Reih cheingei ma y : Online tawhta âdôveina hmâpa ta Bank Account liata phusâ eima hneipazy miah ama parupa lei n’awpa ta asohsi chyu suh vy

Chyhsa ahy tlyma na pahno beih leipa tawhta na Account liata phusâ avaw paphao chheipa hawhta â reihpa ama y thei. He he â dôveina chi kha nata sôhthih vâro tlai pahlei theina a châpa vâta â sohsi kaw awpa. Na account tawhta phusâ cha na paphao thlâh ha awpa châ leipa ta, a paphao chheituhpa khata Bank-liata report pangiapa ta hmah tlao a la awpa a châ.

Atliata liana khata chyhsa pakha chata a bank account-liata Rs. 82,000/- â deposit tahpa SMS dao ta, châhrasala reference number J002 tahpa hleikhô deposit tuhpa chôchâh pahno theina awpa hropa y vei. Cha khai tawhna chata Phone Call dao ta, Revenue Department tawhta bie avaw chhopa hawhta â reihpa ta, taochheipa vâta VAT Return  Rs. 82,000/-cha a bank account-liata ama vaw khô tahpa nata reference number chhao J002 a châ tahpa vaw reih ei ta. Phusâ chhao cha TLB Towers eih awpa a châpa vâta paphao palie heih awpa ta vaw tah ei ta. Avaw chhotuhpazy chata official letter lyu kawpa, a paphao paliena awpa bank details ama fax-pâ hra. Cha chyhsa chata phusâ cha paphao palie awpa achhuah ta. Rs. 82,000/- cha a bank account-liata â ngia tlai tahpa pasia ha tua ta, châhrasala "UNCLEAR" a châ tahpa a hmôpapua. A zo khao leipa vâta bank lâta hyutuhpazy tlao phone ha tua ta. Bank lâtapazy chata Risk/Fraud division lâ vaw reipahmô ei ta, cha khai tawhta bank lâchhâhta alaichadaituhpazy chata vaw phone heihpa ta, adôveina hmo a châna zie he hawhna heta ama vaw chho: Phusâ a paphaona awpa cha mopakha account, balance khâpa hmahta a hnei leipa a châ. Phusâ ama vaw deposit-na cheque chhao cha ama parupa a châ cheingei na ta pangiasapa a châ. Cheque cha bounce aw ta, phusâ ama vaw khôpa chhao cha â lie ha heih aw. A yzie chaipa a châpa hapa cha, he chyhsa heta ano vaw dôvei achhuahtuhpazy bank account-liata Rs 82000/-kha kei paphao hapa châ ha sala, daihti rei leipa liata a bank account liata phusâ â vaw ngiapa hawhta â lâpa kha â lie pakhua khai ha heih awpa vâta ano sôh, a hriapapuapa cheingei Rs. 82,000/- cha moleipa, ahyzy tlyma ta a nao kawpa ta vaw lapa aw ei ta, hmô pakhua awpa y khao hlei leipa ta a sôh Rs. 82,000/- cha tlâ a pahlei aw, tahna a châ.

Chavâta, eima hriapapuapa, riethei kawpa ta eima hlao papuapazy moleipazy ta a naosia kawpa ta miah ama chhupa lei n’awpa ta asohsi chyu suh vy.