Ahy pahno leipazy ta Tliatlu tlâh mei ta ama rao!

Mararâh liata tlâh â sâhpa hryta a hlaopa nata alâluah kawpa, Tliatlu Tlâh cha MTP Branch : Chheihlu ta pabohsana raihriapa ta kô 7 chhôh ama mohôh ngâpa cha zâhnia zâ khata ahy pahnoleipazy ta mei ta raopa ta, tlâh liata thothih vâro tlai a kâ.

Tliatlu Tlâh mei ta a kâ haipa he he thâtih pachhuahpanoh hai nona heta Chheihlu MTP manôhzy ta pachhaina rai hria hai ei ta, ama pachhai thei na ta hnabeiseihna a chyh kaw. Thothih râhhmâh phapa a châpa vâta he mei heta pei athata a hria.

Chheihlu MTP Branch heta he Tliatlu Tlâh pabohsana he kô 2010 liata VC nata MADC Forest Department ta ama ku liata maophaohna rai ama vaw pie tawhta hria lymâpa ta, kô 7 chhôh tlai thapi phiapa ta Tliatlu Tlâh liata thokô rikô, pazu-pavaw nata hmohrohhneipa nano nanopazy pabohsana rai ama vaw hria lymâ. Cha ama hriapasana zydua cha ahy pahnoleipa ta mei ta ama raopa vâta hrao leipa deita a châ ha awpa alyu kaw bâ.

Tliatlu Tlâh liana heta pazu-pavaw, râhsa nano nanopa hleikhôta Pawchha-makei, maitô nata pawpi nano nanopa hluh kaw ta, he zydua he mei heta a kâ khai h’awpa alyu kaw bâ. He hawhta Mararâh liata Tlâh ngiatlâhpa nata thokô rikôh, pazu-pavaw phana su mei ta a raotuhpa he sawhkhâ chhaota alaichadaipa ta, â phuhna hawhta hriena pie sala a pha kaw aw.

- With inputs from Khaimeichho Beiro