UFC : Johnson nata Borg a hmiachhy heih khao aw vei ei

Johnson nata Borg

Mylâ my ta UFC 215 Main Event châta ryrao chhielie khai hapa, UFC Flyweight Championship liata ahmiachhy awpa ta liahsa patohpatia khai hapa cha, Champion haipa Demetrious Johnson pahaotuhpa Ray Borg ta tlâhleina vâta â sypakhua ha heihpa vâta hmô khao heih aw ma pi.

Borg heta hâta eikha hlei tlai a tlâhleipa vâta flyweight champion Demetrious Johnson he hmiachhy thei aw vei, tahpa phuah ta; he heta UFC khizaw a pahlaw kaw.

MMA Fighting thâtih phuahtuhpa, Ariel Helwani chata Johnson pahaotuhpa Borg he dawhtyzy ta chhao tlâh vei tahpa phuah ha ei ta; mylâ mydi ta Edmonton, Canada liata zawpi hâdy chaipa Flyweight Championship achhuna y khao aw vei, a ta.

Borg mohôhtuhpa Dr Michelle Ingels chata he a pasana he âhrina a pahnaipa vâta vaw ypa châ vei, tahpa ta, “Ray Borg heta pasana a hneina chô heta Johnson hmiachhy awpa heta athata achhuahnoh hra ta; anodeikua a pasana he tlâh viana lâ hlâta paru viana lâ a ngai lymâpa vâta hlao apatloh thei khao leipa a châ” a ta.

Nunes Vs Shevchenko

Borg nata Johnson-zy amâ hmiachhy thei lei awpa vâta UFC Fans-zy ama thachhie kaw nota, mylâ my UFC he a mopha vei, tahna deikua châ leipa ta; chanô lâ liata Bantamweight champion Amanda Nunes ta ano pahaotuhpa, Valentina Schevchenko a hmiachhy awpa cha moh byuh âchhih kaw pyly.