Tripura Assembly Atlyna 2018 : Atanoh Vote ama pathla

Atanohta Seat 60 yna Tripura Assembly atlyhna châta vote pathlapa liata sawhkhâ haipa CPI-M chata, Central liata sawhkhâna tao haipa BJP ta thapi phiapa ta Tripura liata Campaign hra ei sala CPI-M pyly a sawhkhâ aw, ama ta.

India ta khotalaina hneipa ta atlyhna avaw siekhei tawhta kô 65 chhôh cha Left party, Communist Party of India-Marxist (CPI-M), heta Bharatiya Janata Party (BJP) he a khotlâh ta vaw rao beih vei ei.

Anodeikua kô 2016 nata 2017 liata Tripura Politics saipa ta CPI-M nata BJP he atahmâ atlyhna liata a chatôh chai awpa ama lyu ha bã.

CPI-M, BJP, Congress nata Trinamool Congress chhihthatuhpa nano nanopazy ta thla 2 chhôh tlai Tripura atlyhna châna heta thapi phiapa ta Campaign chyu ei ta.

Prime Minister Narendra Modi, BJP President Amit Shah nata BJP General Secretary in-charge of northeastern states Ram Madhav, BJP sawhkhâna State Chief Minister 5 zy ta BJP cháta thapi phia ei ta. CPI-M lâ tawhta General Secretary Sitaram Yechury, CPI-M luhpa Prakash Karat, Brinda Karat, Biman Bose zy ta thapi ama phia hra.

Congress lâ tawhta President Rahul Gandhi nata Party luhpa nano nanopazy ta thapi phiapa ta ama Campaign hra.

He hawhta a châ nota Trinamool Congress, Tribal party - Indigenous Nationalist Party of Tripura nata  National Conference of Tripura zy nahta ahrialâhpa chata, West Bengal tawhta ama chhihthatuhpazy chhaota thapi ama phia hra.

Tripura atlyhna liana heta CPI-M ta sawhkhâna ama tao via chy na ta pangiasapa a chã.

Atanoh heta Constituency 59 liata Vote pathla aw ei ta, Charilam Constituency deikua târi 12 Pamih liata Vote ama pathla aw.