Siaha DC Pihnô Harleen Kaur ta Tisi khih liata Sub-Centre sapa a pahy

22 Nawh 2018 (DIPR) Atamy dawh 11:00-pa khata Siaha DC Pihnô Harleen Kaur IAS chata Tisi khih liata Health Sub-Sub Centre tlaw thysy 7 ta sapa cha a pahy.

He sub-centre sana he zâkô 2017 liata Siaha District ta Prime Minister Award for Excellence in Public Administration ama daopa, phusâ tlaw thysy 10/- pa tawhta sapa a châ.

He Sub-Centre pahyna apakhyna liana heta Pihnô Harleen Kaur chata biereina hneipa ta, “PM Award for Excellence in Public Administration ta sôhthih â chakaihpa tlaw thysy 10/- he a phahnai thei chaina hawhta hmâh awpa khoh pi ta.  Tisi khih ta Sub-Centre amâ ngiah kaw tahpa eima pahno na ta, Health nata Education he eima pachâ peimawh chaipa avaw châpâ hrapa na, Sub-Centre sa n’awpa ta hmâpa he ei pathlu hapa a châ. He Sub-Centre heta athata Tisi khih cha hnatlâh kyh liata hmah a siekhei na ta ei hnabeiseih” a ta.

He Sub-Centre sana rai he Tipâ  BDO  office ta hria ei ta, a kawhna lâ he feet 24×12 châ ta. RCC building châpa ta, a chôkhu deikua râhvâ hmâpa châ ta.  Room 2 ypa ta, nawhneina (Delivery room) room liata cha a siphiah chhao tile hmâpa a châ.

- DIPR