FA CUP : Player 9 ta â khaihpa Chelsea ta Norwich ama pahnie

Chelsea ta Norwich cha Penalty ta tlô viapa tluana liata pahniena topa ta, FA Cup third-round akhaih pathina liata reipasipasuana hryta 4th Round amâ ngia.

Blues kaohâtuhpa Willy Caballero ta Norwich penalty hmiatua chaipa Nelson Oliveira vaw pakhâpa ta, he he tlô viapa tluana liata penalty â ngia leipa a y chhôhpa a châ.

Michy Batshuayi ta minute 55-na liata Chelsea hmia a sahna khô ta. Norwich lâ tawhta Jamal Lewis ta daihti chhâ chyta liata Timm Klose ball vaw chapiepa cha pangiapa ta, daihti chhâ ta, 1-1 châ ta, Extra-time amâ khaih haw.

Extra-time liana heta Willian cha Norwich kao chaby liata Klose patupa ta papao ta, anodeikua Willian he Referee ta pao raruahpa hawhta tôpa ta, yellow card a pie.

Video official Mike Jones ta chhao referee Graham Scott bietluna cha â dopa hawhta a hmô ha hrapa ma a châ ma, video liata chhao mochanei muarua leipa ta amâ pyh haw.

Anodeikua he he penalty awpa tlai a châpa hawhta football a pahnopazy ta cha ama reih.

Blues heta extra time liata Pedro nata Alvaro Morata-zy papuapa ama châpa vâta pachaki ta akhaih ei ta, extra time chhâna taihta chhao 1-1 ta amâ pahniethaipa vâta penalty hmâpa ta tlô viapa tluana liata Chelsea heta 5-3 ta pahniena ama to hapa a châ.

Chelsea heta FA Cup 4th Round liata târi 28 Nawh khita Newcastle United ama hmiachhy heih aw.