Khiliah i zy ta chapaw hawti kô 7-pa siesao

Shimla, Jan 20 (PTI) Himachal Pradesh liata hmo a tlôpa rarô y kawpa liata chapaw hawti, kô 7 ta uhtheipa cha khiliah i (Stray dogs)-zy ta ama siesao. 

He hmo he Sirmaur District, Himachal Pradesh liata atanohta hmo a tlôpa a châ.

he chapaw hawtipa Vikki he Uttar Pradesh tawhta Himachal lâta â paihpa sawchapaw châ ta, ama khih Amarkot khih liata bazaar lâ tawhta âvaw dina lâthlôh liata izy heta vaw tlahnaopa ta ama siesao hapa a châ.

I ta ama tlahnao hai nona heta athata sâh ta,  a sâpa pyu theipa ta pachha a chhuahpa ta tei ei ta, pachha achhuahtuhpa chyhsa pathôhzy chhao i zy heta vaw siepa ta hmah ama phaoh hra.

chapaw hawtipa heta a luh, rao nata pyh liatazy hmah rarô y kawpa phaohpa ta thohna-O ama ngaikhei nota a hu a chhâ hapa a châ.

He chôchâh liana heta he khih liata DSP Paonta Pramod Chauhan chata biebuapa ama roh pangia ha, tahpa a reih.

DSP heta he i ta ama siesao hapa chapaw hawtipa chhôhkhazy hnohna heta taokheina châta Rs 20,000 ama pie tahpa a reih pâ hra.

Amarkot khih liata luhpa, Rakesh Mehraloo chata khahlâ tawhta biehneituhpazy hnohta khiliah i zy cha kohki awpa ta tlôkhei tyh pi ta, uasa hlao vei, a ta.

He hmo a tlôpa vâna heta he khih liata nô nata pawzy cha ama thlazoh kaw ta, ama sawnah chhao siku pakiasa ngâh khao vei ei.

India liana heta khiliah i eima tahpa he 30 million a ypa hawhta pahnopa châ ta, kô 2014 khata chyhsa 20,000 rachhôh cha i siepa tawhta pasana ama hneipa vâta ama thi tyhpa hawhta pahnopa châ ta — he athipazy he chyhsa dyhchhiepa nata hawtipazy ama châ via chai tyh.