Phone tawhta a vâ-ianô cha kô 83 ta uhtheipa nôpipa a châ tahpa pahno papua hrasala lahpinô ta a hnei pyly

Chyhsa huh viapazy pi ta cha nawhbaw pahno beih leipa tawhta ‘miscalled’ tlyma ‘call’ tlyma eima dao khiahta cha pachâ peimawh hlei leipa ta uasa hlei ma pi.  Châhrasala kô 28 ta uhtheipa Sofian Loho Dandel deikua ta cha hetana heta tao vei.

Ano he Indonesia liata a pahrâpa mechanic châ ta, a pahno beih leipa Martha Potu tawhta ‘Call’ dao ta, a eikha bie a chhona liata a ao kho-iah a hnei kawpa iah chata zaipâ ha ta, dawh kha chhôh tlai bie amâ chho.

 pahnopasia kaw hra v’ei sala phone tawhna chata bie a chho lymâ ei ta, kheihawhpa hmi ma ama phaoh tahpa chhao a pahno rairie hra v’ei sala Martha ao kho-iah a hnei kawpa cha nahthlie aina noh hnei vei. Kyhpachâna tilih liata a pamôhkhei mâh hra v’ei sala a lih apathuhpa chaby rachhôh tlôkhei ha ta, a tlieh papua thei rimâh khao vei, Sofian chata Martha nahta â hmô awpa ta bietluna a tao haw.

Chatanachata râh lia thosônô tluta chhithaipa châ sala a ngiapa ao nai zualuahpa a hneipa hmô awpa chata â thao haw ta, Martha O a kei tlô na ta deikua vaw chyh-eihtuhpa hmi chata a palôh deikua a panano daihmâ, nôhmeipa kô 82 ta uhtheipa ta Ochhi vaw pahy ta.

A hnazô sâhmia a tyh leipa ta a ao nata reih deita a thei tyhpa, Sofian chata ano hlâta kô 54 ta uhtheipa iahzaipa ta thlahchhiekhaomâ chhao avaw rao khao leipa cha kheita chhôhso a phaoh hr’aw vâ tly? A lâpaw vâ-ianô cha cha hawhta nôpipa a châna ta rai pangiasa va hla maw. Châhrasala cha chanô châna dopa a pahnopa vâna chata a kyhpachâna cha bâsai hleipa ta, amâ hmô hlâta kyh amâ pachâna hawhta kyh amâ pachâ pyly.

Sofian chata tly pazao lymâ awpa tlao achhuah haw ta, a tly tua chain oh chhao heta Martha kiah liana heta dawh 2 chhôh tlai daihti hmâh ta, he chhôh heta bie nano nanopazy reihpa ta, lôhkhoh bie ama paryh thei hapa a châ thlyu aw.

Martha he a vahpa ta kô 10 khô hapa ta â pahâsai tawhta anodeita khih kaw sa lymâ ta, saw pano hneipa ta a sawnah cha râh hro lâ raihriapa ta ama y tahpa cha Martha thâtih, Sofian ta a pahno baichhipa a châ.

Sofian, ahy hmahta khopa a hnei beih leipa bao cha hnaihta, Martha thâtih a pahnopasia tawhta cha a kyhpachâna pôh via rilipa ta, Martha kiah liata tlaitlao awpa cha a tlaichhai via lymâ ha bâ.  Ama bietaina pa-i via awpa ta Sofian chata a manô rihchâhpa Martha cha a hnei awpa ta hrua ta, Martha cha aly kawpa ta âvaw pyh ha hra.

February 18, 2017-pa khata North Sulawesi, Indonesia liata ama chhôhkha nata viasa rihchâhzy hmiakô liata hrochhôh châta tahpa ta, bie amâ taih hapa a châ.