Mawrâh liata sahma zuapa chôchâh achupasiana hneituhpa MLPC study group-ta report pangia daihmâ; Parameter 10-IN achupasia

Aizawl: Mizoram Liqour Prohibition and Control Study Group zy chata thla 10 daihmâ achupasiana ama siekhei tawhta sawhkhâ hnohta amah mo hmôpapuapa Report ama pie daihmâ tahpa reipa châ ta, Budget session liata phaw hmâ awpa ta pakiparai haipa châ ta, he achupasiana he panuana nano nanopa 10 hmâpa ta siekheipa a châ.

Athaono khata cha December 2017 chhôhta study group zy he ama hmo achupasiana report pangia awpa ta tahpa châ ei ta, daihti piechhi awpa ta amâ hawna hawhta daihti piechhipa châ ei ta. Panuana (parameter) nano nanopa 10-lâta pachhaihpa châpa ta, Consumer-zy achupasiapa châ ei ta, sahma doh tyhpazy ta chhie ama piepa pasâhpa vaw châ ha sala khazie ta papôh awpa ma ama ngâh? tahpazy, sahma ta raihriapa liata yzie a hneina dâh zy, hro liata yzie a hneina dâh zy (quality of life) zy achupasiapa châ ta. Sahma vâta O chhôh khaohkha buana a pua theina dâhzy nata hmo nano nanopa achupasiapa a châ.

Retail & Producer surplus lâchhâh achupasiana liata cha azuahtuhpazy kheita ma sahma ama zuahpa vâta ama hro liata yzie a hnei tahpa zy,  rai taochhina dâhzy, rent for premises,  entrepreneur zy ta amâ thôhkheina dâh zy nata ahropa zy, Chhie nata duty nano nanopa tawhta sôh â ngiapa zie zy chhao achupasia awpa liana heta â hlao ta. He raohpa heta healthcare liata yzie a hneina dâh cha achupasia awpa hryta naosia lei kawpa hryta â hlao hra. Sahma dopa phakheina nata raokheina dâh zy, sahma dopa vâta pasana kyh liata amohôhna châta hryuhnazie zy,  healthcare a papôhna dâh zy chhao achupasiapa a châ.

Sahma ta achuna liata yzie a hneina dâh zy achupasiapa châ hrapa ta, siku nata college achuhaipazy liata sahma vâta amâ chuna duasu zy, achu pazao thei khao leipa nata sahma ta hmohropa a tlôkheipazy achupasiapa châ ta. Police nata justice system lâchhâh liata police apielyuna nata sôh hryuhpa hropazy, dâh chalochabatuhpazy nata organization hropazy sôhthih hryuhnazy chhao achupasiapa a châ hra.

Awnanopa nata khihtlâhta sahma chôchâh liata hmah ama lanazy achupasiapa châ ta, sahma iahzaipazy châta campaign, camping, crusade, rehab hneipa a châna dâh zy nata vigilance hawhta khitlâh hmahlanazy chhao achupasiapa a châ hra.

Sahma doh hra leipazy liata yzie a hneina dâh chhao achupasiana liana heta pahlao hrapa châ ta, chhôhkha sanawh ama buana dâh zy, sahma vâta buana a tlôpa zy, traffic accident, moleina nata tharô hmâna a tlôkheina dâh zy achupasiapa a châ via chai.

Sahma doh leipa, sahma adoh tyhpazy vâta ama hnatlâhna a veipâna dâh zy nata sahma doh hra leipazy nietluana a parao theina dâh zy (productivity loss for non users) nata a hropazy â hlao hra. Sahma nata drug azaokhina pahlaopa châ hra ta, sahma zuapa a châ tawhta drug a tao tyhpazy ta sahma lâ tlao ama kiah ha ma?tahpazy cha achupasia viapa hryta pahlaopa châ ta, he hleikhôna heta sahma vâta achhuah chhieliena y leipa ta saw phaohpazy, sex tawhta pasana â pakia theipa ahiezawhna dâhzy chhao achupasiana liana heta â hlao hra.

-       - Zalen.