MFA CUP 2018 : Siaha United FC ta 1-3 ta Kawrtethawveng FC pahnie vei ei

Atanohta Mamit liata Mizoram Football Association (MFA) Cup 2018 akhaihpa liata Siaha DFA vyuhtuapa, Siaha United FC chata 1-3 ta atlôtuhpa Mamit District vyuhtuapa Kawrtethawveng FC pahnie leipa ta MFA Cup 2018 khitlyna ama pathao pasu lei kaw.

Akhaihna pathaopa a châ tawhta Siaha United FC Player pakha ta ama kao lâ pangia tlamawpa ta, minute 18-na liata Kawrtethawveng FC hmia asahna khôpa ta. Siaha United FC heta thapi phiapa ta ama taochheipa taopathi achhuah hra ei sala tlyliah hneituh viapa, Kawrtethawveng FC heta 1^st Half chhâ chy, Minute 45+1 liata Thawmmawia hmâpa ta 2-0 ta hmia amâ sahna ama za khô lao ha heih. 1^st Half chhâ ta, buakha amâ pahâ tawhta 2^nd Half akhaih pathaopa châ heihpa ta, Siaha United FC heta ama theina zydua papuapa ta akhaih taraw hr’eisala, ama vâduana noh ma a châ ha ma, goal khô thei leipa ei ta. Mamit heta za khô chhi heihpa ta 3-0 ta hmia amâ sah haw. Siaha United FC heta 3-0 ngâsâ ta tlô lei awpa cha khoh hra leipa  ta, si kha za khô ei ta, 3-1 ta MFA Cup 2018 akhaihna hmiatua chaipa liata pahniepa ta ama y hapa a châ.

MFA Cup he League ta akhaihpa châ ta, Siaha United FC heta Lunglei DFA vyuhtuapa Lunglei FC cha târi 11.2.2018 khita ama hmiachhy heih aw.

Siaha United FC he Group A liata Champhai FC, Lunglei FC, Kawrtethawveng FC-zy nahta y khohpa ta, akhaihna hropa liata amâ pie pha khiahta cha ama duasu he ama taopathi thei thlâh ha chy.