"MARA REIH A, AW ALPHABET LIATA 'J' A Y AWPA A BYUH"

-AB Rôma, College Vaih, Siaha

Atahmâ nota "Mara reih" eima tahpa he Tlôsaih-Siaha-zy reih he a châ. Eima Bible nata Hlabu zydua liata hmâpa reih, eimâ hly khaipa a châ. Eima Missionary ta Mara reih he avaw chu ta, avaw thai tawhta keimo reihta A,AW (Alphabet) manih vaw tapa ta, chakhai tawhta keimo reih tlaita Bible nata Hlabu zy manih vaw taopa heih ta, a rônah ngaita kaw!!

Anodeikua, keimo reih avaw thai khai âh-leipa vâta châhnawh a ki-âh leipa ta nata rozie chhao avaw pado khai âh-leinazy a vaw y chilih. Cha zy cha eima râh chyhsa, châ avaw thai tuapazy nata eima Pastor-zy hry liata chhaota châ thai viapa, kô 10-20 chhôhta Pastor rai avaw hriapazy cha eima Bible nata Hlabu zy avaw buakhei viapa nata avaw reih hluh chaipazy vaw châ ei ta. He hawhta a châ nota eima châhnawh a ki âh-leipa nata rozie a do âh-leipa zy ama vaw pahnopapua leipa he cha eino eina pa-âh kaw ei. Eima Bible he ei thôh ei palih vaw reipapua ha na ta, hezy he ei vaw hmôpapuapa nata vaw pahnopapuazy cha a châ :

Sâkhana, eima Bible liana heta 'F' sâkha ngâlâh a y. (Athaona 10:14- Kafataw). Châhrasala, he Bible ei rei nona heta eima châhnawh liata 'F' y mâh vei.

Sânona, eima A, Aw liata 'F' he y hra vei. Mongyu nata Tlaikaopa Bible-zy he ahly pi ta, a hmâ pahlao pi ta, ama Bible liata chyhsa moh, Râh moh zydua (i.e Josefa, Joela, Juda, Jeremia, Jeriko, Jerasalem) tahpa zydua cha eima A, Aw liata 'J' a y leipa vâta 'Z' tahpa saita hmâ khaipa a châ. Eima A, Aw pa liata J a y leipa vâta 'J' hmâ n'awpa liata 'Z' sai eima hmâ thlâhpa he a do vei tah heih na ta.

Sâthôhna liata cha eima Bible liata Vaili Mahpaw khata, 'Viahchao Ih' tahpa ta vaw roh ta, (Theithaina 8:16) â dopa ta pahno vana. Hezy dei châ heih vei, eima Bible nata Hlabu-zydua liata Bieparyh(Spelling) alyu thlâh tlôh ta, reizie, aonyh anano thlâh hapa hluhpi ei hmô. He hawhta, 'Bi=thu, Bi=khata', Pi =pek;Pi =piang, Chhi=chhia;chhi =hruai, Thi=thar;thi=thi, Hlathipa buzy tah ei ta, keimo Chapi chyhsazy ta cha, Hlathipa=Dead Song eima vaw tahpâ ngâpa a châ.

He zydua vâna heta, eima District Council liata Chairman eivaw châna daihti (1978-1983) liana khata, P/S zydua liata Mara reih eimâ chu thei bâ awpa vâta Mara Châhnawh/Alphabet he eima panano awpa/Eima baichha via awpa ângiah tahpa ta Executive Committee liata pachia-awpa ta/Agenda eivaw ngiakheipâ ngâpa a châ. (Eima Châhnawh liata F nata J he baichhi sihla tahpa ta)

He he Keimo Chapi chizy ta F eima hneipa vâta dei châ leipa ta, F a y vei khiahta cha eima sawzy ta Solfa = d, r,m,f tahpa he pahnothai vei ei tah na ta;Committee chata 'Âdo tlaina' tahpa ta eimâ pyh. 'J' chhao he eima baichhi viapa a byuh hra; tah heih na ta, Eima Bible nata Hlabu zy liata Chyhsa moh, Râh moh hluhpi zydua he A,AW Bu liata J a y leipa vâta 'Z' laipa sai eima hmâ thlâhpa he a do vei, tah heih na ta; Committee ta, "Â do via aw" tahpa ta â pyh. Chavâta, Committee ta 'F' nata 'J' baichhipa he âryh ta ta, eimâ pyh khaipa a châ. He dei châ vei, a chô liata palâsapa, 'Viahchao IH' tahpa he, 'Viahchao IE' tahpa ta ropa châsala, Vowel sâno, 'IE' tao sihla, cha hawhna chata chârozie âdo via ha aw(i.e Bie, Thie, chhie, ie, pie) tahpa ta vaw roh haw pi ta;rozie nata aonyzy taihta âdo khai ha aw' tahpa chhao he 'â do via aw' tahpa ta a pyh khaipa a châ. Chatana chata, IH tahpa cha IE tahpa ta eima vaw panano haw. He hawhta A,AW nata chârozie adoleipa panano awpa ta sona, novâna na pietuhpa eima Khazohpa liata alyna bie ei rei tyh. Anodeikua, Mara Literature Committee ta apaduapa, Expert Committee atahpa Manôh chyhta yna Committee ta eima 'A,Aw' tawhta 'J' he ama vaw thy thlâh ha bao!!Eino eina âh ngaita kaw! He Committee heta 'Z' nata 'J' alyuleina/ananona he ama vaw pahno-âhtu leipa a châ thei aw. Z nata J he alyu thlâh hapa châ sala, mongyuh nata Tlaikao reih lianazy heta 'J' byuh aw vei ama ta aw. Âlyuleipa vâta Z nata J hmâna he ama vaw pananopa a châ.

Atanoh liata eima A,Aw Bu liana heta 'J' he a y khao leipa vâta, Mongyuh nata Tlaikao Biehrai ahmâpakaohpa, eima Thyutliapazy heta Tlaikao nata Mongyuh reih Bible liata 'J' he kheita e ama pahnothai khao aw? J he eima khoh kawpa vâta châ vei, chyhsa moh, Râh moh hluhpi lia zy ta hmâ awpa ta eima pahlaopa a châ. Eima sawzy ta nohto thâtihbu vaw reih ei ta, 'J' arona vaw y chilih ta, kheita e ama pahnothai khao aw? Z nata J ananonazy he avaw chu via tua ei sala tahpa ei kho kaw.

"Kei Roma he, Khazohpa ta sona novâna na vaw pie vei mawh sala, Marapazy heta atanoh taihta Vaili Mahpaw A, Aw taopa, â ki leipa nata rozie ado-âh leipa zydua kha atanoh taihta ama vaw hmâh thlâh bao hnaih ta"tahpa ta pachâna eiza hnei tyh.