A SAWCHANÔ VAHPA HNEI AWPA LIATA A PAW PATHLIENA BIEREIPA ( Nô nata Pawzy ta sawzy kyh ama pachâna he arônah kaw dia!! )

(He bie he chyhsa hluhpi ta nama rei chiehpa nata pahno chiehpa chhao a châ thei aw, châhrasala, pahno mâh leipa pakha chhâ ta Nô nata Pawzy ta sawzy kyh ama pachâ zie ama pahno viana a châ khiahtala, tahpa he ei kho chaipa a châ, a rohtuhpa deikua pahno va na :- Henry Fachhai)

"Atanoh la rei awpa ei viavi kaw, châhrasala, apeimawh chaipa, Myuhneituh awpazy chhôhkha châta arei ei vaw thao tua aw."

"Eima pahnopa hawhta ei sawchanô cha chhôhkha thiehpa liata angia awpa vaw châ ha ta, ano châta a pachâpeimawh chai awpa nama châ ha bâ. A hro noh kaw hmâ lymâ na'wpa liata maophaotuhpa peimawh chaipa nama châ ha bâpa vâta nama hnohta ahaw khohpa hnei na ta, ngiachhiepa ta ei sawchanô he aly kawpa ta rie vaw soh muh vy. 'He he ei ku a châ,' tahpa ei pahnopasiapa hawhta, aly kawpa ta nama pa-ysa thei, tahpa ei pahno hra. Âdo kawpa ta reipa ta cha, a chhôhkha parohpa lia hlâta cha a chhôhkha thiehpazy hry lia heta â ly via aw tahpa chhao ei sia kaw hra. Châhrasala, Paw ei châna hawhta ei sawchanô alyna he pachâpeimawh chai na ta, chavâta ei reih chanei heih aw, EI SAWCHANÔ HE ALY KAWPA TA VAW PA-YSA MUH VY."

"Ei sawchanô he pachârôhna na tlôkheituhpa nata ei châta phaohri châ beih leipa ta, tlai chuh, ei lyna chaipa nata ei hrona chhâ chaipa châ tlôh ta. Atanoh he ei sawchanô cha Khazohpa ta chyhsapazy miah a paduana chhâpa hawhta Vahpa m'iah vaw hneisai ha hra aw ta, a pitloh ha bâ hrapa na a châ aw, eima ochhôh liata alyna miah tlôkhei tyh tuhpa ei sawchanô cha chhôhkha thiehpa liata chhao alyna tlôkheituhpa châ lymâ mawh sy."

"Ei khizaw cha nama hnohta cha pie ha ei na ta, ngiachhiepa ta vaw mohôh ula, a paw vaw papawsa muh vy. Ei Beisawchanô, ei Sawchanô Lôsôhpa cha nama hnoh ta cha hlâ ha ei na ta, ngiachhiepa ta Abeinô hawhta rie vaw mohôh muh vy. Thi nata thaw, mathlaiti chhao ta ei palaiseihsapa châ tlôh ta. A kyhpachânazy, a zawngiahnazy, a sianazy, a khochhihnazy chata a chhôhkha thiehpazy cha mohôh ei sala, châhrasala, aly kawpa ta soh awpa ta ei châhnaw hra ei. Namâ ly leina zie ta tlyma, nama kholei zie ta a y khiahta la, rapa ta chhorei ula, châhrasala, mohnaona ao châ leipa ta, kyhpachâna ao ngiapa ta vaw chhorei muh vy."

"Ei sawchanô he la, kei theipa chhypa ta ei chhypa châ tlôh ta, a hnabeidyna, a pachârôhna daihti liatazy a kiapâh liata y parie thlâh ha ula, khâsia ula, nama kyhpachâna vaw palâsa tyh muh vy. A tlâhleina noh nata a chiehleina noh liata thapasa kawpa ta mohôh ula, cha cha a châta thohna pha chaipa châ tlôh ta, chhôhkha liata a maophaohna patlô thei lei awpa taihta khih a sa khiahta cha hriena pie ula, khihsa tôhtuna pachu muh vy. Châhrasala, kyhpachâna ta pachu ula, chhôhkha thiehpa liata cha, achuna thiehpa a pathao pathi heihpa châ tlôh ta, pahnothaina chhao ta mohôh awpa angiah tlôh ta."

"Ei hro liata peimawh chaipa, ei sawchanô cha nama ku liata y ha tlôh ta, chavâta ei châ haw chanei heih ei, aly kawpa ta rie vaw soh muh vy."

"Ei piahpa kho ngaitapa, atahmâ ta ei biereipa he a y zie pahnothai tiarâh ngyu aw va chi tah tyh? Châhrasala, Abeipa ngiachhiena ta sathei sawnawhzy avaw pyh hra'w ei chi ta, sawchanô chhao na vaw hnei hra aw. Chatina chata atahmâ ta ei biereipa y zie dopa nata a liamaripa he na pahnothai hra aw. Ei sawchanô he aly kawpa ta vaw soh mah y."