MFA CUP 2018 : Ng Tlakhu ta ‘Hattrick’ taopa ta Siaha ta Champhai 4-2 ta pahnie hr’eisala Semi Final â ngia khao vei ei

Mamit liata MFA Cup 2018 akhaih haipa liata League Round hnôh chaipa liata Siaha United FC ta 4-2 po ta Champhai FC pahnie ei ta, châhrasala amâ khaih tuapa liata Mamit District vyuhpa Kawrtethawveng FC cha 3-1 ta ama vaw pahnie khao leipa vâta, Kawrtethawveng FC nahta Point alyu nairupa liata Kawrtethawveng FC heta Semi Final amâ ngia hapa a châ.

Siaha United FC heta Semi Final a ngia cheingei achhuahpa ta Champhai FC he hmiachhy ei ta. Anodeikua akhaihna hropa, Kawrtethawveng FC nata Lunglei Bazar FC akhaihna result liata amâ pahniehpa vâta deikua amâ lyna a ki tu thlyu aw vei.

Akhaihna pathaopa a châ patawnah ta Siaha heta chadiepâ lymâ ha ei ta. Amâ khaih thaota tawhta Siaha heta ama pahnie aw, tahpa cha pangiasapa a châ thei thlâh ha. First Half chhâ chy, Minute 45-na liata Siaha United FC ta Penalty ama hmôpa cha Ng Tlakhu ta khôpa ta, 1-0 ta Siaha United FC heta hmia a sahpa ta 1^st Half ama pachhâ.

2^nd half pathaopa a châ tawhta minute 49-na liata Ng Tlakhu pyly ta Siaha châta goal za khôchhi heih ta; minute 53-na liata Ng Tlakhu heta ‘Hattrick’ taopa ta a goal thôhna za khôpa ta, he he Champhai lâ tawhta Lallawmsanga ta goal kha za khôpa ta 3-1 ta Siaha ta hmia amâ sah. Minute 58-na châ ta, Siaha ta goal za khô heihpa ta Lalrinliana ta ama goal 4-na za khô ta. Champhai châta cha thô thei leipa duasu a châ ha bâ. Minute 91+1-na liata Champhai heta ama goal 2-na Lalremruata hmâpa ta za khô ei ta, daihti chhâ ta Siaha he 4-2 ta ama tlô hapa a châ.

Champhai he tlô hra v’ei sala, Group winner châpa ta Point 6 hmôpa ta Semi Final amâ ngia pyly.

Siaha he akhaihna hropa result liata a pahniehpa ama châna hawhta ama thlalôh hlei leipa ta. 4-2 po ta pahniena to hr’eisala, akhaihna hropa liata Kawrtethawveng FC ta Lunglei Bazar FC cha 2-2 ta amâ pahniethaipa vâta, Siaha nata Kawrtethawveng heta Point 4 rairie hmôpa ta, ‘Head to Head’ liata Kawrtethawveng FC he Semi Final amâ ngia hapa a châ.

Siaha United FC Striker Ng Tlakhu ta ‘Hattrick’ tao hrasala, Semi Final tlôkhei thei khao vei.