Atahmâhlâ eima Mararâh khih thokha liata ama buakhei ngâhaipa ‘DEDAU/DIADY’ (ARUM)

- By Beibei Khaimeichho

Sâlâ kawpa hawhta eima chyhta via nota râh lâ eima sie tyh nota cha he DEDAU/DIADY, a thu roh pahnâhpa daihti a châ nota cha eima hnapasu a chahupa ta “Hummm...a thu dâh rimâ cha la!” tahpa ta eima ai kaw tyh. He Diady/Dedau he Vao lao châta chhao hmâh tyhpa châ ta, thokha ta cha âhmie châta chhao ama hmâh tyh hra.

Mawhro khih liata DEDAU/DIADY ama pachawh nopa

Cha hawhta a roh chhie kawpa, eima vaw ai kaw tyhpa kha kô 2010 rachhôh tawhna khata chyhsa thokha ta chalei awpa ama vaw tlua laih thlâh ha bao!..no-âh â chhih tah leithei awpa rai châ vei!. He DEDAU/DAIDY he atahmâ cha chyhsa thokha ta nietluana nata chhôhkha achyh n’awpa châta ama vaw hmâh ha bâ cha maw!!

India râh liana heta Market a y hra leipa ma a châ ma? He DEDAU/DAIDY he Myanmar tawhta za la tyh ei ta, ahrohpa he Rs 30/Kg châ ta, araohpa (Pachawh chiehpa) he Rs 350/Kg ta khih thokha liata ama za chalei tyh. A chi (Seeds) deikua he Tin khata Rs 1000 tawhta/Rs 800 zy ta ama zuah heih tyh hra. A su liata hmahta he zie ta ama la thei khiahta la âmo ta ama zuahpachhuahna liata chhochhi cha khazie sualuah ta ma ama zuah vâ tly?

Achaleituhpazy heta DEDAU/DIADY he khatluta hmahta hluh hrasala ama chalei khai thlâh ha tyh! Thokha cha ama chao/pachawh hlâta phusâ zy ama pie chhielieha tyh. He hawhta a zuana kyh liata rairuna a y leipa tlai he eima râh liata vaw hluh kaw ta, a ti nata râh leilô chhao âvaw zie kaw ta. Kô 3-pa Dedau/Diady chhochhi cha kô kha liata a bia he Kg 10 rachhôh â hripa chhao y ta.

He liata pachâna pie kawpa cha sawhkhâ ta Iahso thih tao awpa ta iahso chi vaw raih laih lymâ ta, anodeikua O dyh khata Iahso hluhpi vaw chheipapua ei ta, zuah khaipa cha rei lei, zua n’awpa liata ama bua kaw tyh. Iahsoh ama buakheina tha nata zâh zy he i âvaw chhih ngaita kaw tyh.

Diady pachawh nopa @ Mawhro

He Iahsoh hlâ heta cha DEDAU/DIADY he IAHSOH eima buakheipa hlâta buakhei via sihla thotlâhpa khih liata a pahrâpazy châta cha tlao miah a pahnaikhei kaw na ta pachâna ei za hnei tyh.

Chicheipa zuah awpa thokha riethei kawpa ta buakhei pi ta, zua n’awpa liata eima buakheipa hlâta la zua n’awpa liata eima bua hlei lei n’awpa DIADY/DEDAU he buakhei ei sihla a phai chaina ta ei pangiasa....