KHAZIA CHANÔNAH HE AMA CHA TYH?
Eikha cha chapaw hawtipa pakha heta a nô kheina heta, “Khazia na cha?” tahpa wta hiahrih ta. A nô chata, “Chanô ei châpa vâta na ei cha" tahpa ta âchhy thlâhthli thlâh ha ta.
“Ei pahnothai lei dâh,” tahpa ta a nô cha chapaw hawtipa chata â chhy ta. A nô chata a sawhchapawpa cha apyhpa ta, “Pahnothai beih aw va chi.”tahpa ta âchhy ta.
Chapaw hawtipa chata a paw kheina chata cha hiahrihna pyly cha pie heihpa ta, “Khazia maw chanônah he a chhâpa y leipa ta ama cha tyh tly?”tah heih ta. A paw chata, “Chanô zydua he la a chhâpa y leipa ta a cha tyhpa saina ama châ bao” tahpa ta âvaw chhy ta.
Cha chapaw hawtipa cha kaw laiseih laipa ta, chapaw pitlohpa vaw châ ha hra ta, chanônah ama chana chhâpa cha pachâ ngâthlâh ha tyh ta.
Khazohpa chata: “Chanônah ei taona dâh he phapatlua (Special) kaw ta. Ama ngiahtlâh zy cha khizaw liata phaohri a hri chaipa zy phaoh thei awpa ta thatlôpa ta taona ta, cha hawhta a châ nona pyly chata chyhsa hna pangâh thei awpa ta naizualuahpa ta ei tao pyly heih hra. Saw sapa riethei â chhihna zydua tao thei awpa ta chhôh lâta thatlôna pie eina ta, ama sapa, ama sawnah ta ama dytha hapa chhaota dao thei awpa ta thatlôna ei pie hra ei. Mo hropa zydua ta hnabeidypa ta ama kua saino ta chhao tao hualua awpa ta chhyuna pie eina ta, tlâh lei ziah leina daihti nata sapa pôhpa apasano ta chhao chhôhkha mohôh awpa ta thatlôna ei pie hra ei.
Kheihawhpa duasu lia rai ta amâ duah hapa chhaota ama sawnah kyhpachâ awpa tat obi eina ta, ama saw, âmo ta ama sapa zy ta ama pasasapa chhaota tao hnolo awpa ta ei tobi hra ei. A vahpa taochheina nata adoleina liata chhao thai pachâ lyliah awpa nata daodo lyliah awpa ta daotheina nata thatlôna piena ta. Vahpa phapa ta a lahpinô pasasa beih vei tahpa a pahno thei n’awpa ta sona piena ta, a châhta a vahpa adoleina nata taochheina liata chhao a chhâh khâ â châh awpa ta thatlôna ei pie tyh hra. A chhâ chaina liata cha a mothlih, a khohti maihta a pathla awpa piena ta. He he a khoti maihta a hmâ awpa ta ei piepa a châ.”tah haw ta.
Khazohpa chata chapaw hawtipa kheina chata, “Ei sawchapaw y,” tahpa ta buakha â chalih ta, “Chanô chhithaina cha a chysia liata â pahnieh leipa ta, a pôh-raoh liata châ leipa ta, a sâ â môhôhna dâh nata taotiana dâh liata châ hra vei. Chanô zy chhithaina cha ama mokhaoh liata a y tyh –a chhâpa cha a mokhaoh cha a palôh chhikao châ ta, cha liana chata a kyhpachâna cha y tlô ta.”
