Ligue I : Neymar ta goal 4 khôpa ta PSG ta 8-0 ta Dijon ama pahnie

Neymar ta goal palih khôpa ta, Edinson Cavani ta Paris St-Germain châta goal khô hluh chaipa châna duasu topa ta, Ligue 1 hmiasatuhpa PSG ta 8-0 ta Dijon ama taola.

PSG he Half time liata 4-0 ta hmia a sah ha ei ta; goal-zy he Angel Di Maria ( ei 2), Cavani nata Neymar-zy khôpa a châ.

Neymar heta 2nd Half liata khôchhi heihpa ta minute 31-chhôhta hattrick tao ta; Kylian Mbappe ta 7-0 ta hmia amâ sahna châ awpa ta za khô heih hrapa ta, ama goal 8-na he Neymar ta penalty tawhta a khôpa a châ.

PSG châta goal khô hluh chaipa a châ haipa Zlatan Ibrahimovic duasu a kaw khopa ta Cavani ta PSG châta goal 156 khôpa ta, PSG châta ataopasuana nano nanopa liata goal a khô hluh chaipa Zlatan â kaw kho haw.

Cavani heta penalty chhochhi chapie sala goal khô hluh chaipa châna to thei awpa he châ ta, châhrasala Neymar heta tlei leipa ta, ano ta a chapie hapa a châ.

PSG Coach chata, "Neymar ta penalty a chapiena chhâpa kha a châta chhao noh ngiatlâh kawpa a châpa vâta a châ” tahpa ta, “Eima palôh a tlâh sahlao kaw thlâh ha. Cavani châta goal khô theina daihti a hluh tu ha chy."a ta.

Hetana heta PSG heta Point table liata point 11 hmôpa ta, sânona liata a ypa Lyon cha Abeipa noh khita ama hmiachhy aw.