eima hlâ ngâh awpa â ngiah kaw bâ vei mâ?

“Chyhsa hrona he tihu buakha avaw lâ ta, sôkha ta aleipa hawh dei a châ”. Eima lochona daihtizy chhao mylâ daihti liata la aw ngâ hra ei sih la, sihnôh vaw kua thai beih khao lei awpa sai a châ. Chavâta, ngâchhih leina khizaw liata ngâchhih ngâh awpa zy, thathina khizaw liata pahnaikhohpa ta tiama hualua awpa zy, pathaihna rai ahnei leipa khizaw liata Zisu vâta pathaihna a chadai lyh-liapa zy, chyhsa ta ama chakaopa châ leipa ta chyhsa hropa a chakaotuhpa châ hra awpazy a peimawh. He ryu phapazy he pasô ta, hrokhei ei sih la, eima thyudyuna daihti miah chhihtuh awpazy vaw châ ei sala, cha chana hrochhôh ta Lôbô phapa ahyrai ta eima bô theipa a châ.

Khizaw cha na patu dâh hawhta a cha vaw patu aw. Pahnei silipa ta nâ kei hnia khiata la, pahnei silipa ta â châ vaw hnia hra aw. Eima lochona daihti ahmâhtuhpa thyutliazy pi thyu ei sih la, hmialâ pangai bâ ei suh vy. Nâ nata kei he daihti ahneituhpa châ pi ta, atanoh ta daihti phapa eima hnei hawhpa he khatino hmahta vaw kua beih khao aw vei. Atahmâ he amopasiana châta hmâh ei sih la, eima lochona noh liata hro ngiapa ta khizaw he hmâhpa ta, noh hro liata vâsâh taona awpazy khôkhâhna a châ. Eima thyutlia noh lia heta Khazopa tawhta eima daopa nô nata pawzy kyhpachâna ta asapa biephapa miah ama chhopazy cha pyungiapazy hry ta pyungia chaipazy vaw châ sala, sawzy châta bie phapa paryu awpa eima châpa vâta kao totie liata eimâ phana rakhapa hawhta chyhsa hropa châta baotuh phapa châ ei sih la; Hlâno mahnô nata mahpawzy hro ngiapa, hlâta uhthei viapazy chizana kha eima hro ta palâsa bâ ei sih la, ama ngâchhihna hro rônah kawpazy kha pachâ tua ei suh u. Ngâchhihpa ta hrochhôh noh daihti ama hmânazy kha athlâhthlipa ta a leidia awpa pasaih khah ei suh u. Ama ngâchhihnazy kha sapa liata amâ tobina châ leipa ta, sôh ta a chalei thai leipa zachhihna hro tlao a châ. Hezy hena Thlâlô alô ta bôpa châ leipa, chyhsa palôh liata ngâchhihna a zachhih zie abôtuhpa cha a châ...

Chyhsa heta hro lathlôh nano nanopa achhih chyu pi ta – hawti daihti, lôhmaoh daihti, thyudyu daihti, locho daihti etc. Chhutla-chakhâ kawpa sai a châ! Eima thatlô chai daihti, kho-iah eima hnei chai daihti, riahpha chai daihti nata raihria thei chaina daihti cha Locho daihti he a châ. He daihti liata na theina zydua hmâpa ta hro lâthlôh khochhihpa liata hlaotlohna nata alyna na tlua leipa khiahta la, daihti phapa ta a cha khôsai tita nâ ngiapachhi ngaita aw. Na hrochhôh lâthlôh achhih haipa liata bo peimawh chaipa he hmâh thai la, na tusawzy châta ryu hluhpi paryu vâ chi!!

(He Châpaw he Board of Mara Literature ta Châpaw Arohpasuana apachhuapanohpa liata Sâthôhna lymâ adaopa a châ).