SAIKAO KHIHPI (The City of the Lakhers)

~ FC. Chhuasa

Phiahpi thla, târi noh 28, 2011 @ 7:30pm hryh ta Gospel Outreach Hlapy kiana Sumo miano ta Saikao khihpi a ngia ta. Keima chhao cha Sumo hmia asahpa dyuchhai hnôh chaipa liana chata a tyupa ta liahsa ama chô khai tawhta khichhailaipa hawhta a para-parô lei tata chô hra na ta. He he khâpa hropa vâta châ leipa ta, ei tyuna su kha hnôh khaw n’awpa su rai a châ vâta tlao a vaw châ. Laty Pastor Bia pakhypi a hlao awpa eima châ.

O tlô miah rai ei ta, Music Director nata Auditor (KT Tharpuia nata ZT Beithapha) zy hnohta tlô awpa ta kei cha raopa châ na ta. Satlia pano ta ei sahria cha sâkha rairie a raipa ta na phaopa ha ei ta. Eima hyutuhpa nah pano hmâchhâ cha ama sahria a ao laih lymâ ei ta. He he ei pôraoh na moh ei ta, chhobai tieta ei pha thlâh hapa vâta ma a châ vâ tly, ei py thupa khata ma ama palôh liata bie tlao a reih ma, âmo hry liata ei hmipha chaipa vâta ma tlao a châ vâ tly?! Khâpa rai châsala, Vâ khihpi hawk alia châ mawh sala, ei sahria kha charâta paza leip’aw ei ta, a chhâna lâta keima pyly ta ei ao thlâh ha heih thlyu aw.

KT Abela nah o lia tlô pi ta, ano he a palôh liata hmo a ypa maih pahri-paziah chakhy thlâh hapa chi châ hra sala, khâpa pita ma maniah reih ta, kha tlupo ta ama chhôhkha ta miah ama dao tly? Eima chô liata ama phana kha Vâ O tlôna taihta reikhi â khi.

The Lakhers

Chi hro pho hropazy ta ei châna eina hiahri daihti liazy heta Lakher-pa ei châ ei tah khoh chhyh ha cha maw. Lakher tahpa he a palaikhei kaw tyh na ta, ei palôh einâ eih chai tyh. Chi hro pho hropazy ta vaw pahnothai chai ei sala vaw pangiasa na ta, Tlaokao nah hmialia chhochhi cha eino nata ei thôh lâ taihta reichanei awpa ei khoh tyh. Keima liata nawhtaw khoh leina na pie ta, ei palôh na palai ta, tha na patlô ta, hmo hluhpi eina pataosa thei tyh. LAKHER!!!!!!

Khazia rimâ ma i??

He khihpi ei tly no heta ei pahnochhei vei khiata la chhôhkha a bôchhâ awpa hnei leipa na ta, lôkhy viasa parohpa nata thiehpa hnei hra va na (atahmâ deikua ei hnei haw). Pihnô Vaili he ei no cha a tlâhna bie reipa ta a ku ei chalyu ha hra taraw; anodeikua kei, keima ta bao he la khâpa vâ hmahta na ngialyu thai tlai aw vei. Kei hnazô sâhmia ngia awpa hlâta cha avâ liata Awhsizy hmia siah awpa chhao a nao via cheingei aw.

Chyhsa reikah hluh tu leipa, biechho-thâhchho a thai thai leipa, palôh ata apahno thlâh hapa chhaota a reihpapua ngâh tyh leipa nata a tao thai tyh leipa ei châpa vâta, khichhai châ awpa he ei hmo ngiaroh chaipa hry liata miakha a châ tyh. Anodeikua, khazia rimâ tlyma cha khihpi my noh vaw chhipa liata ei kaw theipa cha, keima liata khichhai châna ppalôh rai y leipa ta. Cha khihpi leilô liata ei pheipazah ngia a ryh ngâsâ ha ta. Ei phei hyzy cha â hualua kaw cha maw! Ei pakah pahâh ngaita ta, ei tyuduapa rai rai cha khichhôh tlaipa he lyu na ta. Chhôgpadâhpa miakha liata ei chyia sona sahria cha hmô chanei tyh vei mawh sala cha, khichhaipa ei châ tahpa ei my dâhdei aw.

A khihpi othliahzy liana cha nâ pathlatuhpazy tawhta ama vaw laizaolao tyhna hawh tlaita huhieh kawpa ta ei bâhzy hiehâ na ta. Ei khih bôhpi parohpa hawh tlaita lôh-lie kawna chôta a lytlâh tozy cha hryh laih na ta, pazu-pathâ laih ngâkaw awpa taihta ei khoh cha maw! Palôh ta a mochhih kawpa ta daihti reipati na ta, nâ daih hlei vei. A khiliah lâlai nata lytlâh a paryh-pari dâh hleikhô ta, a chheipâh râhzy taihta zôpha kawpa ta mohpasia awpa khoh na ta, he khihpi chô liata Chô Nolynô nata Chô thlapizy yzia dâh taihta pahnopasia awpa ei khoh cha maw.

 chhyna

Khâpa hropa vâta vaw châ vei. He khihpi he sapa lâta phopi hawhta yzie hneipa ta eimâ pazao-pakhy tuana khihpi, thlahpa lâ lia chhochhi cha Lakher nah nata Jehovah likawh liata Biehrai â vaw thaona nata pina a châ. Chavâta Saikao cha The City of the Lakhers tah lei thei va na. Mara History liata Saikao hlâta khih peimawh viapa za y hluh thlyu vei. Siaha cha Marapazy khihpi châ ta, Saikao deikua Lakher nah khihpi a vaw châ.

Ei thisaih zôhzawhpazy ta hezy a pahnopasiapa a châ thlyu aw. Kâzô a pachhiesana nata â thlachhiena rai hnei leipa na ta, ei rureihpazy he Saikao liana heta a ngia a ryh ta, ei thlahpa a tlâh. A leilôzy chata ei hro palysa ta, a pahro pathi. A ziza-hiaza ta ei tha eina patlô. He khihpi he kei châta cha laihsa hmipha kawpa, thâ lia a ngie raolao laih ngâ kaw awpa hawhta a za châ.

He Lakherland City liana he cha (Maraland City châ leipa ta) Siaha hawhta reih hropa thei awpa y leipa ta, reih hropa cheih ngâ k’awpa byuh hra vei. Khei hawhpa ochhôh lia rai angiapa ta, ti chakuapa a hia ngâh aw na ta, ei châ ly tahpa tlaita alyna bie ei reih thei aw. Y, cha deita chhao cha hmahta kei châta la ngiaryhna khi â khi ha. Pho hropa y chhôhpa chhao Mara A, AW, B ataotuhpa samoh nô deita tlâ a châ. Chavâta khiama ei thlah a za lôh pachai tly? Ei paleih ngia a ryh ta, ei hmao tha a dâh. Ei palôh chhôh hmoh ta, ei hnazô â ly. Khoh chaipazy charei tlâhzy hawh tlaita tlaichhai na ta, chhaih chiehpazy chareina tlâh hawh tlaita ngiabâh na ta, lyubie ei hlâ hmâ leinô laina khih bôhpi hawh tlaita lôh liata a zâ rie!

Châhrasala…

He khihpi liata noh no chhôh tlai ei châh nota ei yzie he â nano kaw. A châhta a ly kaw na ta, a châhta ei palôh a pasa kaw. No-âhchhih kawpa cha, he bie eima za roh ngâ haipa lia chhao heta he su eima vaw tlôna taih heta, LY tahpa reikah rai a zâ hlao mâh hra vei!

Tlai chuh, palôrupa chhôh chaipa liata a rôh na ta, chaphôh ei tu pâ ngâkaw tyh. Saikao achhyna opipa liata ei pakhy thei leipa vâta pei ei tahna khata hrochhôh â daih tlamaw aw tahpa ei chi ngaita. Keimo sahlao penawh apakhy awpa ta a thao ngâhai pi ta, a hluh via syulyu sievaw awpa ta raihriana chysia a pakysa thlâh hatuhpa kha thlahpa chhiepa ma thlahpa phapa hri maw? Cha thlahpa chata thata eina pazei! Pakhypi chhâna noh liata kyh a chhituhpazy pi khaw, khichhai-khichhôh ta paza kha chhao pha ma pi. Khatai lia e Saikao khihpi zawpizy ama y khai haw? Pati a vaw dao via awpa y khao ngâsâ v’ei ma? Chhienoh-phanoh liata palôhâh thai kawpa Lakher nah kha châ khao ma pi ma? Khazia e chhôhkha a ki leipa ei ta, opa lyuhri amâ ki vei tly?

He he hmo dopa kha a châ. Sapa nata thlahpa lâ apakhypi he ei hluh ei vaw hlao haw hra. Zâcho ta eima tlô châh y ta, awhkho lâta a tlôpa hry liata ei hlaona daihti a y hra. Saikao eima tlô zâ lia deikua la dawh 7pm rachhôh deita châ chy hra sala, eimâ pahâ n’awpa su pahno leipa ta eima vaw y daihmâ. Khazia maw? Amâ daih chhihru vei! He râh leilô liata awnanopa â vaw duah rakha tawhta hlapy eima hnei chiehpa nata eima hnei haipzy hry liata a pha chaipa a châ leipa chhaota â khotuhpa a hnei hluh leipa Gospel Outreach Ministry sôna a tlapahnai chaina su châ ta, Saikao noh a li ta, Missionary pheipazah ngiana meihkia a lo. CCI (M) Headquarters Office kiah liata ei duah thlâh ha nota, ECM Headquarters Office Siaha khih lialôh chaipa liata a chaluah thlâh hapa cha, ei mothlaw liata a vaw lâ ta, cha chata ei chhôhso eina pahiah. He zydua liana heta khâpa hmahta ei pahnothaipa nata ei rei thaipa y vei. Aryhna khoh na ta, adyhna deikua ei hnaw.

Ei pangiasa..

Daihti vaw y awpa, chhâ thiehpa avaw pahieh lymâ awpa liata, Lakherland su nano nanopa tawhta nata khizaw su nano nanopa tawhta chi to pho to ta he khihpi he vaw tly via lymâ aw ei ta. Athai-asohpa hluhpi amâ vaw ngia lymâ aw. Hnôh lâ daihti thâtih pahno khohpa ta a vaw ngia lymâ aw ei ta, nama hmo pahnopazy a hluh thei chaina hawhta vaw roh u la, a vaw paso ha muh vy. Ancient History and Modern History of Maraland atyhpakhyna cha he Saikao khih he châ ha tlôh ta.

Chi nata pho, reih pabohsana kyh liata chhao he khihpi ao he paro chai sala ei pangiasa. Hmiahao chariah adyuh awpa ta chhao he khihpi leilô sawzy nata ama pathlazy he ama riahpha chai sala ei pangiasa. A hra u la, thyu u la, nama zachhihna nata nohâh-yna lakhozy a kho pathi heih teh u. Lakherland he chahryh u la, miah pasayupali laih tua u. Thyutlia sawzy ta nama bie nata hla he eima cha nahthlie cheingei nahta khâchâ ei hnabei a seih. Nâmo la Siaha palôh phaoh khuh vy, nama palôh liata Lakher nata a Khazohpa lai chai mawh sy.

Hy, nâ Saikao khihpi…

Hy, nâ Saikao khihpi, Lakherland khihpi nata ei khihpi na vaw châ. Khizaw châta Tel Aviv cha Israel khihpi châ ta, Israel sawzy pathipalôh lia deikua Jerusalem he ama khihpi khâ a châ zôzawpa hawhta, Siaha cha khizaw mohmô ta Marapazy khihpi châ ta, eima pathipalôh khihpipa deikua Saikao a châ ngâthlâh ha aw. Notla Mara khihpi cha Siaha châ ta, Nochhi Mara khihpi deikua châ thei khao vei. Saikao, nâ deikuala châ hly thei ngâthlâh ha pi ta, Marapa chi nata pho â duah chhôh via cha eima chhôhso khihpi châta eima châ hly via chy aw. Marapa thisaih ta sapa ta Saikao a myna noh cha, Marapa a châna a myna noh a châ hra aw.

Saikao khihpi y, Lakher thisaih ta a sapa thyutliazy palôhrupa liana heta sôh via rili aw chi ta, nâ sâh via rili lymâ aw. Nâ nâ ly khiatala, he Lakherland he a thapha aw ta, na pachâ a rôh khiatala a pachâ a rôh hra aw. Saikao khih rei â raoh khiatala Maraland apôhkha aw ta, rei â raoh vei khiatala Maraland he a keichheih aw.

Hy, nâ Saikao khihpi.. Lakher râh khihpizy hry liata chyh chai cheita aw va chi!!!