EI LEI RYUSÔHPA

~ Tracy Hlychho, Siahatlâh

Kheihta â? Um !! Ei kyhpachâpa. Chata chuh, Aw ei kyhpachâpa he la alei nata vâ liazy khita ano hlâta angia viapa nata khochhihpa nata asôhpa pakhopâ awpa rai ta ei pahno vei dia maw!! Thlâpâ mâ ? Awhsi mâ ? Ȃ ngia na vaw tah kaw? Tlai chuh, thlâpâ nata Awhsizy khi la daihti eihpa ahneipa vâ chyu chyuhta angiapa nata khochhihpa châ ei ta, ngôh nata lôsôhpazy chhao thlalâ keina hawhpa deita ama châ mâhtâ. Châhrasala, ei kho ngâpa, ei kyhpachâpa deikua he cha ahmôtuhpa nata pahnotuhpa zydua châta angiana zydua nata hrona beilakho a vaw châ hmeiseih mâhtâ!!

Chanô hry lia chhaota a chiehlei chaipa nata nainyu chaipa châta â piepasa zie he, he ei lei sapa, chhie nata pha pahnona zydua chhao heta reihpasia khai thei vei. He khizaw chyhsapazy laizaolaona nata sasyh karâ-yna râh kawh ngaitapa liana heta noh nata daihtizy reihpa ta, a hrochhôh daihti a pha thei chaipa hawhta a hmâh lymâ tyh hra, tahpa ei pahnothai hlâ tawh khata keima châta a daihti zydua vaw hlâ khai ha ta. Eimâ tyh pataw nah

khata a palôh chhâzaw ryubyh châbi avaotuhpa ei vaw châ syulyu ha bao. Kyhpachâna yzie ei pahnothai hlâ zydua khata a rie ei vaw pathei dâh tyh kha aw!! He khizaw kyhpachâna tilaipi kawh ngaitapa lia he la â pathu tu ha ta ei zaw thai rarai leipa na a vaw châ. Châhrasala ei kyhpachâpa chata sasyh apaphapa ta ei kiahpâh liata na ypâ ngâthlâh ha tyh ta, hmoto daohthei kawpa ta eina pachu tyh. Â ngiana zydua nata ato thai leina zydua avaw puana hawhta, ei hmialâ daihti awpazy chhao sai thai leipa ta noh nata daihti, chhutla chakhâ achhi tyh hr’aw sa la, ano chata zakheipa cha rei lei, kyhpachâna mo ta khâ eina moh tyh. Kyh eina pachâ tu hapa vâta a chhôhkha nata viasa rihchâhzy chhao za thei khao tyh leipa ta, athaina nata sona a hneichhôhpazy cha na pahneisa hra awpa achhuahpa ta nohchareih my nohchhipa cha reihpa ta vaw tei hnolo tyh ta, ei ngiahpa hmoto ta na vao awpa nata na bao awpa ta khatino raita keima châ ta daihti ruapa hnei leipa ta y beih vei. Keima châta, “Ato liata a to” tah ei sih la rei chhei tu thlyu va na.

Chata chuh, châ rei nata ro chhao athai leipa kha kyh eina pachâ tu hapa vâta rietheina zydua chatôhpa ta pachutuh phapa châpa ta atahmâ duasu na patlôsa ta, ei moh ei vaw roh thai ha hra, a rônah tlai na aw !! Tlâh lei ziah lei no chhaota a chhô a zâ ta taotuhpa Khazohpa ta apahâh n’awpa daihti a taopa zâ daihti khochhih kawpa chhao tlaichhai thei leipa ta, a rakhô liata mokuh pahâh kawpa ta amô awpa hlâta cha kei, a kyhpachâpa, dyutlai lei chaipa kiah liata khih padeipazy cha tlao tlaichhai via tyh ta. A ngiachhiena mopadei nata a kyhpachâna palôhrupa cha hmô thei awpa heta a bie pakhô ngâkaw tyh. Na ngiachhie kaw tyh hrasala tlâhna a pietheituhpa a châ leizie â pahnopasia kaw ta, a tao thei chhôhpa Khazohpa lâta pachârôhna zydua tlôkheipa ta, tlâhna hiapa ta thlah khâ eina chhâpa tyh. Aw !! keima châ heta thlah a vaw chhâ hnasa tyh tlai my !! Cha a thlahchhâna hmotaotheina cha Abeipa ta ei chô liata vaw palâsa lymâ ta, atahmâ duasu he ei vaw tlô hrapa a vaw châ. Aw !! Kei châta la â lyna hmia nata a kyhpachâna palôh cha a ngia ta a sôh ngaita kaw dia! Ei hrochhôh heta ei my thei aw mâ? Châ bao vâ, my thei tiarâh aw va na tahpa ei palôh ta a pahnopasiapa hawhna heta ei pahnona zydua chhao heta chahnao pa-i ta, a pahnokheipa a châ. Kei châta la Dawhty rônah chaipa, apalaikhei tlâh a châ chaipa a vaw châ.

Chata chuh, he ei lei sapa mo ta hmô theipa, a leidia thlâh ha heih awpa ngâlâh he châ leipa ta, hmô thei leipa nata hria thei leipa châ hra sala a y cheingei tahpa eima pahnopa, ei thlahpa taih heta kyh a vaw pachâ thlâh ha lah y. Ei vâ a vaw hnei hra tlai my. A theina zydua nata â phana rakha ta hrona lâthlôh eina pahmô tyhpa vâta keima chhaota chhâzaw hrona ryusôhpa ei vaw huah ha hra. Aw! Chyhsa vâhnei patluapa ei vaw châ hra tlai na aw!! Ei kyhpachâpa he a tyh’ va na, tahpa ei vaw chi dâh muarua cha. Kei châta la Missionary rônah chaipa a vaw châ.

“Na kyhpachâna adao awpa ta ei hneirôhna ta â pha leipa ta, na ngiachhiena dao awpa ta ei rietheina ta tloh hra vei” ei tah nozy kha aw!! Ei kyhpachâpa palôh he khatlu ta pasa aw vâ tly? Châhrasala kyhpachâna palôh deikua adona, ngâchhihna, taona nata sasyh âpaphana vaw châ tlôh ta. A palôhrupa ngâlâh a vaw ngia vei, a pilâ taihta mâhmy, a laki tawhta a pheipi taihta keima ta la seisia n’awpa rai ta pahno va na. A hmi pakie silipa nata a mo padeizy cha keima châta cha Vâlyuhchâpa tluta a ngia ta, a pathaih. A ao kho-iah hnei kawpa nata a kyhpachâna reikahzy cha keima châta pyu zydua liata pyu ngia chaipa nata hrona châ tlôh ta. Ȃ tobi dâh hra cha saduthliepa hawhta angiapa nata zachhihpa châ tlôh ta. Atahmâhlâ reikah kawpa ta ‘OVER’ tahpa he la a hmia pahno hrahro leipa ta â lâ. Zachhih kaw tlôh, chichhih tlôh va. Ngâhsyuh achhih kaw tlôh, mohnao chhihna taihta châ tlôh va, Ȃ !!! hmoto â daih thaipa ta ydâh nata tao dâh a thai lymâpa tlâ a vaw châ. Viasa rihchâh hry liata chhao noza hmiachhiepa ta y beih leipa na ta, a hrozie nata a reihkah apuapa to vâta ei châna hawhta nâ pyh tyh ta, kyh na pachâ thai ngâsâ ha ta. Hnabeidypa nata thachhâpa ta ei y nota kyhpachâpa nata dao ngaitapa ta na chakuna chôta, thlahchhâna chhaota thlah na palôhpa ta na mohôh tyh ta, hnabeiseihna thiehpa eina pie heih tyh. Thaphapa nata aly kawpa ta ei y daihti liata ei lynazy cha nâ hlykheipa ta keima hlâta â ly via khiahma tah thei awpa ta ei lynazy cha nâ hlykhei thai tyh ta. A palôh liata riethei kawpa ta ei y daihti liata ei rietheinazy pahleisa awpa ta a sapa, palôh nata thatlôna zydua syhpahmaohpa ta sapa palôh hnatlâna pha kawpa ta ei y thei n’awpa ta, ano cha â paphapa ta, a daihti sôhpa zydua keima châta a hmâh khai tyh. Keima châta ngâlâh a hroh lymâ aw tahpa na chho awpa my beih vei.

Palôh zydua chhaota eina sy tyhna a hmaozy chhao eina sy thao notahpa hawhta naipa nata saih panyu kawpa châ khao hra vei sala, atahmâ taih heta keima châta cha lona noh hnei beih aw vei. Kyhpachâna sôh zie na pahnosatuhpa nata na patlaichhaisatuhpa a châpa vâta khoh kawpa nata dao kawpa ta eina chaku tyhna kuzy cha daopa ta tlô khao hra vei sa la, kei châta hmo hluhpi na taopatuhpa a châpa vâta kyhpachâpa nata lôhkipa ta pazupathâ aw na ta, ei chamao ngâthlâh ha tyh aw, he khizaw liata a hrohchhôh ta la.

He hena a châ na palysa viatuhpa chuh, chyhsa hluhpi to pha leipa nata hnabeiseih ngâh leipa kyhpachâna pahneisa awpa ta chanô zydua hry liata nawh chaipa palôh, dyhchâ khôphei kiahpa ta laihna su a vaw paryhpa vâta.

Hla nata bie liata asâh viapa châ sah la, ei kyhpachâpa thâtih ei ropazy apha via awpa tlai, ado kawpa ta vaw thaohpapua thei leipa na ta pei ei tah hmeiseih.

Tlai chuh, ei khoh chai, kyh na pachâtuhpa nata kyh ei pachâ ngâsâpa, EI NȂ he la a vaw ngia ta, a vaw sôh tlai na..