Facebook Selfie tawhta Police-zy ta a viasanô thietuhpa ama pahno papua

Cheyenne Rose Antoine (chavei) chaisaina tawhta ama pahno papua : a sa saihpa he Gargol (Facebook)

Canadian chanô pakha cha Social Media liata a viasanô nahta nohthlah amâ lapa tawhta a viasanô thietuhpa a châ, tahpa pahno papuapa châ ta, Police-zy ta ama patu.

He chanô, Cheyenne Rose Antoine, kô 21 ta uhtheipa heta a viasanô, Brittney Gargol, kô 18-ta uhtheipa cha Pamih 2015 liata a thie tahpa pahno papuapa a châ.

A viasanô Gargol he Saskatoon, Saskatchewan liata a ri hmô ei ta, a ri kiah liana heta chaisaina, a rao riena chhao hmôpa a châ hra. Antoine he lianycheipa ta baipa châpa ta, kô 7 â tâ awpa ta hriepa a châ pâ ha hra.

Police-zy ta he hmo ama hmôpapuana dâh cha Antoine heta a viasanô nahta nohthlah amâ lapa (Selfie) cha facebook liata tawh papua ta, he liana heta Gargol ri kiah liata ama hmôpa chaisaina â sai ta, he tawhna heta Police-zy heta alaichadaipa ta, ama pahnopapua hapa a châ.

Antoine heta Court liata a viasanô he ano tlaita a thiepa a châ, tahpa â phuahpa ta, he hmo a tlô nona heta ama pano ta sahma ama pari hleikhôta, Marijuana paripâ ei ta, ama a pahâhpa ta amâ eichhiana liata Antoine heta a viasanô he hmo ta phypa ta, a chaisaina hmâpa ta a riesao hapa a châ, a ta.

Police-zy heta ama pano ta ama pua khoh, tahpa ama pahnopa vâta Facebook liata ama nohthlahpa ama post-pa tawhta khataih su liatazy ma amâ khiekhâ laih tahpa pahno a chhuahpa ta alaichadai ei ta.

Police-zy heta Antoine ta Facebook liata Gargol mopakha page liata a mylâ mydi ta - "Khataihlia na y? Zâhnia zâ kha â pahlei ha pi ta. A tlâhbohpa ta O na tlô na ta ei hnabeiseih" – tahpa ta a post-pa hmô ei ta, he he ano leipa lâta dôvei âchhuahna hawhta ama pachâ.

Antoine heta a viasanô Gargol he ama pari tu hapa vâta a thie tahpa chhao â pahno vei, a ta.

"Keimasasyh he khati hmahta a ngiathai beih khao aw vana. Khâpa hmo rai reihpa ta tao hr’aw sala ei viasanô kha vaw kua khao aw vei. Pei ei tah tu sao ha... kha hmo kha a tlô lei awpa tlai na a châ," tahpa ta thailei pachâsapa a châ tawhta a reihpapua.