Tliatlu Tlâh kâpa khaw!!

- By Hrualai Fachhai

Meikhuh liahsa a charihpa ta; Vakao nôvah a pakiapa hawhta, thathyu kawpa ta a vâ la a kiah ngâpa nata tho nah chahlaoh buchadoh lá châ a chhuah pata a kâ ngâpa pyu hlâta pyu raroh-y viapa nata thlazoh chhih viapa y vei; cha liata ypa, Tliatlu thlihua sy ta, a laihzaolao tyhpa Rahsa, pazu pavaw nata hmohrohneipazy châ chata!

Thlalôh kawpa ta kô chareih ama laihzaolao tyhna Bypi, mei lâta a lie ngâhaipa cha a chatlie-baikhaipa ta a pasiesai a chhuah pata sâh-awhna chôta a zawtietâ ngâpa hryta, A taw a pasie-para thai leipa a hneipa zy lôhpi atymâ ta apasa awpa dah rima cha! A kuphei chatlie-chakoh ta, azawtieta para thai leipazy châta cha thlazoh kawpa ta pâhdawpa liata mei ta a kâ awpa hâ pata, taotuhpa awsao thlah leipa ta tao theipa hnei khao tlöh ei vâ!

Ama awsâhna thei ta pahno theipa châ ha mawhsala. Kha zyzie hrohneipa hry lia khata "phuh maniah lapa mah y" tahpa ta a awhsâ ngâpa he ama ylei na ta ei pangiasa vei cha maw!

Pazupavawzy cha eima nie awpata taopa mah a cha bao eima tah thei aw. Anodeikua thokô-rihkô nata pawpi-pawngia châh chhâ hela na rei khei hra tua. Biasôhpa nata pawpi-sôhpa thokhazy cha a râh leilô sawzy châta hmâtlâh châ awpa ta, kô tato a chyh chyhta chhyhpaka pata ama vaw tei hnolo tyhpazy kha "hraoleipa" dei pachâsapa a cha khai thlah bâ' he zaw! Thokô sakha pitloh n'awpa heta kö khazie tlaima byuh tahpa cha, hihsâna ei thailei pa chhaota patuapalua thai awpa ei châ taraw mah my.

Chazy hlâta leilô sawzy châta pasa via heihpa cha na, kô 7 chhôh ta mohôhna rai hria pata tlaw 1 hmata la pangia ahnabeisei leipata Râh kyhpachâna nata tlyngiahna vâ deita ama vaw mohôhpa; pakha-pano paphupasa leina/taotlamawna vata mei läta a cha khai thlah ha awpa hi. Cha kyhpachâtuhpazy palohpasana nata chhohmaru a rôhna cha "byhnâ to leina khi a cha mah tah" tahpa deikua eima my tlamaw aw tahpa ei chi kaw.

A chhâ chaina lia deikua he he ei reikhoh kaw. Eima râh, eima Chi, eima Reih pabohsana awpa heta, khih to, vaih to, chhôh to sie ta a ngiahnao pata tlâh eima awhkhei ngâpa phahnaivei ei tahna chá vei. Anodeikua eima yna su chyu liata riahpha kawpata hriapa ta hmah eima lapa he kei la phahnai ei tah via.