"CORRUPTION"

- By NC.Beimopha

"Tâkâ sôh tlaichhaina he moleina to thabypa châ tlô ta" 1Tim:6:10

Corruption tah pa reika he Latin reih CORRUMPER tapa tawhta a vaw ypa châ ta, Hmâtlâleipa, Araohpa tapa ta tlyma, Palorupa lâ ta pipasina tapa chhao tah eima pachâ thei hr'aw,  A marâreih kawhpa  ta chhopasia n'awpa dâ rai he a y leipa vâta 'Nieparuna' tapa heta eima pahnothaina dâtlâpipa cha a châ via chai.

Kô 1982-liana khata Presbyterian Church synod mizoram chata 'corruption  dyu kô' vaw phua ha tah, he daihti no na heta chyhsa hlupi chata Corruption âdyu nawpa dâh lâhlâta a yzie chhopasiana lâ tlao ama vaw buakhei via!  Minute 5 ta office  a tlô hawhpa zy cha Time corruption,  office tawhta paper sâkha âdikheipa chhao corruption pyly na a châ tapa ta ama vaw chhopasia tyh na vâ chata kha daihti sôh ngâsâpa zy kha chybia hnei lilâ leipa ta a losiah khai ha tapa chhao chysa hlupi châ roh pa tawh chhao ta hmô awpa hlupi a y hra. Atahma tai chhao heta âdyuna lâhlâ ta a chhopasiana lâ eima buakhei via chypa hawta âlâ.

UNODC chhithana, "The Global programme against corruption- UN anti Corruption toolkit"-liana chata khizawh pôpalôpa ta lôraoh kawpa ta 'corruption' chhopasia nawpa dâ a ylei zie  nata United Nations convention against corruption-ta Corruption yzie chhopasia awpa abyu leizie nata Corruption ta a pahlypa hmo zydua palâhâ awpa he tlao a pha via ata zie a vaw rei hri. He ama vaw rei pa zyhe tlao á pyh ta, Râh hmasiena a pahnypakhaw theipa corruption lâ he tlao eima palô he pie via ei sila a pha viapa ta âlá. Corruption heta âdolei kawhpa ta âkhokheina zy, panaopapâna piepa nata daopa zy, tovyu nata  raipiena liata a hnawna zy, keimo sasy tlyma  khokhei viapa zy  châta tlyma ta a thôn'awpa châta mohropa zy tovyu patleisana zy,  Âtlyhna daihti liata phusâ hmâpa ta vote chaleina zy, vâtlâ hmobao paraopakeina  zy, zawpi phusa  asie nawpa lâ pasiesa leina zy, Raihria awpa pachhuapano chiepa hlâta a chhie viapa ta taopa zy he phie apahly khai. Sawkhâ ta zawpi zy châta pha awpa ta ryh araona a taopa liata ahlaotloleina zie Dâh khôtho lâ ta hmotaopa zydua he a pahly khai.

Corruption-ta rah  a chheipaliena dah:

Corruption heta rah hmasiena paduh sawsa ta, A rah chhô liata chyhsa zy âdyryhleina  tlôkhei ta, politics a papuapalei, Rietheipa nata hneirôpa lika  pahla ta, he zy hleikhôpa ta eimá chadaih hmeiseipa acha khiata cha, Atahmâ hlâ khizawh a paraopakeitupa chaipa a hrohropa zy  chhao ; terrorism, global warming, insurgency zy he Corruption vâ pyly a châ.

Mizo National famine Front (MNFF)  tawhta Mizo National front movement a vawh puanadah zy kha, kha daihti nota Assam politician-zy nata official zy corrupt na vâ chhao a châ thei aw; Mizoram uasa leipa ei tah,  mania mohô pha vei ei tapa cha (MNF) slogan a châ. India Maw-nochhi North East students' organization (NESO) bie (voice) thapatlôsa tu chaipa cha (The government has shown step motherly treatment to us) India sawkhâ cha nô-eih nô hawta ama vaw pakhôpâ! Mizoram nata Mara rah liana chhao heta economic development zy he a siezie phata, a sie naw dohpa liata a sie ma?

Corruption patlôsatupa eima châ ma?

Keimo âchuhaipa zypi he cha nieparu thei awpa duasuh liata eima ypa ta âlâ vei, Anieparutupa zy reipachhie nawpa dâh a pahno ngâsâpa sai eima châ nata pangiasa a chhi. Chahrasala, eima rah liata Nô-paw hlupi zy a panieparu sa tupa cha keimo ama sawna zy he eimâ za châ tyh, ahy he hmata eima Nô nata paw zy he nieparu awpa ta pasyu bei aw mapi; chahrasala, heih zy uavana heta sôh nata thih hiatliana lâ mania â chhi tyh. Eima nohto sôh la pangiahpa nata âhmieleipa ta khisana zy nata eima khisana duasuh pachâ leipa ta a hneiviapa zy uavana heta,eima Nô-paw zy cha va Nieparu la ta tlôleipa ta eima pa nieparusa ngâhlâ ha tyh ma?  Â mo pasia chyu ei su u.

Corruption a vaw yna chhâ tlâpipa zy;-

Corruption a vaw yna chhâpa hlupi zy hry liata Transparency international India nata Centre for Media studies zyta ama  pachhuapano ' India Corruption study 2005 to improve Governance' pa ta a vaw palâsapa zy he mo tua ei sila,  he a chupasiana liata a vaw palâsana liata cha, Corruption a vaw yna chhâpa sâsari vaw palâsa ta, Cha zy Cha: Transparency nata accountability sianônâ leipa zy,  Corruption report-na  y pha lilâ leina zy,  sawkhâ official-zy ngâ-a-chhithaileina zy, panaopapâna he eima hro liata khâ châ âbai hapa vâta zy, judiciary thatlôpa a y theileipa vâta zy, economic policy phapa a y leipa vâta zy, nata sawkhâ raihriapa zy training nata orientation hneipha leina vâta zy na a châ tapa ta a vaw pâlâsa.

PRISM-ta Mizoram liata Corruption a yna chhâchaipa sâthô ta a pachâpa zy Cha; chyhsa corrupt-pa zy Dâh hmâpa ta hriena amâ tyh beileipa vâta zy, eima politics âkhaina dâh âdoleipa vâta zy nata Awnanopa nata NGOs hluviapa zyta Corruption he ama papeihsaleipa vâ hawta a vaw pâlâsa.

Nieparu hmâpa zy chhâna :

1. Ferdinand Marcos:. Ex president, Philippines, kô 1965 pa nata 1969 khata Philippines president châta a tlypa châta, hmotaothei ngâsâ pa nata ano a tiah theitupa rai y vei ei. Chahrasala, nieparuna lâ athata â vaw hniahni hnasa ha ta. Ama nôva ta ama daihti noh ta cha khizawh liata Nôva  a hneirôpa ama vawta tyhpa ama vaw châ. A lapinô Imelda he khizawh liata pheiky (high hill) a hnei hlu chaipa ta ama vaw reipa chhao a châ hra.  President a châ no ta Kô 1986 lia khata a zawpizy hiehâpa cha a chihpa vâta Hawii liapahlô lâ ârâ haw, chyhsa rônapa nata hmo a taothei kawhpa a châ tyh pakha ih rupa hawta râh hropa liata kô 1989 liana khata a vaw thi pâha hra.

2. Toshikatsi Matsuko; Ex-minister of Japan, Japan cabinet liata chyhsa peimaw ngâsâpa châ tyhpa he uava a chhi kawh. Chahrasala, a hmotaotheina a hmâ chhei ha hra, asaihpa/a mâ y leipa ta ama dao tyhpa Ti, Âpalalôna nata etc.. kô 5 chhôta 2,40,000 zie hma pa hawta a rohpa vâta case a hnei. He chôchâ liata ama hrao (investigate) awpa cha ngiarohtu hapa  vâta May 2007 liana khata apahrâna O chhô liata Âpa-aosao haw. Adyupi 2-na khai tawhta Japan cabinet Minister âpa-aosao tua chaipa a châ.

3. P.V. Narasimha Rao;  Ex PM of India,  Nieparuna chôchâ liata biebuapa hlupi hnei tyh hra sala, kheita kheita lâta ma âbo ha chhy hra ta. Chahrasala, A hronochhô chhâna cha maophyuna nata nôpona heta kha â chadaih.  A daihti chhô khata hmotaothei kawhpa nata rôna kawhpa hma cha hra sala, Nozana nata nôpona  hena a thi khei ha ta ngâh awpa ta kô 2004 December noh 9th pa liana khata heart Attack vâta a vaw thi ha hra.

4. Abdul karim Telgi;  Stam paper Nothlapa taona liata amohôtupa laichaipa cha âthô daihti no cha âthô ngâsâpa he châ tlai hra ta. Ano âdyutupa hmai cha phusâ nata meithei hmâpa ta âbyu palie lymâ hra tyh.chahrasala, a pahnieleipa Tlaikao riaphapa H.T. sangliana cha â tyh ha ta,  Patuh ha ei ta. Kô 13 chhô raipasapa hria awpa nata lacs 100 chei awpa ta a chôchâ cha pathlupa ta a vaw y haw. Ano he Maharashtra nata Karnataka chhô liata biebuapa â-ao pasa chaipa chhao a châ hra.

He eima pâlâsapa hleikhô heta; Thaksin shinawatra, Ex-Pm of Thailand  a nieparuna vâta a rah chyhsa zy chihpa ta rah hropa lâ ârâ hapa zy, Madu Koda, Ex-cm, jharkhand thâti zy, Lalu Prasad yadav, Bihar state  India state zy hry liata nieparuna lâta a sâkhana a kia kheitupa lô-O a pazuna dâh zy, 2G scam  reina châki hmaita a chhiena zieta a moh âlâ ngâhlâ ha awpa Union minister paropa A. Raja sôh khotuhana vâta a maophyuna dâh zy nata chyhsa hropa rei awpa hlupi chhao ama y hra.  Rei khai thei awpa a châleipa vâta a daih chy sala.

Khazopa  kholeina zie ataotupa chyhsapa zy he hneirôpa nata vâhnei kawhpa hawta âlâ tua tyh hra ei Sala hrochhô maophyuna nata rairuna heta a pazi cheingei tyh ei. Khazopa ngiathai chatlaina ama toh lei lao chhochhi khiata cha chhâzawh hriena suh cha  chhâzawh ta ama toh awpa a châ." Hmoparaopa zy vâta na pachâ a parô sa kha la, moleina a taotupa zy cha uava hra khâ. Sibiepa hawta thlai chhawpa ta y aw ei ta. Âhnalasi hropa hawta thlai ama uah aw." Tapa ta eima Biehrai ta mania a vaw chho hapa he khâchâ pahno ngâhlâ ha ei su la.  Hmo doleipa taopa vâta hneirôna hlâta  khazopa khona zie taona vâta Rietheina he kho âchhi via zie he pahno ngâhlâ ha ei su u, cha hawhpa hro hnei thei chyu awpa ta khôkheina ei cha hlâ ei.