Mara chi nata reih pabohsana

- KL Beihruasa

Biehmia: Khizaw tao tuano tawhta a chhôh liata pahrâpa chi torai; chyhsapa, hmohrohneipa nata thokô-rihkôzy taihta amâ khôkhâh thei leipa nata khâ amâ tyh chyupa hmo miakha y ta. Cha cha chi lai viapa, soh viapa nata hluh viapazy ta chi chynawh viapa nata hru viapazy kao totie liata dihsao amâ chhuahna he a châ. British Scientist rônahpa Charles Darwin châbu rohpa ‘Origin of the Species’ tahpa liata a biepi chaipa chhao khâ hropa châ leipa ta, he khizaw he a thatlô viapa, sohvâh viapa nata hmo patuapalua thai viapazy aduapapuana râh a châna zie palâsa ta; chavâta he khizaw he chi nata pho nano nanopazy ta chariah chhaichhi pha pakipa torai ta atobina chôta ama chi nata pho palaiseihna nata hmahpasiesana châta ‘adyuhna pathaihpa’ ama phuahna râh dei avaw châ!

Chi nata pho lai viapazy ta chi nata pho chyh viapazy dihsao amâ chhuah awpa cha ama tao awpa rai châ ta; chi chyh viapazy ta chi nata pho lai viapazy ta dihsao amâ chhuahna tawhta apabohsa awpa ta chariah chhaichhi pha pakipa chhaota avaih awpa cha ama maohphaona a châ hra, ahy he hmahta maochhie awpa y leipa ei ta, eima tao awpa chyu riahpha kawpa ta hmiachhy awpa cha eima ngiatlâh liata a pahniehpa a châ.

Reih he chi nata pho ataotuhpa a châna zie reipasia ngâkaw byuh leipa ta eima pahnopasia khai. Khizaw liata chi nata pho hawhta maniah a phualuahtuhpa cha reih he avaw châ. Reih heta chi nata pho nano nanopazy likah liata râh-ri miah haipa ta, pachâna nata taozie nano nanopa miah a sapapuapa tyh. India râh ta British ryureina tawhta khotalaina a hmô tawhta a râh chhôh amohôhna râh-ri (State, Districts etc) asianô kawpa ta taopathi awpa ta apaduapa State Re-Organisation Commission ta a thliena hmiatua chaipa cha reih (language & dialects) he a châ. Chavâta reih he chi nata pho ta maniah paduatuhpa nata chi hropazy tawhta maniah apananotuhpa a vaw châ.

SIL International’ zy ta amâ chupasiana liata kô 2005 liana khata khizaw liana heta reih hmâ haipa 6,912  y ta, he hry tawhta â khophie 3000 tlai he cha kô 2100 eima tlô hlâta aleidia/amua ha awpa ta ama pachâpa a châ. UNESCO ta a châpasiana lia chhao Reih 200 rachhôhzy cha chhâ (generation) thôh a khô hapa liana khata vaw leidia ha ta, atahmâ duahmo lia chhao reih 538 zy cha thlaita thi thei awpa duahmo liata aduah hai ta; reih 502 zy chhao thi thei awpa ta pachâchhie a chhih hapa hawhta pachâpa châ hra ta, reih 632 zy cha thi cheingei awpa ta pachâpa ama châ. Reih 607 pazy chhao aboh khao leipa hawhta raopa ama châ hra. Chakhiatala, he khizaw liata chi nata pho chynawh chaipa hry liatapa Mara reih he â boh khao nahta eima pangiasa ma? Â chhyna cha ‘a boh khao tiarâh ma pi’ tahpa a châ.

Reih nata Chi pho châna cha khâchâ apakaohpa châ ta, reih â boh ha khiatala chi nata pho cha â boh tahna a châ. Mara chi nata pho châna padâhsapa ta Mara reih a leidia haipa tawhta eimâ boh thei n’awpa ta eima chariah chhaichhi awpazy a chyuta sai ta vaw moh tua sih la.

Ahneina chôchâh liata Marasawzy eimâ sohaoh via â ngiah. Eima chheipâh liata chi nata pho lai viapazy ta maniah ama chadôpa vâta, Marasaw ta chi hropa lahpinô/vahpa ta a hnei nahta a pathlazy ta a tlâhpipa ta chi nata pho lai viapa lahpinô/vahpa reih eimâ hly ha tyh. Chavâta chhâ hluhpi avaw y awpa taihta eima reih pabohsa khohpa ta, eima chi nata pho châna eima palaiseihsa khoh khiatala chi hropazy nata ahneipahlao lei awpa â ngiah. Keimo nata keimo a papeipahly thai sih la, hrochhôh akaolâh ta chi pathlakhoh awpa ta Marasaw cheingei eimâ tityh awpa he eimâ boh n’awpa chhaichhi miakha a châ.

Achuna (Education) siezie he reih, chi nata pho laiseihna nata dihsaona chhaichhi tiah ngaitapa a châ. Mara reih a laiseih via lymâ thei n’awpa nata a leidia pathlei lei n’awpa ta cha eima râh liata achuna reih (medium of instruction) he a chhie chai ta Middle School taih chhâta Mara reih â hlao cheingei awpa â ngiah. He tawhta a chô lâ taih chhaota achuna bu liata Mara reih pahlao theipa châ sala cha, thyutliapazy heta Mara reih daihny chacheita aw ma pi.

Bie nata Hla (Literature) liata thapi eima phia via awpa â ngiah ngaita kaw. Reih a thi hapa hluhpizy leidiana chhâ chaipa cha ama reih hmô thei awpa nata rei thei awpa ta ama vaw paso chyh tu hana vâta a châ via chai. Bie nata hla heta chi nata pho liata siana nata thapasana palôrupa chi tu tyh ta, khizaw mohmô liata chi nata pho nohâh a taotuhpa a châ. Chavâta Mara reih palaiseihsa ta pabohsa awpa ta cha biie nata hla liata ahrana eimâ ngiah hmeiseih. Eima reih tlaita rei thei awpa Châbu nata Thâtihbu a hluh awpa angiah ta, chi nata pho châna phualuahtuhpa chhaichhi châta Mara reih he Radio nata Television liata thei awpa a hluh awpa a peimawh ngaita kaw.

Awnanopa achhithana nata ryureina chhao he chi nata reih abohna chhaichhi thatlô ngaitapa a châ hra. Krizyhpa râh liata cha awnanopa he eimâ bôna saopi chaipa châ ta, awnanopa achhithana nata ryureina liata Mara reih azipa a châ lymâ ha khiatala Mara reih pabohsana nata palaiseihsana hleikhô ta râh pakawhna chhaichhi pha chaipa miakha a châ aw. Chavâta awnanopa heta palôh hnei sala, Mara chi nata reih pabohsana zie ta achhithana nata ryureina sianô kawpa a siekhei tyh awpa a châ.

Zawpi ryureina râh liata a pahrâpa eima châpa vâta Politics liata ryureina siekheina dâh chhao he chi nata pho apahniehna nata reih pabohsana kyh liata chhaichhi peimawh ngaitapa a châ. Râh ryureina liata Râh pazu ta O pazu pho leipa sala, Mara reih cheingei ta ryureina dawkâh eima chadô hluh ha khiatala miah chhotuhpazy ta maniah pahnie chacheita aw vei ei. Politician-zy heta chi nata pho thapasana nata kyhpachâna chôta râh ryureina he siekhei lymâ ei sala, sasyh avaoheina hlâta Mara chi nata reih abohna he ama saihei via lymâ ha khiatala Mara chi nata reih he leidia/thi chacheita aw vei.

Zawpi apôhpakhyna daihti nata su liata Mara reih he a paro hluh awpa â ngiah ngaita kaw. Pho hropazy saiheina vâta reih hropa eima hmâ tyhpa he eima pathleih awpa a byuh. Â ngiahna daihti y tyh hrasala, eima râhchhôh lia he cha ângiah leina daihti a hluh via. Zawpi apôhpakhyna liata Mara reih hmâ hluhpa he Mara chi nata pho abohna awpa ta eima tao hialia awpa a châ.

Ochhôh nata khiliah liata Mara reih eima hmâ hluh awpa â ngiah. Pho hropazy hmiakô lia chhao Mara reih cheih/hmâh lymâ ei sih la, sôhdaona nata daihti eihpa lia chhao Mara reih he azipa ta avaw châ thei n’awpa ta pho hropazy chhao Mara reih he eima pachu lymâ awpa â ngiah ngaita kaw. Zawpi apahnosana (Public Information) lia chhao Mara reih hmâh hluh sih la, eima râh liata chi hropazy ta Mara reih thai cheingei a byuhpa ta ama pahno thei n’awpa ta zawpi apahnosana he a hluh thei chaina hawhta Mara reih ta phuazâh lymâpa châsala, Mara reih â boh hleikhô ta a râh eima pakawh via ngâkaw tahna a châ aw.

Mara râh chhôh liata khih nata su mohzy he Mara reih cheingei ta thla khai hapa ta, Official liata hmâ khai hapa châ sala, cha chata chi nata pho châna siapa thata a palâsa via rili aw. Khiliah nata su nano nanopa liata apahnosana nata châropa tawpazy he Mara reih ta a hluh thei chaina hawhta taopa châ sala, Mara reih cheihchalona nata hmahsiena hleikhô ta reih pabohsana chhaichhi pha kawpa a châ aw.

Eima District Council nata Sawhkhâ Department hropazy liata rai lana lia chhao Mara reih athaipa Marasaw cheingei eimâ khokhei lymâ awpa he a peimawh ngaita kaw. Awnanopa liata hriatuh awpa lana lia chhaota Mara reih a thaipa la lymâ sih la, cha chata ryureina liata Mara reih chei byuhna (demand) sapapua aw ta, Mara reih abohna nata laiseihna chhaichhi pha ngaitapa a châ aw.

Pyungiapa nata hla liata Mara reih he hluh sala, nahthlie awpa nata mo thei awpa a hluh khiatala Mara chi nata reih thata pasâhsa aw ta, pho hropazy mohmô liata thata eima cheihchalo tahna a châ aw. Nohthla achâna (Drama) nata Lâ (Dance) lia chhao thapi phia via sih la, Mara chi nata pho châna palâsana chhaichhi pha kawpa châ ta, pho hropazy mohmô ta miah a phualuahtuhpa a châ hra.

            Bie tlâhpakyuna: Mara chi nata reih he hmahsie via lymâpa ta nata khizaw chi nata pho a ie-khyna thlipipa tawhta â boh thei n’awpa ta cha chi nata pho châna liata sia ei sih la, thapasana nata kyhpachâna palôrupa ta miah chahry-pabaoh chyu sala,  eima reih hneichhôpa Chô Khazohpa ta miah piepa Mara reih he zakhei leipa ta pasô via lymâ ei suh u.

            Abeipa ta Mara chi nata reih he hrôbieh lymâ mawh sy!