EI DELETE HAW!
- FC. Chhuasa, Siaha
.
.
Keima cheingei ta, ei ku cheingei he ta a ri thobyh chhôh lâ khô hr’aw sah la thlâsu taihta a thobyh a sytuhpazy ei pazi laihna kha kô kha tloh ha hra sala, a phone nuby deikua delete thlâh hawpa pasaih lei khâh na ta, he châ ei ro awpa chyta taih kha ta ei phone liata nubby peimawh chaipa hry liata â hlao ngâthlâh haw!
.
‘Delete’ tahpa ei za hmie hmeiseih bâ awpa cha, ei khapi ta ‘palôh yna’ keima liata avaw ngia ta, “Ei kha ngâlâh” tahpa he ei palôh liata a vaw ngia ta, bietluna ei tao chiehpa cha pahawhpasâhpa ta y ta. Lôchâta ta a Ph No – 9612392146 cha hmie na ta, ei nakhaoh liata pabai na ta, ei pathihna sâh dai ngâna chôta nathlie na ta, ‘Switch off’ tahpa hleikhô a chhyna hmô khao va na! He nuby ahneituhpa he a hy hropa chô vei, Author, Composer, Inspirator, Patriotic, Poet, Naturalist nata Teacher Dr. S. Hrachu (L) a châ. Hnabeidy kawpa ta ei phone cha ei nakao tawhta la pathlâh na ta, ei kuzy cha a chalyu khai ha ta, ei thatlôna zydua syhpakhy khaipa ta, Delete tahpa cha ei hmie haw.
.
.
Zâkô kha eima pano ta eima hnatlâna pha thai leipa ta, ei thâ vaw thei ta, “Khâzia ma satliapi na pasa thlâh haw? Ei thlâh ei na vaw pazo kaw bao chi” tahpa ta na za phone ta, cha tawhta daihti rei leipa liata liahsa ei thazy a vaw tlô via hnohlâ ta kaw charei na ta, thachhâ kawpa ta nâ kaw tyupâ ta, vâro tlai eimâ pakyh tawhta “Vaw tlâh ha mah y” tahpa ta apathlie raih-rie ha pi ta.
.
FaceBook liata Dr.S.Hrachu hnatlâna pha lei zie tawh papua na ta, khizaw râh nano nanopa tawhta thlâh ama chhâkhei zie nata tlâh para awpa ta khokheina ama hlâna bie hluhpi ei dao. Chatawhta hâta eikha a vaw khôpa cha, “Dr.S.Hrachu cha miah â pahâsai haw” tahpa bie ta khizaw mararâh vaw khaihpahlie thlâh ha ta, pasana tao chanei heih khao lei awpa ta tlao miah â vaw pahâsai haw! A ri y noh, târi noh 6.9.2014 kha noh y ta vâsua hryta a pahrâna opi kiah liata mâchhie sa na ta, thachhâ kawna chôta, ECM Edenthar achhyna O lâ a ri pazi laih na ta, O chhôh eima to leipa vâta vâsua apadaoh heih na ta, palôh chhôh chaipa liata raithlih paloh laih na chôta thlâsu taihta eiza pathlie hra.
.
Ei lykheina palâsa thei vana!
.
Doctorate degree a vaw daopa kha a ly tu ha na ta, Article miakha, “Dawhty châ a thai leipa” tahpa thlai roh na ta, Siaramo Weekly News Paper liata hriatuhpazy ta ei na papuapa hra ei. Tao thei hropa hnei va na, ei tao thei chhôhpa hra kha nawh ngaita tlôh ta. Chhaolo khih ta a Degree kha alypa ei ta, keimozy padisaihpa cha ahlao thaipa châ rimâ tlôh pi va. ECM Edenthar Local Church ta alypa heih ei ta, ei vâ hlao thei n’awpa kaokâh rai y heih tlôh va…. A rônah chaina noh nata palyupalihna asâh chaipa a daona noh zy cha, sapa mokhaoh heta hmô awpa aryh thai hra vei sala, ei thlahpa ta deikua alykheina hla ei sa ngâ kaw hra.
.
A hro chhôh noh tla chyta ta âpahnopa deita châ hra ei sih la, a no ei pasâhsanazy, rônah ei tah zie nata ei palyupalihna bie, châbu nata thâtihbu nano nanopa liata ei 4 roh hmâ na ta, a no tlai chhao a reih paki khai hmâ hapa vâta deikua ei ly kaw. A roh hluh chaipa la châ tiarâh va na!! A thlahpa ta ei hmotaopa nawh ngaitapazy kha rie nâ theipa hra sala ei tah bao cha.
.
Amâ lykheina nohzy liana kha ta, “Hawthaipa, châ athai leipa, a d:r:m system he a do vei” a tah tuhpazy kha, pakha chhâ amâ hlao cheingei hra aw tahpa pangiasana deikua ta thata lyna ei na pie! A chhôhkha sanawh rinôzy ta a noh moh ta pati dôh pahmaona hnôh chaipa ama hnei noh liana kha ta, vâhnei chhih ngaitapa ta MTP lâ tawhta hruana châ dao hra na ta, (pi ta(?) anodeikua MTP ta he hawhpa liana he avaw hlao beih tlôh leipa ei ta, hruana zachhih kawpa cha hlao patlôh thei khao va na!
.
Dr.S. Hrachu kha
.
Dr.S. Hrachu kha thisaih azaona rai hneileipa liata nâ pasyu-pali hluh chaipa, ei hlaotlohna nawh chaipa zy liata nâ lykhei tyh chaipa, na pachu-pahreihtuh chaipa, khokheina na hlâ hluh chaipa nata byhnâ na awpa hluh chaipa a châ.
.
A thaina zie thaipa ta, a pahnona zie pahno tiarâh hra vei sah la, eima pahâna kao â lyu vâ deita ta, kei padisaihpa na he na pahno chhyh laihpa deita a châ. Nâ pathlatuhpazy ta sahma beihrai hleikhô hneipa ama hneilei nota nata châkoh liata chhâmeih rao dâh hleikhô thaipa ama hnei lei nota Vaili mapa reih avaw thai hapa, Dr.S.Hrachu, Mara saw zydua châ ta ryusôhpa atloh paphapa kha châ ha tlôh ta.
.
Hmeiseih ta la nôpaw hluhpi hmia pahnopa châ awpa hlâta cha, a no hmia pahnopa châ awpa kha atlyh via na ta, athai asopa hluhpi hmia pahnopa châ awpa hlâta ta a no hmia pahnopa ei châpa kha nohhlao a tah via tyh na ta, ahneirôhpa, vazôh nata cheihdô-zy hnohta Motor miakha liata kia khôhpa hlâta cha, a no nata Auto rickshaw liata kiah khôhpa kha ei hmiakai via tyh. Chysa rônahpazy hnohta kâchhie kawpa ta pati niena dawkâh chadô awpa hlâta cha, ano nata thopi saihpa nyu achaba khoh awpa kha atlyh via tyh tlôh na ta.
.
Byhna tona nata ngaithai ahawna
.
Ei châbu hmiatua chaipa HMIAKHUTI cha eima râh liata literature lâta eima nôpaw chaipazy ta BOOK OF THE YEAR 2014 châta amâ vaw tlyh thlâh ha bao. He he ano pasyu-palina nata byhnâ awna vâta a châ tah leithei va na. He châbu palâhâh noh he, Dr.S Hrachu ta eima daihti nata châbu hlâna a hnei. Vâhneipa ei châ ngaita kaw dia! (He châbu liana he ta, S.Hrachu nata S.Mokia ei pasâhsa zie,ama hriapasana nata chysa rônahpa ama châna, Mara reih châta amâ hlâna achyuta he reih hmâ khao leipa ta,a hro noh ta ei roh ha tarawpa ta pei ei tah ngaita kaw.).
He hawhta a châ nota, Dr.S. Hrachu ta lytlâh miah a khôsai noh liana kha ta, chysa hluhpi ta ano ama pasai lei zie, ama i zie nata pei ama tah zie thatihbu nata Internet liazy ta amâ ro chhiechhu hôlô hai nona khata, kei deikua cha ei pasaih lei tu hapa vâta achyuta dâhdei chhao vaw chapai thei leipa na ta, ei chhuah tyh taraw, ei thei vei! Dr.S. Hrachu, rie na pachâ thai la, na samohpa FC. Chhuasa he rie angaithai mah y.
.
Na phone nuhby chhao ei vaw delete ha lah he!!
